Хрватската ракометна репрезентација се соочува со голем проблем пред Европското првенство, кое започнува за само 15 дена.

Селекторот Дагур Сигурдсон речиси сигурно ќе биде без еден од своите клучни играчи, дваесет и деветгодишниот Марин Шипиќ, поради сериозна повреда.

Повредата на коленото се покажа како премногу сериозна, па шансите за неговиот настап на Европското првенство беа сведени на минимум.

Како замена, селекторот Сигурдсон го повика Златко Раужан, пивотерот на РК Сесвете. Оваа сезона, Раужан импресионираше со своите настапи во Лигата на Европа и домашното првенство. Дополнителна препорака е фактот дека во Сесвете го тренира легендарниот пивот Игор Вори, кој најдобро ги познава неговите квалитети.

Хрватска, Европското првенство ќе го отвори за точно 15 дена со натпревар против Грузија.

Foto/ EPA/ANTONIO BAT

Светската фудбалска федерација (ФИФА), ќе реагира на одлуката на државата Габон, да го распушти тренерскиот персонал на националната фудбалска репрезентација и да ги суспендира сите тимски активности до понатамошно известување.

Се очекува ФИФА, во согласност со своите принципи и статус, да го казни ФС Габон за мешање на државата во работата и функционирањето на националната федерација и националните тимови.

Освен распуштањето на тренерскиот персонал, двајца од најважните и најискусните играчи, Пјер-Емерик Обамејанг и Бруно Екуеле Манга, беа отстранети од тимот поради, како што беше кажано, срамниот настап на репрезентацијата на Африканскиот куп на нации.

Габон беше поразен во сите три натпревари на турнирот (Камерун, Мозамбик, Брегот на Слоновата Коска).

Тамошниот министер за спорт, Симплис-Дезир Мамбула, во изјава за државната телевизија ја пренесе шокантната одлука на владата на оваа земја.

„Со оглед на срамниот настап на репрезентацијата на Африканскиот куп на нации, владата одлучи да го распушти тренерскиот персонал, да ги суспендира активностите на репрезентацијата до понатамошно известување и да ги исклучи играчите Бруно Еквеле Манга и Пјер-Емерик Обамејанг од тимот“.

36-годишниот Обамејанг, најдобриот стрелец на репрезентацијата на сите времиња (41 гол) и поранешен африкански фудбалер на годината (2015), ја заврши својата репрезентативна кариера против своја волја.

Манга е рекордерот според бројот на настапите за репрезентацијата и капитен на националниот тим.

Одлуката на габонската влада директно ги крши статутите на ФИФА, кои строго забрануваат мешање на државата во работите на националните асоцијации. ФИФА воведува строги санкции за ваквите дејствија, вклучително и забрана за учество на репрезентацијата и клубовите од таа земја во натпревари под нејзино покровителство.

Неодамнешната историја нуди изобилство докази за ова: Зимбабве и Шри Ланка беа суспендирани од членство во ФИФА во 2022 и 2023 година поради мешање на владата, Индија се соочи со кратка суспензија во август 2022 година по судска одлука, а Кенија, ЧАД и Пакистан исто така беа суспендирани од меѓународниот фудбал во различни периоди од слични причини.

Несомнено е дека слична судбина го чека и Габон, се разбира ако владата не ја промени својата одлука откако главите малку ќе се смират.

Foto/ EPA

Енцо Мареска повеќе не е тренер на Челзи, доби отказ вчера, во првиот ден од новата година. Клупските челници се надеваат дека ќе го именува неговиот наследник во рок од неколку дена.

Драматичната разделба меѓу италијанскиот стручњак и раководството на клубот од „Стемфорд Бриџ“ се случи во втората година од петгодишниот договор на Мареска, по само една победа во последните седум натпревари од Премиер лигата.

Челзи веќе има краток список на кандидати, а Лиам Розениор се споменува како фаворит.

Јасно е дека Челзи без главен тренер ќе гостува в недела кај Манчестер Сити, се очекува дека многу брзо ќе биде назначен нов менаџер и тој би можел да го предводи тимот наредната среда против Фулам.

„Дејли Мејл“, дознава дека покрај Розениор (тренер на Стразбур), кандидати за клупата на Члези се и тренерот на Борнмут, Андони Ираола и поранешниот менаџер на Брајтон, Роберто де Зерби, кој сега е во Марсеј.

Овој медиуми ги анализира кога и како „пукна љубовта“ меѓу Челзи и Мареска.

Крајот на соработката беше очигледен по испадот на Мареска во кој тој тврдеше дека ги доживеал „своите најлоши 48 часа“ по победата над Евертон. Се верува дека изјавата се однесувала на сериозен конфликт меѓу него и медицинскиот персонал околу третманот на повредените играчи и нивното враќање на теренот.

Управата на клубот беше исклучително незадоволна од тие јавни коментари, но и од низа други инциденти што доведоа до прекин на соработката. „Дејли Мејл“ особено истакнува три, кои ги опишува како трите клинци во ковчегот на Мареска:

– одлуката да ја пропушти прес-конференцијата по натпреварот во вторникот. Тој ја наведе болеста како причина. Клубот смета дека тој не бил болен и го оценија тој потег како непрофесионален, непочитувачки и нефер кон асистентот, Вили Кабалеро, кој мораше да го замени.

– игнорирањето на медицинските совети за враќањето на повредените фудбалери.

– медиумските извештаи го поврзуваат Мареска со враќање во Манчестер Сити, каде што претходно работеше како помошник на Пеп Гвардиола.

Што е следно?
Целта на клубот е новиот менаџер да продолжи да работи во рамките на постоечкиот систем за да се избегнат големи промени среде сезоната во која Челзи, и покрај полошите резултати, сè уште е на петтото место. Доколку брзо не се најде трајно решение, тимот би можел привремено да го преземе Вили Кабалеро.

Foto/ depositphotos