Бугарскиот тениски ас, Григор Димитров, признава дека уште не е целосно физички закрепнат од коронавирусот кога неговиот позитивен тест на „Адрија турнејата“ на Новак Ѓоковиќ предизвика бура реакции кај тениските љубители.

„Вирусот е вистински. Најтешкиот дел е тоа што не знаеме што се случува и таа несигурност најмногу боли. Јас бев активен целиот мој живот и одеднаш морав да бидам затворен и тоа ми беше навистина тешко. Навистина не се чувствував добро. Имав различни симптоми, не можев да го препознам вкусот на храната и не мирисав ништо. Не ми е тешко да сум сам бидејќи од мојата 12-та година живеам практично сам. Но, најмногу ме плашеше тоа што не знаеме какви долгорочни последици ќе има од болеста“, вели Димитров.

Димитров, заедно со организаторот на „Адрија турнејата“, Новак Ѓоковиќ, претрпе најмногу критики за летната турнеја на Балканот, која требаше да ги обедини луѓето. Тој додава дека е во контакт со Ѓоковиќ и дека и двајцата сакаат да мислат на тенисот.

„Зборував со Новак, секако. Бевме заедно и двајцата сме речиси вратени во форма. Двајцата тренираме и чекаме да видиме што ќе се случи следно“, објаснува бугарскиот тенисер.

Нова партија, нов рекорд. Лука Дончиќ повторно постави рекорд на НБА-лигата при победата на Далас маверикс над Сакраменто кингс во Орландо (114:110) кога првпат во кариерата имаше 20 скока, а додаде и 34 поени и 12 асистенции.

Со ова тој стана најмладиот НБА-кошаркар во историјата (21 година и 158 дена), кој постигнал 30 поени, 20 скока и 10 асистенции во еден меч по Оскар Робертсон во 1961 година (23 години и 12 дена).

Покрај тоа, словенечкото чудо е само четврти НБА-играч во историјата што имал 34 поени, 20 скока и 12 асистенции во еден натпревар по Карим Абдул-Џабар во 1976 година. Претходно тоа им успеа само на Елгин Бејлор (четири пати) и на легендарнио Вилт Чембрлен (11 пати). Дончиќ не беше задоволен.

„Ова беше еден од нашите најлоши натпревари, но сепак победивме“, изјави тој по мечот.

Германските бундеслигаши и Германската фудбалска лига (ДФЛ) поставија сет правила за враќање на навивачите на трибините во новата сезона во септември, но со одредени стриктни правила, како забрана на гостински навивачи, забрана на стоење на трибините и забрана за точење пиво на стадионите.

Конечната одлука за враќање на навивачите ќе ја имаат здравствените власти во Германија откако Бундеслигата беше првата лига што се врати по пандемијата на Ковид-19, без навивачи на трибините.

Пиењето пиво на трибините во Германија е долгогодишна традиција, но ДФЛ смета дека до 31 октомври треба да се забрани точењето пиво поради коронавирусот. Гостинските фанови ќе бидат отсутни од трибините барем до крајот на 2020, а трибините за стоење ќе бидат празни за да може да се почитува социјалното дистанцирање.