Спорт
Ексклузивно интервју со Калин Ивановски: Верувам дека в недела можам да го освојам Вимблдон
Од Лондон, Ненад Живановски
Калин Ивановски, осумнаесетгодишниот русокос скопјанец, веќе втора година по ред како единствен ја претставува Македонија на најпрестижниот тениски турнир во светот, Вимблдон. И тоа добро го прави. Минатата година стигна до осминафиналето во јуниорска конкуренција, а денеска тој успех го надмина со пласман во четврт-финалето. Меѓутоа, оваа година амбициите му се многу поголеми – сака да одигра што повеќе мечеви, па и да заигра во неделното финале.
„Се чувствувам самоуверено, имам самодоверба и кој и да ми дојде до финалето, верувам дека ќе можам да го победам со мојата игра, која се темели на сигурни сервиси, бекхенди и форхенди. Мислам дека ги имам сите удари и можам да победам било кого до неделното финале. Единствен противник можам да бидам сам на себе и тоа да ме спречи да го остварам зацртаното. Сепак, верувам дека оваа година можам да го освојам Вимблдон во јуниорска конкуренција“.
На патот до финалето, на Калин му претстојат уште два меча. Утрешниот противник во четфртфиналето му е Шпанецот Педро Роденас, добар познаник на нашиот репрезентативец.
„Пред два дена тренирав со него. Знае да игра, има опасен сервис, не можеш да го читаш толку лесно… Згора на тоа е и левучар и има рамен бекхенд, што на тревнат терен знае да биде незгодно бидејќи топчето не отскокнува како на другите подлоги“.

За претходните мечеви на турнирот, кои за гледачите изгледаа дека релативно лесно ги добива, Калин ги објаснува на следниот начин:
„Првиот меч кога играв против домашниот претставник Лука Поу, вообичаено имав трема, затоа што е прв настап, додека се снајдеш ти треба време да се загрееш. Изгубив сет и гем и дури тогаш се смирив и најдов решение со поагресивна игра да продолжам да играм. Третиот сет веќе играв моја игра, опуштено и го добив последниот сет со 6-2. Во второто коло, против Мексиканецот Родриго Мендес, кој иако е 11-ти носител, влегов како фаворит, а така покажа и резултатот, 6-1 и 6-2. Денеска играв против осмиот носител, Литванецот Едас Бутвилис, кој има доста добри резултати оваа година, стигна до осминафинале на Австралија Опен и трето коло на Ролан Гарос. Со него сум играл повеќе пати, и досегашниот резултат е 4-1 за мене“.
Статистиката од првите два меча покажува интересна коинциденција, и во двата натпревари Калин имаше ист број на асови – по девет и по 35 „винери“, што го наметнува прашањето кој сегмент во играта му е најквалитетен?
„Сервисот и првата топка. Генерално ги правам поените со форхенд, но и бекхендот ми е солиден со кого можам да направам поен. Исто така, доста сум креативен во играта, за противникот во секој момент можам непредвидливо да изиграм и да го сменам ритамот“.

Кога правиме рекапитулација за досегашните настапи на Вимблдон, не можеме да го одминеме и моментот од мечот против Мендес, кога победничкиот поен и воедно ас, Калин го отсервира во стилот на Ник Кириос со твинер сервис. Овој поен не остана незабележан и од страна на организаторот на Вимблдон, така што снимката беше објавена и на официјалната Инстаграм страница на Вимблдон (https://www.instagram.com/p/CfottSQDqrt/), и со 45 илјади лајкови е за 20 илјади повеќе од првата наредна снимка со кралските наследници Принцот Вилијам и Принцезата Кејт Мидлтон.
„Искрено, не го направив тоа за да го имитирам Кирјос, бидејќи не сум негов фан. Едноставно, водев 6-1 и 5-2, бев опуштен и си викам ајде ќе го пробам на меч топка, па, да видиме како ќе испадне“.
Ако не Кирјос, тогаш кој му е омилен тенисер од повозрасните колеги?
„Новак Ѓоковиќ. Најмногу затоа што е ментално силен. И не се срами да покаже дека има став. Баш го има она нашето, балканското. Надал сите го сакаат, но тој е мирен, нема таков темперамент како Ѓоковиќ. Друго се тие од Шпанија, друго сме ние од Македонија, Србија, Хрватска. Затоа најмногу ми се допаѓа Ноле. Секако дека ми се допаѓаат и Надал и Федерер како играат, но Ноле ми е најомилен“.
Нема сомнеж дека на Калин му претстои блескава иднината во тенисот, која во недела може преку ноќ да му постане стварност и да го лансира во тениското соѕвездие. Но, и ако тоа не се случи, тој цврсто верува дека евентуалниот неуспех нема да го поколеба да верува во себе или да потклекне пред разните искушенија кои ги носи младоста.
„Тенисот ми е приоритет во животот. Не знам што друго би правел, ако не играм тенис. Така што, нема опасност интересот да ми отиде во некоја друга насока “.

