Спорт
Јанис: Го остварив мојот сон, додека Спанулис е тука, а и јас ќе бидам тука
Грција ја победи Финска во натпреварот за бронзениот медал на последниот ден од Евробаскетот во Рига. Грците славеа со резултат од 92:89. Ова е прв медал за Грција на континенталните шампионати по пауза од 16 години.
Најдобриот грчки играч, член на иделаната петорка на ЕП, Јанис Адетокумбо, прв пат во кариерата освои медал со Грција. НБА ѕвездата имаше емотивно излагање на прес конференцијата по натпреварот.
„Прво на сите, сакам да нагласам дека ќе играм за репрезентацијата сè додека Василис Спанулис е тренер. Тој е одличен човек и феноменален стручњак. Дадовме се од себе. Два месеци сме заедно, заедно сонувавме за медали и сега чувствуваме големо олеснување. Можеше ли медалот да биде посјајен? Тешко е да се зборува за тоа, со оглед на тоа што во полуфиналето не бевме на посакуваното ниво. Во моментов сум исклучително среќен бидејќи стигнав до првиот медал во дресот со националниот тим. Чувството е неверојатно, тешко е да се спореди со успесите во НБА лигата. Се надевам дека ќе бидеме инспирација за децата низ цела Грција. Успесите во НБА лигата ќе ги слават мојата мајка, децата и цела Грција, донесовме радост на нацијата на која ѝ должам толку многу, а во исто време се надевам дека ќе доживееме добредојде во земјата што е мој дом и која направи толку многу за моето семејство, што никогаш нема да можам да го вратам на вистински начин“, истакна Јанис Адетокунбо.
Foto/ EPA
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Де Брујне на пауза до крајот на годината?
Победата на Наполи над Интер од 31:, во саботата во дербито на Серија А беше засенета од новата повреда на Кевин де Брујне.
Белгиецот го постигна првиот гол од пенал и ведбаш се фати за мускулот. Побара замена и со помош на медицинскиот тим го напушти теренот. Во вториот дел се врати кај соиграчите на клупата за резерви, се движеше со помош на патерици.
Според италијанските медиуми, во клубот постои страв дека може да станува збор за сериозен проблем со мускулот.
Иако Де Брујне изгледаше смирен по натпреварот, медицинскиот тим на Наполи не сака да ризикува со оглед на неговата неодамнешна историја на повреди.
Се очекува белгискиот играч од средниот ред да помине детални медицински прегледи кои ќе ја утврдат сериозноста на повредата, а прелиминарните проценки покажуваат дека може да станува збор за повреда од висок степен, која би го оставила надвор од игра неколку недели, па дури и подолго, бидејќи се зборува за пауза до крајот на календарската 2025 година.
Евентуалното отсуство на Де Брујне би било голем удар за тимот на Конте, кој го врати моментумот во трката за Скудетото во последните неколку кола.
Спорт
Јувентус го отпушти Игор Тудор
Италијанскиот гигант Јувентус одлучи да му се заблагодари на Игор Тудор за соработката по серијата лоши резултати што кулминираа со пораз од Лацио во Серија А, пишуваат италијанските медиуми.
Веста за неговата замена ја потврди „Скај Спорт Италија“, со кратко и јасно соопштение на платформата „X“:
„ Игор Тудор повеќе не е тренер на Јувентус“.
Поразот против Лацио беше трет по ред во домашното првенство, а Јувентус е без победа осум натпревари по ред, на последните четири тимот не постигна ниту еден гол.
Последниот триумф на тимот од Торино беше на 13 септември против Интер. Оттогаш, тие освоија само пет од можни 24 бода во Серија А и Лигата на шампионите, далеку под традиционалните стандарди на клубот.
Тудор го предводеше Јувентус од 23 март оваа година. Забележа десет победи, осум нерешени и шест порази.
Како привремено решение, „Старата дама“ го назначи Масимо Брамбиле, кој ќе го предводи тимот против Удинезе.
Спорт
Прогноза на Суперкомпјутерот: Реал ќе ја освои титулата во Шпанија
Ден по победата на Реал над Барселона (2:1), во „Ел Класико“, Суперкомпјутерот пресмета дека „кралскиот клуб“ ќе ја освои титулата во Шпанија оваа сезона.
Пред натпреварот со Барселона, шансите беа еднакви, пишуваат денес шпанските медиуми, но по триумфот, рапидно пораснаа шансите на Реал.
„АС“ пишува дека според Суперкомпјутерот, Реал Мадрид на крајот ќе ја освои титулата со 87 поени, седум повеќе од Барселона. На третото место ќе биде Атлетико Мадрид.
Според оваа проекција од лигата ќе испаднат Овиедо, Леванте и Џирона, клубот што играше во Лигата на шампионите минатата сезона.

