Спорт
Јувентус најде замена за Тудор?

Позицијата на Игор Тудор на клупата е сериозно загрозена по лошиот почеток на сезоната и вчерашниот пораз од Комо. Како што пишува „Калчомеркато“, клубот веќе размислува за можен наследник доколку има промена на клупата. Изненадувачки, најверојатен кандидат е Рафаеле Паладино, поранешен играч на Јувентус кој добро ги познава приликите во клубот. Наводно, синоќа во Милано се одржала вечера помеѓу тренерот од Неапол и спортскиот директор на Јувентус, Франсоа Модесто.
Модесто и Паладино ги поврзува долгогодишно пријателство кое датира од нивните заеднички денови во Монца. Смената на тренерот во Јувентус стана реалност, со оглед на петте нерешени резултати и еден пораз во последните шест натпревари.
Рафаеле Паладино е роден на 17 април 1984 година во Неапол, а својата фудбалска кариера ја започнал во младинскиот клуб на Беневенто. Во кариерата играл за Јувентус,
Ливорно, Џенова и Парма.
По завршувањето на неговата професионална фудбалска кариера, Паладино влезе во тренерските води, во Монца. Го презеде клубот во време кога беше во проблеми, но со својата тактичка флексибилност и смирен пристап, успеа да го стабилизира тимот.
Под негово водство, Монца играше модерен, офанзивен фудбал, а Паладино стекна репутација на млад тренер кој знае како да го извлече максимумот од играчите. Неговата работа го привлече вниманието на поголемите клубови, вклучувајќи го и Јувентус, чии бои ги носеше како играч.
Неговото познавање на клупската култура и блиските односи со поединци во спортскиот сектор го прават логичен кандидат доколку клубот од Торино одлучи да го смени актуелниот тренер.
Паладино се смета за еден од најперспективните италијански тренери од новата генерација, а негов последен клуб беше Фиорентина, со која оствари 26 победи, 12 нерешени резултати и 15 порази во 53 натпревари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Потер официјално е селектор на Шведска

Англискиот тренер Греам Потер (50), кој неодамна беше отпуштен од Вест Хем, експресно најде работа. Потер е назначен за нов селектор на фудбалската репрезентација на Шведска.
Фудбалската асоцијација на оваа скандинавска земја официјално потврди дека Потер е новиот селектор на репрезентацијата на „трите круни“. Тој ќе го наследи Јон-Дал Томасон на таа позиција, кој неодамна беше отпуштен поради лоши резултати.
Шведска моментално е последна во квалификациската група за Светското првенство, зад Словенија, Косово и Швајцарија.
Во четири натпревари, Шведска не победи на ниту еден натпревар, освои само еден бод.
Потер ќе се обиде да ја поправи ситуацијата и да ги врати Швеѓаните на вистинскиот пат.
И покрај минималните шанси низ квалификациите да се пласира на Мундијалот, Шведска сепак ќе има втора шанса да ја постигне својата цел, ќе игра плеј-оф како една од најдобро пласираните репрезентации во Лигата на нации (беше прва во Групата Б).
Потер, во јануари го презеде Вест Хем, не импресионира со резултатите. Под водство на Потер, тимот од Лондон забележа пет порази во шест натпревари на почетокот на сезоната. Вкупно, тој има само шест победи во 23 натпревари со Вест Хем.
Сепак, тој има добар углед во Шведска, бидејќи го водеше Остерсунд до највисоко ниво три пати во седумте сезони додека беше во тој клуб.
Својот најголем успех го постигна во 2017 година со освојувањето на Купот на Шведска.
Спорт
Дајч ќе седне на клупата на Нотингем Форест

Фудбалскиот клуб Нотингем Форест е блиску до ангажирање на нов менаџер.
Англиските медиуми пишуваат дека главен кандидат за клупата на „Шумарите“ е Шон Дајч.
Форест го отпушти Ангелос Постекоглу по поразот од Челзи во саботата попладне (3:0).
Постекоглу помина само 39 дена на таа позиција откако го замени Нуно Еспирито Санто.
Тој не победи на ниту еден натпревар и со тоа го заврши најкраткиот мандат во историјата на Премиер лигата.
Сè се движи брзо и се очекува поранешниот стратег на Барнли и Евертон да биде на клупата веќе во четврток за натпреварот против Порто во Лигата на Европа.
Пред Дајч, Форест разговараше со Роберто Манчини, а се разгледуваше и Марко Силва од Фулам, но клубот не сакаше да ја плати неговата откупна клаузула од 10 милиони фунти.
Спорт
ШК Алкалоид стартуваше со убедлив триумф на стартот на Европскиот клупски куп

Првото коло од Европскиот клупски куп во шах донесе очекуван резултатски расплет, при што најдобро рангираните екипи, меѓу кои е и македонскиот шампион ШК Алкалоид, стартуваа со убедливи победи на турнирот, кој има само седум кола, а на крајот ќе го даде новиот клупски шампион на Европа.
За овој настап на Родос, Грција, екипата имаше две промени во однос на тимот од 2024 година, и тоа на петтата и на шестата табла, каде што настапија ВМ Абиманју Пураник и ИМ Тони Лазов, при што обајцата имаа успешно деби со освојување цел поен. Очите на македонската шаховска јавност го следеа последниот македонски државен шампион Тони Лазов (2.382), кој лани освои сребрен медал на Олимпијадата во Унгарија, а сега, водејќи ги црните фигури против Албан Красниќи (2.131), одлично се снајде во позиција со кралско фијанкето, во ситуација кога неговиот противник се обиде да импровизира со нестандарден план. При временската контрола на 40. потег, противникот се обиде со драматичен и ризичен потег да направи пресврт, но ИМ Лазов, со манир на искусен борец, ги неутрализираше заканите, па противникот се предаде.
Противничкиот тим Дарданија од Косово успеа да даде отпор само на првата табла, каде што ВМ Арјун Еригаиси (2.773) го подели поенот со ИМ Ндерим Сарачи (2.445), кој се бранеше со руска одбрана.
Од втората до четвртата табла се играа сицилијанки, при што ВМ Ји Веи (2.754) со црни фигури брилираше во најдорфовата варијанта против ФМ Матеу Бочи (2.186), додека, пак, на третата табла Јангји Ју (2.720) играше таканаречена бела сицилијанка, при што во долга борба со Кораб Сарачи (2.197) покажа класа и надмоќ. ВМ Читамбарам Аравинд (2.711) на четвртата табла играше трпеливо, постепено подобрувајќи ја позицијата против ФМ Ардијан Јашари (2.166), а на крај освои цел поен.
Единствената партија која беше решена пред играта да влезе во завршницата беше онаа на петтата табла, каде што ВМ Абиманју Пураник спроведе офанзивен напад во англиско отворање, по што со школска тактичка жртва на скокач на полето Ф5 стигна до триумф против Арменд Будима (2.169).
ШК Алкалоид е второрангиран тим според рејтингот и заедно со другите тимови од првата петорка се смета за еден од фаворитите во борбата за медалите. Најдоброрангираниот Бајеган Пендик во првото коло славеше со 5 : 1 (две ремија), додека, пак, романскиот СуперЧес, унгарскиот Нагиканжаи и чешкиот Нови Бор (кој е бранител на титулата од лани) имаа убедливи победи од 6 : 0.
На турнирот играат 102 екипи, а по првото коло 48 од нив се на делба на првото место со по 2 бода. Во согласност со швајцарскиот систем на натпреварување, во втората рунда ШК Алкалоид ќе игра со домашната екипа Ippotis Rodos Chess Club.
ФОТО: Архива на ШК Алкалоид