Спорт
Домашен настап и Светско Првенство – Даниела Алексоска сo 2 борби во 13 дена

Даниела Алексоска ќе влезе во кафезот двапати во рок од само 13 дена.
На 14-ти септември ја очекува борба против Флaцеа Алда од Молдавија, на спектакуларниот настан ARMMADA 14, кој ќе се одржи во Скопје, во Јане Сандански Арена, со почеток од 19:30 часот. Ова ќе биде нејзиното прво појавување пред домашната публика.
Веднаш потоа, на 27-ми септември, Алексоска ќе ја претставува Македонија на Светското ММА Првенство во Тбилиси, Грузија, во категорија 52.2 кг, каде е рангирана како #3 во светот, благодарение на својата доминација и освоеното злато на Европското ММА Првенство.
„Ваквиот подвиг е толку редок што дури и на најголемата светска ММА сцена – UFC – само неколикумина борци, како Доналд “Cowboy” Сероне и Хамзат Чимаев, се осмелиле да прифатат толку голем предизвик“, велат од Македонската ММА Федерација.
Додаваат дека она што Алексоска ќе го направи – борба пред домашната публика на најголемиот ММА настан во историјата на Македонија, а потоа светско првенство за само две недели – ја прави единствената на Балканот што прифатила ваков предизвик на толку високо ниво.
Алексоска веќе има историја на тестирање на сопствените граници. Минатата година (2024), на 2-ри ноември, таа го освои златниот медал на престижното АДЦЦ Јужноевропско Првенство во Белград, Србија, а само три дена подоцна настапи на Светското ММА Првенство во Ташкент, Узбекистан, каде успеа да се закити со бронзен медал.
Ова е доказ за храброст, и професионализамот на Даниела, и нејзиниот тим “The Strongest”.
Билетите за ARMMADA 14 се достапни на ticketx.com.mk.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Атлетико ќе се обиде да го сопре залетаниот Реал во градското дерби

Мадридското дерби меѓу Атлетико Мадрид и Реал Мадрид ќе ја раздвижи шпанската престолнина денеска, кога двата гиганти ќе се сретнат на стадионот „Ер Метрополитано“. Натпреварот од седмото коло на Ла Лига започнува во 16:15 часот и се очекува да биде еден од најинтересните судири на почетокот од сезоната.
Тимот на Диего Симеоне ќе се обиде да го сопре залетаниот противник, кој досега покажува импресивна форма во првенството. Реал Мадрид доминира од самиот старт, заземајќи го првото место со максимални 18 бода од шест натпревари и импресивна гол-разлика од 14-3.
Од друга страна, Атлетико Мадрид се наоѓа на осмото место со девет бода, со две победи, три реми и еден пораз во првите шест кола.
Атлетико Мадрид демонстрира нестабилност, што веќе го оддели тимот од Реал Мадрид и Барселона. Избраниците на Диего Симеоне направија чекор во вистинска насока пред неколку дена со важна победа над Рајо Ваљекано (3-2), во меч во кој Хулиан Алварез блескаше со хет-трик. Претходно, тие ремизираа со Мајорка (1-1), а во Лигата на шампионите претрпеа драматичен пораз во финишот од Ливерпул со 2-3.
Реал Мадрид е во одлична форма со пет последовни победи во сите натпреварувања. „Кралевите“ го разбија Леванте како гости (1-4), претходно победија Еспањол (2-0), а во Лигата на шампионите го совладаа Марсеј (2-1).
Во Ла Лига, „кралскиот клуб“ забележа уште две победи, над Реал Сосиедад (2-1) и над Мајорка (2-1).
Спорт
Христов: Сакаме да продолжи позитивната серија на Македонија ЃП

Екипата на Македонија ЃП на последните четири меча во домашниот шампионат има три победи и еден пораз. Во текот на оваа серија совладани се Пелистер, Брера и Шкупи додека единствениот неуспех беше на гостувањето против Вардар.
Благодарение на победничката низа „лавовите“ полека но сигурно се искачуваат на табелата со девет освоени бода и во моментов се на шестата позиција.
Денеска Македонија ЃП ја очекува нов предизвик. Во Кавадарци од 15:00 часот се среќава со екипата на Тиквеш. Нема лесни противници, нема лесно освоени бодови на ниту еден терен. Македонија ЃП тоа почувствува на минатонеделното гостување кај Шкупи. На тој меч рано постигнатиот гол за водство ја олесни задачата.
„Планот е сличен и за денешниот дуел. Максимална концентрација, ангажираност од првата секунда. На време постигнат гол, контролирање на ситуацијата. Подготвени сме. Имаме добра атмосфера во тимот, победите си го прават своето. Максимален респект за противникот, Тиквеш е квалитетен тим. Неговата позиција на табелата не е реален показател на силата на овој тим. Како што на пример не беше ни нашата на стартот на шампионатот. Добрата работа, тренинзите, вложувањето на терен секогаш го даваат резултатот. Ако правиме се како што треба, бодовите нема да изостанат“ – вели искусниот Симеон Христов.
Спорт
Арсими посакува победа против последнопласираниот Шкупи

Во осмото коло од Првата македонска фудбалска лига, Арсими ќе го пречека составот на Шкупи. Натпреварот има големо значење за домашниот тим, Арсими сака да се врати на победничките патеки по незгодниот пораз од Брера во Струмица додека Шкупи е во серија на лоши резултати и бара излез од кризата.
Дуелот во Гостивар е одлична можност за домашната екипа да освои значајни бодови во трката за подобра позиција на табелата.
Еден од носителите на играта на Арсими, Башким Велија, е полн со оптимизам и решителност пред оваа средба.
„Нормално е што сме разочарани што не ја совладавме Брера, затоа што не реализиравме многу шанси. Но, фудбалот е таков ,мора да гледаме напред. Сега не очекува противник како Шкупи, знаеме дека тие се во криза, но ние ќе излеземе на терен само за победа. Сакаме да фатиме победнички ритам и да ги покажеме нашите вредности”, изјави Велија.
Фудбалерот на Арсими потенцираше дека атмосферата во екипата е позитивна и дека сите играчи се подготвени да дадат максимум.
„Имаме добра енергија во екипата и сите сме фокусирани на истата цел. Со поддршка од публиката верувам дека можеме да дојдеме до посакуваниот резултат”, додаде Велија.
Арсими сезонава покажа борбеност, но честопати резултатите не го отсликуваа вложениот труд. Затоа дуелот со Шкупи се гледа како вистинска прилика тимот да ја врати самодовербата и да им подари радост на навивачите. Средбата ќе се одигра на Градскиот стадион во Гостивар со почеток од 15:00 часот.