Спорт
Денот кога фудбалот и тенисот си заминаа од дома
Тешко е да ги разбереш Англичаните, а кога ќе ги разбереш, и да ги прифатиш. Баш онака како што тие не може да го прифатат остатокот од светот, надвор од Островот. Многумина ќе ги опишат како ладни, отуѓени, не многу пријателски расположени за дружење со некој новодојденец.
Но, така накусо ќе ги опишете и повеќето Скандинавци – Швеѓани, Данци и други северњаци. Сепак, има нешто специфично, посебно, што ќе го забележите само кај Англичаните, но не и кај спомнатите северни народи. Тоа се арогантноста и агресивноста. Особини што толку впечатливо можеа да им се забележат во однесувањето во неделата, на двата спортски настана што се одржуваа во Лондон – тенисот и фудбалот.
Арогантноста беше присутна на Вимблдон, а агресивноста на Вембли. Во заднина и на двете карактерни особини се крие фрустрацијата.
Фрустрација што некој друг може да биде подобар, посупериорен од нив, а тие во својот генетски код имаат запишано дека се најсупериорниот народ (и теоријата за супериорноста на расите е измислена и напишана од англиски биолози, антрополози, медицински научници).
Германскиот нацизам е само нејзината брутална операционализација. И како сега, со таков ментален склоп, да прифатиш дека во она за што сметаш дека е твое, дека тебе ти припаѓа, може да биде посупериорен некој што е надвор од твојот континет и твојата раса. Да биде тоа Новак Ѓоковиќ од омразената им Србија!?

Пред две години имав можност да го гледам во живо финалето токму на Ѓоковиќ против Роџер Федерер. Омразата на вимблдонската (англиската) публика кон Новак беше толку силна така што тоа се граничеше со социјална патологија.
И тогаш и сега имам впечаток дека тие, англиските навивачи, би прифатиле да навиваат за кој било друг тенисер од светот, па и да е од малигната Русија – Медведев или Качанов, само за да го видат Србинот како губи.
Да, Новак им е поголема закана за националната гордост и безбедност и од рускиот „новичик“ и од носачот на авиони „Кузнецов“ кога плови во близина на Ла Манш…
Па на самиот почеток на тенискиот турнир Англичаните беа на работ да почнат војна со Русија кога нивниот воен разурнувач провокативно вплови во руските територијални води во Црното Море. Сѐ е тоа ирелевантно и сѐ се заборава. Најважно е Ноле да биде клекнат на колена, па било тоа и од некој омразен Русин. Во неделата желбата им се исполни, но на најболниот за нив начин. Новак беше клекнат на колена. Но, за да јаде трева.
Во денот кога да се биде Италијанец во Англија не беше воопшто популарно, само во глави полни со фрустрација може да се случи во тениското финале здушно да навивате за Италијанецот Матео Беретини, а неколку часа подоцна неговите сонародници во фудбал да ви бидат омразениот непријател.
Ментална конфузија, која не може поинаку да се манифестира, освен преку агресија, а кога потребата од исфрлање од себе на таквата деструктивност не може да се насочи кон оној што го мразиш и потценуваш – во видното поле немаш ниту Србин ниту Италијанец, единствено што ти останува е анимално да почнеш да се давиш меѓу себе. И не беа тоа, како многумина ги нарекуваат, фудбалски хулигани.
Барем не како фудбалски хулиган, се подразбира кај нас во Македонија и пошироко во регионот – пред сѐ, тинејџери и повозрасни млади луѓе некаде до својата рана триесетта година. Тоа беа средовечни мажи од педесетина години, old school-хулигани, што би рекле „комитите“, стара гарда, кои со текот на годините ниту се смириле ниту се социјализирале.

Имам можност во Лондон дневно на улица да сретнувам таков профил луѓе – тоа се оној тип луѓе на кои од очите им се гледа дека во себе имаат некој голем притисок, кој секој момент може да експлодира во садизам и да почнат да тепаат и да претепуваат до смрт послаб од себе, легнат на земјата.
Само строгите закони против насилство и расизам во Англија ги држат под контрола овие луѓе за да не еруптира нивната агресивност. Но, штом затаи репресивниот апарат на државата, а се појави инстинктот на крдото, припадност на група, со која те поврзуваат двете карактерни особености – агресивност и фрустрација, веднаш ги имате сликите што во неделата цел ден ги гледавме на улиците на Лондон.
Англичаните многу (би градирал и најмногу) ѝ дале на современата светска цивилизација. И добро и лошо. Кога е во прашање спортот, тоа најмногу се согледува во сите најпопуларни спортови, кои светската популација ги гледа и навија.
Сите до еден се измислени токму во Англија и од Англичани. И природна е желбата така емотивно да се посакува „фудбалот да се врати дома“. Но, она со што Англичаните мора да се помират и да го прифатат е дека постојат и подобри од нив, креаторите на модерните спортски игри. Во фудбалот тоа го прифатија во неделата.
За тенисот останува наредниот Вимблдон кога и според силата на бројките, ќе мора да прифатат дека омразениот им Ѓоковиќ е најдобриот тенисер на сите времиња.
