Косово успеа да стигне до ново олимписко злато, второ во Токио, откако Нора Ѓакова ја следеше Дистри Красниќи до злато во натпреварувањето во џудо победувајќи во категоријата до 57 килограми.

Ѓакова стигна до златото откога нејзината француска противничка Сара Леони Сисик беше дисквалификувана поради удар со глава.

И Хрватска може да се пофали со злато по понеделничките натпреварувања откако Матеа Јелиќ беше најдобра во теквондо во категоријата до 67 килограми победувајќи ја Британката Лорен Вилијамс со 25:21. Тони Канает донесе бронза за Хрватска во истиот спорт откако во категоријата до 80 килограми во борбата за третото место го победи Узбекистанецот Никита Рафалович.

Словенците, пак, го слават својот херој Бенјамин Савшек, кој го освои првото злато за својата земја во кану на диви води победувајќи ги ривалите со неверојатна предност од 4 секунди. Лукаш Рохан од Чешка освои сребро пред Германецот Сидерис Тасаидис.

Со оваа победа Савшек стави крај на доминацијата на Словачка и Франција во дисциплината откако тие две земји ги дадоа сите олимписки шампиони од ОИ во Атланта во 1996 година.

Барселона и Нејмар, конечно, ставија крај на својата долга легална битка на „пријателски начин“, открива каталонскиот гигант, по четири години „влечење“ на суд.

Поранешниот фудбалер на Каталонците, а сега ѕвезда на Пари Сен-Жермен, беше во конфликт со Барселона по трансферот од 222 милиони евра (уште е светски рекорд) во 2017 година. Тој тврдеше дека не му се исплатени бонусите за лојалност и покрај заминувањето од „Ноу Камп“, додека Барселона тврдеа дека тој го прекршил договорот.

„Барселона објавува дека става крај на судскиот процес со Нејмар да Силва Сантош Жуниор на пријателски начин“, објавија Барса на својот веб-сајт.

Менаџерската компанија на Нејмар тврдеше дека тој и неговиот татко Нејмар Сениор треба да добијат 43.6 милиони евра како дел од договорот потпишан во 2016 година, според клаузулата за лојалност. Во јуни 2020, судот во Каталонија пресуди во корист на Барселона, наредувајќи му на Нејмар да плати 6.7 милиони евра на својот поранешен клуб. Сега, сите спорови меѓу двете страни се завршени.

Манчестер јунајтед се пред потпишување на договор со дефанзивецот на Реал Мадрид, Рафаел Варан, јавуваат повеќе англиски и шпански медиуми, со што на Оле Гунар Солскјер ќе му се оствари желбата за засилување на одбраната.

Според експертот за трансфери, Фабрицио Романо, францускиот репрезентативец веќе се договорил за личните услови со „ѓаволите“ и ќе биде второ големо засилување за Јунајтед по пристигнувањето на Џејдон Санчо од Борусија Дортмунд.

28-годишниот Варан ќе ги чини „ѓаволите“ околу 50-тина милиони евра, што е голема сума ако се смета дека тој има само уште една година од договорот со Реал, но ги одби преговорите за продолжување.