Спорт
Ѓоковиќ и Руд во битка за трофејот во Торино
Во битката за трофејот на АТП финалето во Торино (19 часот) ќе се сретнат најдобриот српски тенисер Новак Ѓоковиќ и Норвежанецот Каспер Руд.
Против младиот Норвежанец, Ѓоковиќ ќе се обиде да ја освои шестата титула на завршниот турнир во сезоната и да се израмни со Роџер Федерер на врвот на вечната листа.
Ѓоковиќ со сите четири победи стигна до финалето, а вчера во полуфиналето по голема борба го совлада Американецот Тејлор Фриц со 7:6 (7:5), 7:6 (8:6).
„Морав да се борам за да преживеам. Не се чувствував многу удобно. По тешката битка против Медведев, знаев дека ќе ми треба време да се адаптирам, да најдам динамично движење против Фриц, еден од најдобрите сервери на турнирот. Морав да бидам многу трпелив. Вториот сет не го започнав добро, но успеав да го скршам. Мислам дека не одиграв многу добро, но доволно добро се држев“, изјави Ѓоковиќ.
🏆 The season’s grand finale 🏆#NittoATPFinals pic.twitter.com/kmxjOjb6zG
— ATP Tour (@atptour) November 19, 2022
Во групата, Руд загуби само од Рафаел Надал, во меч кој немаше никакво значење бидејќи претходно обезбеди полуфинале, а во финалето стигна со убедлива победа против Русинот Андреј Рубљов со 6:2, 6:4.
Норвешкиот и српскиот тенисер досега играа три пати и сите три меча ги доби Ѓоковиќ, без загубен сет, вклучувајќи го и дуелот во Торино минатата година.
Турнирот во Торино се игра за награден фонд од 14.750.000 долари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Алан Ширер не може да поверува како изгледа играта на Манчестер јунајтед
Легендарниот англиски фудбалер Алан Ширер никогаш не играл во Манчестер јунајтед, изгради блескава кариера во Саутемптон, Блекбурн и Њукасл, но не може да го гледа она што се случува со тимот од „Олд Трафорд“.
Еден од најдобрите напаѓачи на англиската репрезентација во историјата изјави дека играта на „црвените ѓаволи“ не постои, дека нивните натпревари се негледливи и дека играчите треба да покажат малку поголема одговорност.
„Што е ова? Дали некој знае што точно игра Манчестер јунајтед? Овој тим нема идеа, нема план и тоа што го игра е неспособно и очајно“, изјави Ширер по поразот на Манчестер јунајтед од Тотенхем (0:3).
„Играчите се тие кои треба да покажат многу поголема одговорност. Не можат секоја недела да се кријат зад тренерот Ерик тен Хаг и критиките упатени кон него. Неопходно е да се разбудат и да покажат дека заслужуваат да го носат дресот на овој клуб. Манчестер јунајтед е голем клуб, вакви работи не смеат да се случуваат“.
Манчестер јунајтед моментално ја зазема 12-та позиција на табелата во англиската Премиер лига, откако по шест кола освои само седум бода.
Спорт
Легендата на Реал, Предраг Мијатовиќ, го критикува Куртоа
Легендата на Реал Мадрид, Предраг Мијатовиќ го критикуваше голманот на Тибо Куртоа.
Токму Белгиецот беше во центарот на вниманието на дербито со Атлетико (1:1), бидејќи беше нападнат од ултрасите на Атлетико.
Куртоа со начинот на кој го прослави голот на Едер Милитао, а потоа и со уште неколку провокации им го крена „притисокот“ на ултрасите“ кои започнаа да фрлаат со запалки и други предмети, поради што натпреварот беше прекинат 15 минути.
„Нема оправдување за она што го направија навивачите, но мислам дека играчите мора да се однесуваат правилно. Не смеат да провоцираат или да вртат грб, не смеат да провоцираат. Камерите се на секој чекор, фудбалерите се препознатливи. Доколку се однесуваат така, не смеаат да стапнат на фудбалскиот терен“, рече Мијатовиќ.
Инаку, Реал поведе со голот на Едер Милитао во 64. минута, а Анхел Кореа му донесе бод на Атлетико во петтата минута од судиското надополнување.
Спорт
Панчев: Најголемата грешка во кариерата ја направив кога потпишав со Интер
Легендарниот играч на Црвена звезда Дарко Панчев уште еднаш истакна дека направил голема грешка кога решил да се пресели во Интер.
Панчев во 1992 година замина во Интер каде постигна само три гола, а во 1995 година се пресели во Фортуна Диселдорф.
„Секако, тоа воопшто не е спорно. Не само што Интер тогаш имаше неквалитетен тим, без игра, особено за нас напаѓачите. Ниту клупската атмосфера не беше во ред. Јас тоа на некој начин го почувствував. Не дојдов таму како млад играч па да морам да се докажувам, туку како еден од најбараните напаѓачи во Европа. Релативно брзо се скарав со тренерот и клупските челници“, изјави Панчев за „Спортски Журнал“.
Откри дека тогаш имал понуди и од други клубови.
„Во тоа време бев меѓу најбараните напаѓачи во Европа. Имавме преговори со Барселона, чиј тренер беше Јохан Кројф. Ме бараше и Алекс Фергусон во Манчестер јунајтед. Потпишав преддоговор со Милан. Реал Мадрид беше заинтересиран и нејзиниот претседател Рамон Мендоза доаѓаше на преговори. Имав избор, а јас ја одбрав најлошата варијанта. Никој не ми е виновен. Одговорноста е моја“, додаде Панчев.
Панчев кариерата ја заврши во 1997 година во Сион.