Ливерпул ги одби напорите на Барселона да започне преговори за трансферот на Луис Дијаз. Од „Енфилд“ на Каталонците им порачаа дека „Лучо не е на продажба“.

Колумбиецот пристигна во Ливерпул од Порто во јануари 2022 година и има договор до крајот на јуни 2027 година.

Оваа сезона тој постигна 13 гола со седум асистенции на патот до освојување на титулата во Премиер лигата.

„Многу сум среќен во Ливерпул, секогаш го велев тоа. Имав убаво добредојде таму“, им рече Дијаз на новинарите пред натпреварите на неговата репрезентација против Перу и Аргентина.

„Трансфер периодот започнува и се обидуваме да го направиме она што е најдобро за нас. Чекам да видам што ќе се случи. Ако Ливерпул ми понуди продолжување на договорот, ќе бидам среќен. Но, ќе бидам и среќен ако останам до крајот на договорот што го имам сега. Од нив зависи, ќе видиме, јас ќе одлучам што е најдобро“, рече Дијаз.

Шпекулациите за заминувањето на Дијаз се појавија откако тој и неговата девојка објавија долги пораки до навивачите на социјалните мрежи, кои некои ги протолкуваа како збогување со клубот.

Ливерпул ги продолжи договорите на Мохамед Салах и Вирџил ван Дајк во текот на сезоната, трансферот на Георги Мамардашвили беше обезбеден минатата година, а Џереми Фримпонг пристигна ова лето.

Се шпекулира дека наскоро ќе бидат официјализирани пристигнувањата на Флоријан Вирц и Милош Керкез, како и заминувањето на Дарвин Нуњез. Веќе е познато дека Трент Александар-Арнолд и Кимин Келехер заминаа од клубот.

Првата и третата носителка на Ролан Гарос, Арина Сабаленка и Коко Гоф ќе се борат за титулата на вториот Гренд слем турнир во сезоната. Сабаленка ја победи бранителката на титулата Ига Швјонтек, а Гоф ја елиминира француската сензација, Лиос Боисон.

Најдобрата во светот, Сабаленка, ја детронизира, Швјонтек за два и пол часа.

Неизвесни беа првите два сета, во кои се случи фестивал на брејкови. Сабаленка го доби првиот со 7:6, а Швконтек вториот со 6:4. Во третиот Сабаленка ја декласира противничката, славеше со 6:0.

Сабаленка е првата тенисерка што стигнала до финалето на три последователни Гренд слем турнири по Серена Вилијамс во 2016 година.

Коко Гоф стави крај на најубавата приказна на овогодинешното издание на Ролан Гарос. Американката и препушти само три гема на противничката. За пласман во финалето и беа потребни само 70 минути, победи со 6:1, 6:2.

За утеха, Боисон ќе направи метеорски успех на ВТА листата. На Ролан Гарос дојде како 361. во светот, а од понеделник ќе биде меѓу најдобрите 70. Исто така ја зголеми банкарската сметка, заработи 690.000 евра.

Фудбалската репрезентација на Узбекистан се квалификуваше за Светското првенство во 2026 година, кое ќе се одржи во Америка, Канада и Мексико.

Во претпоследното коло, Узбекистан одигра 0:0 на гостински терен против Обединетите Арапски Емирати и со освоениот бод и математички обезбеди пласман.

Узбекистанците се втори на табелата од Групата А на азиските квалификации со 18 бода, четири повеќе од ОАЕ, кои ќе мора да одат во плејофот.

Ова ќе биде прв настап за Узбекистан на завршниот турнир на Светското првенство. На Азискиот куп, нивниот најдобар резултат досега беше четвртото место во 2011 година.

Меѓу попознатите играчи за оваа селекција, меѓу другите, се Абдукодир Хусанов (Манчестер сити) и Елдор Шомурудов (Рома).

Патем, покрај домаќините, досега на завршниот турнир се квалификуваа Иран, Јапонија, Аргентина и Нов Зеланд.

Светското првенство е закажано од 11 јуни до 19 јули 2026 година.