Лионел Меси можеби поголемиот дел од летото го помина карајќи се со управата на Барселона, но кога се работи за активностите на теренот, тој е целосно посветен на каталонскиот гигант, откако имаше фантастична аситенција за 1:0 победа над Елче на традиционалниот меч за отварање на новата сезона, трофејот „Жоан Гампер“.

Голот го постигна Антоан Гризман, а аситенцијата ја запиша Жорди Алба, но сепак, клучен човек во играта беше токму Меси, кој во стил на плејмејкер даде една навистина спектакуларна долга топка во шестнаесетникот.

33-годишниот Меси претходно имаше одлична асистенција до Филипе Кутињо и два фантастични гола за 3:1 победата над Џирона во средата во подготвителен меч. Каталонците ја почнуваат сезоната следната недела против Вилјареал.

The Ice Breaker! 🧊🔨 @AntoGriezmann pic.twitter.com/Ty6D0GrRiV

— FC Barcelona (@FCBarcelona) September 19, 2020

Борусија Дортмунд имаше одличен старт на новата сезона во Бундеслигата, откако со 3:0 ги совладаа Борусија Менхенгладбах, благодарение на двата гола на нивната норвешка ѕвезда, Ерлинг Халанд.

Џовани Рејна ги донесе БВБ во водство во 35. минута по асистенција на младиот Англичанец, Џуд Белингем, пред во 54. минута Халанд да го постигне својот прв гол од пенал.

Во 77. минута по асистенција на друг млад Англичанец, Џејдон Санчо, Халанд лесно ја смести топката во голот на „ждребињата“.

Кристал палас успеа да стигне до славна 3:1 победа на „Олд Трафорд“ за катастрофален старт на сезоната на Манчестер јунајтед, иако нивната нова ѕвезда Дони ван де Бек го постигна својот деби гол во дресот на „ѓаволите“.

Дека работите нема да одат најдобро за Оле Гунар Солскјер стана јасно многу рано, кога уште во седмата минута по слабата реакција на Виктор Линделоф ги донесе гостите во водство. Иако од овој момент, топката беше речиси постојано во посед на „ѓаволите“, резултатот на крај не беше позитивен.

Во 72. минута, по играње на рака на Линделоф во шестнаесетникот, беше досуден пенал за Палас, а ударот на Џордан Ају лесно го фати Давид де Хеа. Сепак, судијата Мартин Еткинсон сметаше дека Де Хеа тргнал прерано, и во вториот обид, поранешниот фудбалер на Јунајтед, Вилфрид Заха не згреши.

Засилувањето од Ајакс, Ван де Бек доби шанса да влезе во игра, и со малку среќа по лошата интервенција на одбраната на Палас, го постигна првенецот во дресот на Јунајтед во 80-тата минута, но само пет минути подоцна Заха стави печат на мечот со убав гол.

Резултатот само ќе ги налути навивачите на Јунајтед, кои подолго време го критикуваат тимот за слаба активност на пазарот на играчи.