Вечното дерби меѓу Партизан и Црвена Звезда пред 16.000 гледачи заврши со поделба на бодовите, 1:1 во рамки на 9. коло од српската Суперлига.

На почетокот на мечот Звезда беше порасположена за надигрување, Катаи и Диониј се заканија, но сигурен беше домашниот голман Поповиќ.

По почетниот притисок, „црно-белите“ создадоа неколку шанси, а по една бравура на Бибарс Натхо во 36 минута на семафорот стоеше 1-0. Натхо го измами својот чувар по десната страна и откосо биеше на прва статива за радост на публиката на стадионот.

На почетокот на вториот дел уште еднаш се затресе мрежата на гостите. Вујачиќ шутираше, голманот Борјан кратко одби, а Рикардо Гомеш ја испрати топката во мрежата. Сепак голот е поништен по ВАР сигнализација затоа што имало офсајд.

Првпат во историјата на вечното дерби (денеска 165. по ред) се користи ВАР технологијата.

Во 82 минута Терзиќ можеше својот тим да го доведе до предност од 2-0, но не успеа во реализацијата. Казната стигна наредната минута.

По одличниот центаршут од левата страна, Александар Катаи кој имаше забележителна улога на мечот (погоди пречка со глава во првиот дел) биеше одблизу со глава и носи израмнување 1-1.

По 7 врзани победи на Партизан, „црно-белите“ доаѓаат до првото реми сезонава и остануваат на +2 бода за Црвена Звезда која има 6 победи и 2 нерешени.

Иако во првото полувреме римските ривали Лацио и Рома имаа предност против Каљари, односно Верона, сепак на крајот двата тима собраа само 1 бод.

Лацио на „Олимпико“ одигра 2-2 против Каљари откако до 83 минута беше во негатива од 2-1.

Сепак, по првиот дел момците предводени од Маурицио Сари имаа предност од 1-0 со голот на Имобиле во 45 минута.
Во вториот дел Жоао Педро на стартот на полувремето израмни на 1-1, а во 62. минута Балде донесе гостинска предност од 2-1.

Сепак за еден бод за „небесносините“ се погрижи Каталди во 83 минута.

Рома, пак, по првите 45 минута кај Верона имаше предност со голот на сезонава одличниот Лоренцо Пелегрини, од 36 минута.

Сепак, во второто полувреме „волчицата“ прими дури 3 гола.

Најпрво Барак во 49. израмни на 1-1, а пет минути подоцна Капрари носи домашна предност од 2-1.

Со автоголот на Илиќ во 58. минута четата на Жозе Мурињо доаѓа до реми 2-2, но само пет минути подоцна домашниот фудбалер Фараони гаѓа прецизно за конечни 3-2.

По 4 одиграни кола Рома останува четвртопласиран тим со 9 освоени бодови, додека Лацио има 7 доволно за седмата позиција.

Борусија Дортмунд на крилата на фантастичниот Ерлинг Халанд стигна до нова победа во Бундеслигата. „Милионерите“ предмалку со 4-2 беа подобри од тимот на Унион Берлин, а Норвежанецот на двапати се запиша во листата на стрелците.

Гуереиро во 10 минута со прекрасен гол го отвори мечот, а Халанд во 24 минута веќе зголеми на 2-0.

Во 52 минута со автоголот на Фридрих домашните дојдоа до убедлива предност од 3-0.

Пет минути подоцна Крусе од пенал намали на 3-1. Гостите од главниот град во 81 минута сериозно се заканија да направат изненадување. Воглсамер прецизен за намалување на домашното водство на 3-2.

Сепак, само 2 минути подоцна со својот втор погодок Халанд стави до знаење дека трите бода денеска остануваат во Дортмунд.

„Жолто-црните“ со денешниот триумф собраа 12 од можните 15 бода сезонава, доволни за втора позиција и 1 бод заостанување зад лидерот и актуелен шампион – Баерн Минхен.