На десет недели до почетокот на Олимписките игри во Токио расте притисокот на јавноста во земјата Игрите да бидат повторно одложени или откажани.

Последни кои го кренаа гласот против одржувањето на олимписките игри се јапонските лекари. Националното здружение на јапонските лекари ги повика организаторите да ги одложат Игрите.

„Болниците се преполни, а земјата сè потешко се бори со коронавирусот“, стои во барањето на лекарите.

„Ги повикуваме власите да разговараат со Интернационалниот олимписки комитет. Во овие услови невозможно е Игрите да бидат одржани. Доаѓањето на преку 20.000 луѓе само ќе го зголеми ризикот од ширењето на заразата“, се вели во писмото кое лекарите го испратиле до јапонската влада.

Писмото го потпишале повеќе од 6.000 јапонски лекари.

Токио се наоѓа во вонредна состојба, која е продолжена до 31 мај. Последните истражувања покажале дека преку 80 отсто од Јапонците бараат Игрите да се одложат или да бидат целосно откажани.

Ерик Кантона е примен во Куќата на славните, на англиската Премиер лига. Францускиот ас е еден од шестмината кои во Куќата на славните влегоа со гласовите на навивачите и стручното жири. Први кои добија место во Куќата на славните на Премиер лигата беа Алан Ширер и Тиери Анри.

„Горд сум и среќен, но морам да кажам дека не сум изненаден“, рекол легендарниот фудбалер на Манчестер јунајтед и дополнил.

„Ќе бев изненаден доколку не бев избран. На листата имаше 30 имиња. Ако некого требаше да изберат тогаш тоа сум јас. Останатите се одлични, јас сум извонреден“.

Ерик Кантона, во Премиер лигата играл за Лидс јунајтед и Манчестер јунајтед. Во Премиер лигата одиграл 156 натпревари, постигнал 70 голови. Со Манчестер јунајтед освоил четири шампионки титули.

Commanding and charismatic, a master of counter-attacking football and one of the greatest players the Premier League has seen

👑 Eric Cantona is inducted to the #PLHallOfFame pic.twitter.com/skAujPOxFa

— Premier League (@premierleague) May 18, 2021

Арбитражниот суд во САД пресудил дека Тајсон Фјури пред ,ечот со Ентони Џошуа, мора да се бори со Дионте Вајлдер.

Фјури, на социјалните мрежи, вчера потврди дека борбата за апсолутен шампион во тешка категорија, со Џошуа, ќе се одржи на 15.август во Саудиска Арабија.

Фјури е шампион во верзијата ВБЦ, а Џошува е шампион во верзиите на ИБФ, ВБО, ВБА, ИБО.

Фјури и Вајлдер има потпишан договор за три борби. Фјури забележа победа во првиот меч, одржан во февруари минатата година. Реваншот закажан за јули 2020 година не се одржа поради пандемијата на коронавирусот. Фјури потоа се откажа од борбата, неговиот тим ги започна и успешно ги заврши преговорите со тимот на Џошуа.

Случајот заврши на Суд, а судијата Даниел Вејнштајн, пресудил дека борбата помеѓу Фјури и Вајлдер мора да се одржи пред 15. септември, односно дека Вајлдер има право на третиот меч.. Доколку Фјури се откаже од таа борба тогаш ќе мора да плати милионско обесштетување.

Кога сме веќе кај парите, од мечот во Саудиска Арабија, закажан за 14.август, Фјури и Џошуа ќе заработат по најмалку 150 милиони долари.