Дисциплинскиот комитет на ФИФА донесе строги мерки против Фудбалската асоцијација на Малезија (ФАМ) и седум интернационални фудбалери – Габриел Палмеро, Факундо Гарсес, Родриго Холгадо, Иманол Мачука, Жоао Фигеиредо, Џон Иразабал и Хектор Хевел – поради злоупотреба на документи и прекршување на Дисциплинскиот кодекс. Играчите имаат аргентинско, шпанско, бразилско и холандско потекло, а Гарсес настапува за шпанскиот тим Алавес од Ла Лига.

Според објавеното, ФАМ поднела лажни документи до ФИФА за овие играчи да можат да играат за Малезија против Виетнам во третото квалификациско коло за Азискиот куп на 10 јуни.

Како резултат на тоа, Малезија ќе треба да плати казна од 350.000 швајцарски франци, додека секој од фудбалерите ќе мора да уплати по 2.000 франци.

Покрај финансиската санкција, сите седум играчи се суспендирани од фудбалски активности на период од 12 месеци од денот на објавувањето на одлуката. Оваа одлука може да се обжали пред Апелацискиот комитет на ФИФА.

Бразилскиот фудбалер и капитен на Пари Сен Жермен, Маркињос, го повреди левиот бутен мускул и нема да игра во наредните неколку недели, соопшти клубот од Париз.

ПСЖ не прецизираше кога Бразилецот ја добил повредата, иако тој одигра цел натпревар против Марсеј (1-0) во понеделникот, како и натпреварот од Лигата на шампионите минатата недела против Аталанта (4-0).

Маркињос така ѝ се приклучи на листата на повредени во која веќе се наоѓаат Осман Дембеле, Дезире Дуе и Жоао Невеш, кои се во процес на рехабилитација, се наведува во лекарското соопштение на клубот.

На утринскиот тренинг во петокот тие отсуствуваа, додека играчот од средниот ред Фабијан Руиз работеше одвоено од екипата. Бредли Баркола, кој имаше проблеми со бутниот мускул и поради тоа го пропушти дуелот со Марсеј, се врати во тренажен процес.

ПСЖ во среда ќе ја пречека Барселона во Лигата на шампионите, а веќе на 5 октомври ќе игра против Лил во Лига 1.

Возачот на Дукати, Франческо Бањаја, триумфираше во спринт трката на Големата награда на Јапонија, 17. рунда од овогодинешниот Мото ГП шампионат.

Акцијата во Мотеги продолжува во недела од 4 часот, а главната трка во „кралската класа“ ќе започне во 7 часот.

Бањаја на патеката „Твин Ринг Мотеги“ стигна до својата прва спринт-победа оваа сезона и прво саботно искачување на подиумот по Муџело, во јуни. Италијанецот водеше од старт до цел и задржа сигурна предност. Најблиску до него беше клупскиот колега Марк Маркес, кој е на  чекор до освојување на својата деветта шампионска титула. Маркес заостануваше речиси две секунди зад Бањаја, а исто толку беше пред Педро Акоста од КТМ рејсинг.

Единствениот ривал на Маркес во борбата за титулата, воедно и неговиот помлад брат Алекс, заврши дури на 10. место. Тоа значи дека на возачот на Дукати во недела за прва круна по шест години му е доволно да не загуби повеќе од седум бодови во однос на брат му. Без разлика на резултатот на Алекс, на Марк за титула би му било доволно и второ место.

Во саботата, целото внимание заслужено беше насочено кон Бањаја, кој прво беше неприкосновен на патот до пол-позицијата, а потоа блесна и во спринтот. Италијанецот веднаш поведе пред Жоан Мир на Хонда, Акоста и Маркес, и брзо успеа да се одвои, додека зад него се водеше голема битка.

Спринтот го одбележа и вистинска катастрофа за Априлија, откако Марко Беќеки и Хорхе Мартин ја завршија трката уште во првиот свиок. Мартин се обиде да напредува, но ја изгуби контролата при кочење и удри директно во својот клупски колега. Засега нема повеќе информации за нивната состојба, но охрабрувачки е што двајцата беа на нозе веднаш по инцидентот.