Душан Влаховиќ е херојот на Јувентус во ремито против Борусија Дортмунд во првото коло од Лигата на шампионите.

Јувентус и Борусија одиграа спектакуларно второто полувреме во Торино. Гостите од Германија до 94.минута имаа доство 2:4, на крајот натпреварот заврши без победник 4:4.

Влаховиќ е тема во италијанските медиуми ден по натпреварот. Влезе на теренот во 60.минута, постигна два гола, а во 96.минута повлече контра и му асистираше на Кели кој постигна гол за 4:4.

Српскиот напаѓач не сакаше премногу да се задржува на фактот дека не е стартер кај Игор Тудор, истакнувајќи дека од него зависи да работи напорно на тренинзите.

„Тренерот има право да одлучи кој ќе игра, а јас се трудам секој ден на тренинзите да бидам подготвен и да му помогнам на тимот на најдобар начин. Бев стартер поголемиот дел од мојата кариера и секогаш постигнував голови, но денес, со новите правила за замени, играчите од клупата имаат значајна улога. Секако, секој сака да го започне натпреварот, но јас ги почитувам одлуките на тренерот и се обидувам да го дадам максимумот кога ќе добијам можност.“

Тој се осврна и на летниот преоден рок, каде што се шпекулираше дека сигурно ќе го напушти Јувентус.

„Не ми беше лесно, приказните се појавуваа секој ден, а сега можам да кажам дека 99 отсто од нив немаа никаква врска со реалноста. Такви приказни можат да те иафрлат од колосе, но јас најдов сила во тоа, секој ден мора да се докажуваш, секогаш да бидеш гладен. Никогаш не сум задоволен, постигнав два гола и асистирав, сакав да постигнам уште еден“, рече српскиот напаѓач.

Foto/ EPA

Винисиус Жуниор и Реал Мадрид повеќе не се на иста бранова должина. Чаби Алонсо реши да го остави на клупата за резерви на премиерата во Лигата на шампионите, а по тешката победа над Марсеј (2:1), започнаа шпекулациите за незадоволство на Винисиус.

Сигурни мадридски извори пишуваат дека постојат три причини зошто Винисиус повторно стана тема во Реал.

Првата е дека минатата сезона беше многу лош и не успеваше да прави разлика на теренот, како што тоа го правеше претходната сезоната, кога беше кандидат за Златната топка.

Втората причина е уште позначајна – Чаби Алонсо едноставно понекогаш сака поинаков профил на играч, поради што синоќа Родриго играше како лево крило. Покрај тоа, Родриго по натпреварот посочи дека е среќен што се комбинира со Мбапе и дека се чувствува одлично на теренот. Медиумите пишуваат и за одличната комуникација на теренот меѓу Родриго и Ембапе, и дека и поради тоа позицијата на Винисиус е загрозена.

Самиот Чаби Алонсо посочи дека во текот на сезоната ќе има шанси за сите, дека никој не е во можност да ги игра сите натпревари.

„Само најдобрите ќе играат и оние кои го заслужуваат тоа, тоа ќе го повторувам цела сезона. Но, секој ќе добие шанса да се докаже и да игра, бидејќи е невозможно некој да ги игра сите натпревари оваа сезона“, рече Чаби Алонсо.

Конечно, третата причина е што односите меѓу Винисиус и Реал заладија, бидејќи не се ни блиску до договор за продолжување на соработката. Барањата на Винисиус не се во согласност со она што Реал верува дека го заслужува и во моментов нема никакви преговори меѓу двете страни.

Foto/ EPA

Четврт век откако беше отпуштен од тренерската позиција на Бенфика по само десет натпревари на клупата, сега ветеран од европските фудбалски битки и повеќе пати поразен генерал, Жозе Мурињо се враќа во Лисабон.

„Си-Ен-Ен Португалија“ објави дека остануваат мали формалности до втората промоција на „Специјалниот“ на позицијата тренер на најтрофејниот португалски клуб.

„Бенфика и Жозе Мурињо се согласија за основните принципи на соработка, така што харизматичниот стручњак ќе ја преземе клупата на лисабонскиот гигант по отпуштањето на Бруно Лаж“, пишува португалскиот „Си-Ен-Ен“.

„Лаж беше отпуштен во вторник вечерта, по шокантниот пораз од Карабаг во Лигата на шампионите, а раководството на клубот реагираше брзо и испрати повик до човек кој, парадоксално, е исто така без работа токму поради Бенфика. Имено, Фенербахче го отпушти Мурињо откако неговиот тим беше елиминиран во плеј-офот за пласман во Лигата на шампионите во двомеч со неговиот иден клуб“.

Мурињо на тој начин би можел да се врати во клубот каде што сè започна. Бенфика е првиот од голем број клубови каде што претходно работеше поранешниот наставник по физичко образование и преведувач во тренерскиот штаб на Барселона.

Тој беше промовиран на 20 септември, а заменет на 5 декември 2000 година, по десет натпревари на клупата на „Орлите“. Имаше пет победи, вклучувајќи ја и убедливата 3:0 против градскиот ривал Спортинг, но го напушти кормилото кога дозна дека новоизбраниот претседател на „црвените“ Мануел Виљарињо има други планови – извесен тренер Тони.

Ќе се испостави дека овој господин постигнал вкупно 17 победи во 43 натпревари, и дека Мурињо многу брзо ќе ја освои Европа со големиот ривал на Бенфика, Порто. Лигата на шампионите освоена со Порто, е последната титула во елитното натпреварување на клуб од Португалија.

Во меѓувреме, тој ја водеше Леирија, а потоа со Порто освои две шампионски титули, Купот на Португалија, Купот на УЕФА и конечно Лигата на шампионите, пред да замине подалеку во светот во авантури наречени Челзи, Интер Милан, Реал Мадрид, повторно Челзи, Манчестер јунајтед, Тотенхем, Рома и, конечно, Фенербахче, каде што работеше од 1 јули 2024 година до 29 август оваа година.

„Си-ЕН-Ен Португалија“ наведува дека за претседателот на Бенфика, легендарниот Руи Коста, Мурињо не е само решение за позицијата тренер, туку дека во него гледа долгорочен партнер кој ќе помогне во создавањето атмосфера во клубот и стратегијата за трансфери.

Клубот игра лошо, навивачите се незадоволни, а анкетите покажуваат дека кандидатот на опозицијата Жоао Нороња Лопес веќе има предност во борбата за претседателската функција.

Ангажирањето на Мурињо би можело да ја врати довербата кај навивачите, но и повторно да го подигне авторитетот на клубот во Европа.

Foto/ EPA