А, и вистинска штета би било тоа, ако се има во предвид колку години посветил на тенисот, од какви сè задоволства се откажувал во детството за да дојде до денешната позиција да важи за еден од фаворитите на Вимблдон. Затоа, на крајот, се навративме на почетокот:
„Јас почнав да играм тенис на четири години. Пред тоа играв фудбал, но бидејќи сестра ми тренираше тенис и јас се префрлив на него. Сериозно почнав да тренирам на девет години, кога се преселив во Виена, каде имав два тренери Иван Галиќ и Вјеран Фришчиќ. На 12 години отидов во близина на Кан во Франција, на академијата Муратоглу и таму останав две години. Потоа се преселив во Сплит, Хрватска и таму останав една и пол година со тренерот Марин Брадариќ. Од Сплит се преселив во Загреб и го сменив тренерот со Иван Цинкуш, кој пред мене му беше тренер на Марин Чилиќ, а и сега му е тренер. Мојот сегашен тренер, е поранешен тренер на Бернард Томиќ, Зофко“ – го заврши Калин, како што ни објасни, своето прво интервју на Вимблдон.
Го очекуваме второто-победничко, в недела!
Текст и фото од Вимблдон: Ненад Живановски
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Шкендија и покрај поразот во Ларнака се пласира во плејофот
Шампионот на Македонија, Шкендија, избори пласман во плејофот, во Конференциската лига. Вечерва Шкендија, доживеа минимален пораз во Ларнака, од АЕК (1:0), но некои од резултатите на останатите дуели беа во полза на екипата од Тетово, па на табелата го освои 22-то место.
Шкендија одигра добро прво полувреме во Ларнака, во кое во финишот, по интервенцијата од ВАР собата, му беше поништен гол на АЕК. Проблемите за Шкендија започнаа во 50-та минута кога Латифи доби директен црвен картон.
Со играч помалку, одбраната на Шкендија капитулираше во 82-та минута, кога единствениот гол го постигна Ангиелски.
Шкендија првата фаза ја заврпи со две победи, три порази и еден нерешен дуел и гол разлика 4:5.
Токму поради гол разликата зад Шкендија, со ист број на бодови Зрињски, Сигма Оломуц, Универзитатеа Крајова и Линколн.
Foto/ EPA/GEORGI LICOVSKI
Спорт
Аморим побарал да му донесет еден играч во Манчестер Јунајтед
Фудбалерот на Ал Хилал, Рубен Невеш, повторно е во центарот на вниманието, откако Рубен Аморим побара од Манчестер Јунајтед да го реализира неговиот трансфер во јануарскиот преоден рок.
Португалскиот тренер сака да го засили средниот ред со играч што добро го познава и го смета за клучен за неговиот проект.
Невеш моментално игра за Ал-Хилал. Желбата на играчот е да се врати во една од врвните европски лиги. На „Олд Трафорд“, веќе почнале да ги разработуваат сите можни сценарија.
Аморим и Невеш добро се познаваат и имаат одличен однос, што би можело да го олесни трансферот.
Исто така, самиот играч има желба да се врати во Европа, па сè укажува на тоа дека ќе се пресели на „Олд Трафорд“ оваа зима.
Foto/ depositphotos
Спорт
(Видео) Хојлунд го однесе Наполи во финалето на Суперкупот
Актуелниот италијански шампион Наполи, со победата 2:0, над бранителот на трофејот во Супер купот, Милан, избори пласман во финалето на ова натпреварување. Данскиот репрезентативец, Расмус Хојлунд го обележа првото полуфинале, на турнирот чии домаќин е Ријад.
Наполи не блескаше, но и тоа беше доволно да забележи сигурна победа над индиспонираниот Милан. Македонскиот репрезентативец Елиф Елмас, повторно беше стартер за тимот на Наполи, одигра солиден натпревар. На теренот беше до 77-та минута, кога на теренот влезе Ноа Ланг.
Инаку, првиот гол во 39-та минута го постигна Давид Нерез, по додавањето од Хојлунд. Брилијантната партија Данецот ја круниса со гол во 63-та минута.
Наполи в финалето го чека победникот од утрешното полуфинале меѓу Интер и Болоња.
Foto/ depositphotos

