Светското првенство во 2034 година со 48 репрезентации би можело за прв пат во историјата да се одржи во јануари, пишуваат британските медиуми.

Тој турнир треба да го организира Саудиска Арабија, која е најголемиот фаворит на Светската фудбалска федерација (ФИФА). Засега Светското првенство се уште е предвидено да се одржи во јуни и јули, но во тој период од годината во овој дел од светото температурите надминуваат 40 степени.

Покрај тоа, во тој период е Рамазан, верски празник кој го слават муслиманите ширум светот.

„Доколку саудиските власти не дозволат да не се одржи големиот верски фестивал, што се смета за малку веројатно, турнирот ќе се игра во јануари“, пишуваат Англичаните.

Извесно е дека ФИФА добро ќе ја анализира ситуацијата и веројатно ќе посегне по решение како пред две години кога Светското првенство во Катар го префрли во зимскиот термин.

Следното Светско првенство во 2026 година се одржува во САД, Мексико и Канада, во 2030 година ќе се игра во Шпанија, Португалија и Мароко, а по еден натпревар ќе се игра во Уругвај, Аргентина и Парагвај со што ќе биде обележан јубилејот, 100 години од првиот Мундијал.

Фудбалерите на Лестер го победија Вест Хем со 3:1 на „Кинг Пауер“ стадионот на дебито на Руд ван Нистелрој.

Во втората минута 37-годишниот ветеран Џејми Варди го доведе Лестер во водство.
Вториот гол го постигна асистентот на првиот гол, 20-годишниот Мароканец Билал Ел Ханус во 61. минута. Сите дилеми околу конечниот победник ги реши Патсон Дака во 90. минута.

Почесниот гол, за Вест Хем во 90+3. минута го постигна германскиот репрезентативец Никлас Филкруг.

Лестер ја прекина лошата серија поради која Стив Купер доби отказ. „Лисиците“ славеа по шест неуспеси, а ова за нив е најубедливата победа на домашен терен сезонава во Премиер лигата.

Со овие три бода „лисиците“ избегаа од групата на најзагрозени екипи и сега се на 15. место со 13 бода, само два помалку од Вест Хем кој е една позиција погоре на табелата.

Во следното коло в недела, на 8 декември, Лестер повторно е домаќин, овојпат против Брајтон, додека Вест Хем ден подоцна ќе го гостува во Вулверхемптон.

Далас Маверикс на домашен терен го совлада Мемфис Гризлис со 121:116, а Денвер Нагетс ги победија Голден Стејт Вориорс со 119:115, во рамките на НБА лигата.

Српскиот репрезентативец Никола Јокиќ одигра уште еден феноменален меч, заврши со 38 поени (14/24), 10 скока, шест асистенции и пет украдени топки.

Натпреварот беше неизвесен до самиот крај, во последните две и пол минути Вориорс влегоа со +6 (109:115). Следеше серијата на Денвер за победа од 10:0, која Јокиќ ја започна и ја заврши од линијата за слободни.

Покрај српскиот кошаркар, се истакнаа Мајкл Портер Јуниор со 22 поени, седум скока и две асистенции, Арон Гордон со 15 поени, девет скока и пет асистенции.

Двоцифрени беа и Џамал Мареј со 12 поени, три скока и седум асистенции, како и Кристијан Браун со 11 поени, шест скока и две асистенции.

Кај Вориорс најдобар беше Стеф Кари, кој оствари дабл-дабл со 24 поени, седум скока и 11 асистенции, а го следеше Џонатан Куминга со 19 поени, пет скока и две асистенции. Ендрју Вигинс, Брандин Подзиемски и Мозес Муди постигнаа по 13 поени.

Далас Маверикс до победата над Мемфис ги предводеше словенечкиот репрезентативец Лука Дончиќ со дабл-дабл учинок. Тој постигна 37 поени, со 12 скока и четири асистенции.

На три минути до крајот Гризлис имаа +8 (103:111), по што следеше серија на Далас од 13:0.

Покрај Дончиќ се истакна Пи-Џеј Вашингтон 18 поени, осум скока и седум асистенции, додека Дерек Лајвли имаше дабл-дабл со 17 поени и 11 скока.

Кајри Ирвинг имаше многу лоша партија, постига 10 поени со 3/14.

Кај Мемфис Гризлис се истакна Џа Морант со 31 поен, два скока и четири асистенции, а го следеше Демсонд Бејн со 19 поени со по три скока и асистенции.

Двоцифрени постигнаа и Џерен Џексон Јуниор со 16 поени и седум скока, како и Санти Алдама со 15 поени, осум скока и три асистенции.