Стара е изреката – кого не можеш да го победиш, придружи му се. Нa некогашниот Perfidious Albion, перфидно трансформиран во „гордиот албион“, а сега од светот перципиран како Frustrated Albion, му претстои болен пат за да го спознае и направи она што најмалку сака да го направи: да се понижи и признае дека има подобар од него.
Строгата примена на законите е гаранцијата дека таа индивидуална и групна терапија ќе оди во општествено прифатливи рамки.
Од Лондон за „Топспорт“, Ненад Живановски
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Мектоминеј го запре Интер на „Џузепе Меаца“
Фудбалерите на Интер и Наполи одиграа нерешено 2:2 во дерби натпреварот од 20-то коло од Серија А.
Нероаѕурите не го искористија вториот последователен неуспех на Милан, кој ремизираше со Фиорентина. Наполи ја прекина серијата од шест последовни победи во која се наоѓаше Интер.
Македонскиот репрезентативец, Елиф Елмас, го одигра целиот натпревар, му аситираше на Скот Мектоминеј за првиот гол. Без сомнение ова беше најдобриот меч од почетокот на сезоната за Елмас. Според италијанските медиуми беше вториот најдобро оценет играч на Наполи, подобар од него беше само стрелецот на двата гола Мектоминеј.
Интер два пати водеше во дербито, но Мектоминеј не му дозовли да победи. Ди Марко го постигна првиот гол по девет минути игра, а изеднаши Шкотланѓанецот во 26-та.
Овој резултат се смени во 73-та минута кога Чалханоглу погоди од пенал. На пеналот му претходеше дуел меѓу рахмани и Мхитаријан, а судијата Довери досуди пенал по интервенцијата од ВАР собата. Поради неговата одлука бурно протестираше тренерот на Наполи, Антонио Конте, па доби црвен картон.
Осум минути подоцна, Мектоминеј изедначи на 2:2, откако ја следеше акцијата на Ноа Ланг. До крајот Интер имаше шанса за победа, но ударот на Мкитаријан во 95-та минута заврши во стативата.
Интер остана лидер на табелата со 43 поени, три повеќе од Милан и четири од Наполи и Рома.
Foto/ EPA
Спорт
(Видео) Барселона го одбрани трофејот во Суперкупот на Шпанија
Фудбалерите на Барселона го одбранија трофејот во Суперкупот на Шпанија. Во финалето, во Џеда, го победија најголемиот ривал Реал со 3:2.
Вечните ривали, одиграа добар меч и покрај тоа што во првите 30 минути, двата тима ги одработуваа тактичките замисли на своите тренери. Во тој период две солидни шанси имаше Реал, преку Винисиус и Гонзало Гарсија. Двајцата лошо шутираа, па на голманот на Барселона, Џоан Гарсија не му беше тешко да ги одбрани нивните удари.
Барселона првата шанса ја имаше во 35-та минута, Рафиња излезе сам пред Курота,но реализицијата на Бразилецот беше ужасна. Една минута подоцна, од многу потешка позиција Рафиња успеа да погоди.
Потоа лудница во петте минути од судиското надополнување на времето. Магичен потег на Винисиус за 1:1, брилијантна асистенција на Педри за Левандовски, чии прием и реализиција беа уште подобри и за крај гол на Гонзало Гарсија за 2.2.
Вториот дел не донесе возбудувања, имаше и еден лош период, кога играчите на двата тима со прекршоци ја сечее играта на противникот.
Моментот на одлука се случи во 730та минута, кога Рафиња со многу среќа втор пат го совлада Куртоа.
И потоа повотрно лудница во судиското надополнување на времето. Де Јонг поради груб старт врз Мбапе доби црвен картон. Рашфорд во 95-та минута имаше шанса да го реши мечот, биеше крај голот.
Во 96-та Карерас од 10 метри, не успеа да изедначи, ударот беше слаб и одеше директно во голманот на Барселона, а во 97-та минута, Раул Асенсио се обиде со глава, но и неговиот удар лесно го скроти Џоан Гарсија.
Foto/ EPA
Спорт
Крај на сезоната за Конор Бредли
Фудбалерот на Ливерпул, Конор Бредли, ја завеши сезоната, по повредата со која се здоби во четвртотокот, против Арсенал (0:0). Дефанзивецот ќе мора да го оперира повреденото колено на левата нога, објави денес шампионот на Англија.
„Бредли заработи повреда на коленото во последните минути од натпреварот од Премиер лигата на гостински терен против Арсенал во четвртокот навечер. Бредли ќе биде опериран во наредните денови, а потоа ќе започне период на рехабилитација. Во оваа фаза од процесот, не е одреден временски рок за негово враќање во игра“, се вели во соопштението на Ливерпул.
Англиските медиуми објавија дека сезоната е завршена за 22-годишниот десен бек.
Потврдата за сериозноста на повредата на Бредли дојде по инцидентот во судиското продолжение. Напаѓачот на Арсенал, Габриел Мартинели, го турна дефанзивецот додека тој лежеше повреден на теренот, непосредно пред да биде изнесен на носилки.
На Мартинели му беше покажан жолт картон од судијата Ентони Тејлор, а потегот на бразилскиот крилен напаѓач беше жестоко критикуван од јавноста и предизвика гнев кај играчите на Ливерпул.
Подоцна кога дозна за сериозноста на повредата на ривалот, Мартинели јавно се извини за непримерниот гест.

