Барселона, по практично загубените шанси да ја брка титулата во Ла лига и елиминацијата од Лигата на шампионите, нема да има можност да ја брка ниту титулата од Копа дел реј, откако во драматична завршница по продолженија загубија со 3:2 од Атлетик Билбао во четврт-финалето.

Домаќините дојдоа во водство по само две минути игра кога Икер Мунаин по една брз контранапад на Нико Вилијамс постигна прекрасен гол за совршен старт на „Сан Мамес“. Одговорот на Барса пристигна во 20. минута, кога најновото засилување на Каталонците, Феран Торес постигна исто толку убав гол, својот прв во дресот на „Блауграна“.

По повеќе шанси на двете страни, во 85. минута, кога по еден слободен удар и мешаница пред голот на Тер Штеген, Ињиго Мартинез ја смести топката во мрежата за делириум на трибините. Кога се мислеше дека Атлетик ја има победата, во 93. минута по една акробатска реакција на ветеранот Дани Алвеш, Педри постигна убав гол за 2:2 и за продолженија.

Во продолженијата, Атлетик добија пенал во 105. минута, кога Жорди Алба играше со рака во шестнаесетникот, а Муниан прецизно го реализираше ударот од белата точка.

Muniain's penalty goal. 💔
pic.twitter.com/KCVqYwPAja

— BARÇA WORLD (@BarcaWorld99) January 20, 2022

Теми Абрахам имаше една асистенција и го постигна својот 15. гол во дресот на Рома оваа сезона, за да го предводи тимот на Жозе Мурињо до камбек 3:1 победа над второлигашот Лече во осминафиналето на Копа Италија.

Артуро Калабрези ги шокираше Рома во 14. минута од мечот за неочекувано водство на Лече, пред во 40. минута, Абрахам да му асистира на Мараш Кумбула за израмнување. Пласманот во четврт-финалето беше обезбеден преку Абрахам во 54. минута од мечот, по што замената Елдор Шомуродов ги постави конечните 3:1 во 81. минута од дуелот.

„Награда“ за пласманот во четврт-финалето за Мурињо ќе биде домашен меч со неговиот поранешен клуб Интер, кому славно му ја донесе тројната титула пред повеќе од една деценија.

Ливерпул стигна до 2:0 победа над Арсенал во вториот меч од полуфиналето на Англискиот лига куп, што значи дека по 0:0 на „Енфилд“, тие ќе патуваат на „Вембли“ на финалето против Челси во борба за првата англиска титула оваа сезона.

Човек на одлука во тимот на Јирген Клоп, во отсуство на африканските фудбалски ѕвезди Мохамед Салах и Садио Мане беше Португалецот Диого Жота, кој ги постигна двата гола за „црвените“ на „Емирати“.

Тој прво во 19. минута по асистенција на Трент Александер-Арнолд го отвори резултатот, за во 79. минута од мечот, да ја избегне офсајд-стапицата од „топчиите“ за да го потврди големото финале. Челси стигна до финалето откако во полуфиналниот двомеч го елиминираше Тотенхем.