Селекторот на Холандија, Луј ван Гал, инсистираше на тоа дека неговите избраници не смеат да ја губат топката толку лесно како во осминафиналето на пресметката со САД, доколку сакаат да го освојат трофејот на Светското првенство во Катар. Искусниот стратег уште еднаш изјави дека целта на „лалињата“ е токму светската титула.

„Мислам дека можеме подобро. Видовме фантастични голови, особено третиот. Нашиот план е да создадеме простор зад грбот на противникот и добро да ги искористиме шансите, но можевме подобро во некои ситуации кога ја имаме топката. Честопати ја губиме без причина и во тој поглед мораме да бидеме подобри. Во спротивно, нема да станеме светски шампиони, а тоа го сакаме сите.Четврт-финалето не е лошо, но ние сакаме пласман во финалето. Сега ќе им дадеме на играчите еден ден одмор затоа што ова беше многу тежок натпревар“, изјави Ван Гал по победата над САД, која воедно беше 19-ти натпревар по ред без пораз за Холандија.

Холанѓаните славеа над САД со 3:1 и го четврт-финалето го очекуваат подобриот од вечерашниот меч меѓу Аргентина и Австралија.

Големата португалска ѕвезда Кристијано Роналдо изненадувачки се најде во тимот на разочарувањата од првата фаза на Светското првенство во Катар, составен од популарната платформа за статистика и резултати во живо, Sofascore. Причината за ова е што аналитичарите на компанијата на 37-годишниот Португалец му дадоа просечна оценка од 6,37 по систем до десет поени за трите натпревари од групната фаза.

Петкратниот освојувач на „Златната топка“ ги започна сите три меча на Португалците во Катар.

Во нив, сега веќе поранешниот напаѓач на Манчестер Јунајтед постигна само еден гол откако погоди од пенал на првиот натпревар против Гана. Роналдо тврдеше дека е стрелец и на првиот гол против Уругвај, но ФИФА тој гол му го додели на Бруно Фернандеш.

Во оваа селекција се најдоа играчи кои играле 60% од времето на натпреварите од групната фаза на Светското првенство.

Репрезентациите на Полска и Франција ќе се сретнат утре од 16 часот во осминафиналето на Светското првенство.

Актуелниот светски првак Франција остави многу добар впечаток во групната фаза и со две победи над Австралија и над Данска го освои првото место во групата Д, така што во последното коло против Тунис селекторот Дешамп им даде шанса на резервите, па „триколорите“ загубија со 1:0.

Полјаците ја минаа групата поради подобра гол – разлика во однос на Мексико. Двете селекции имаа по четири бода, но Полска го зазеде второто место во групата Ц зад Аргентина.

Французите се големи фаворити во осминафиналето, а еден од најдобрите полски играчи, напаѓачот Аркадиуш Милик, смета дека Килијан Мбапе ќе биде најголемата закана за неговиот тим на неделниот натпревар.

„Како да се браните од него? Мораме да бидеме брзи и да имаме скутер за да можеме да го фатиме. Многу е тешко да се одбраниш од него во директен дуел еден на еден. Тој е еден од Најдобрите играчи во светот. Ќе мора да реагираме како група и да најдеме колективни решенија“, рече Милик.