Спорт
Како идејата на Венгер за офсајди може да го смени фудбалот засекогаш

Револуционерната идеја на поранешниот тренер на Арсенал, Арсен Венгер за менување на правилата за офсајд е презентирана пред ФИФА, и тие се подготвени да ја тестираат, во потег кој може да донесе огромна трансформација на модерниот фудбал.
Венгер, откако ги одби сите понуди да стане тренер или спортски директор во некој голем клуб, почна да работи како шеф за глобален развој на фудбалот на ФИФА и подолго време лобира за промена на офсајд правилата.
Што е идејата на Французинот? Многу едноставно – тој би сакал да нема офсајд додека напаѓачот со било кој дел од телото кој може да го искористи да постигне гол е израмнет со претпоследниот противник.
Според „Тајмс“, правилото ќе биде тестирано во засега неименувана кинеска лига со можност да се применува глобално во блиска иднина. Како би изгледало тоа? Примерот на Рахим Стерлинг на следната фотографија покажува дека тој не би бил во офсајд, бидејќи неговата петица е израмнета со Џон Мекгин. Според сегашните правила, ова дефинитивно би било офсајд
Претседателот на ФИФА, Џани Инфантино е отпимист.
„Кога се работи за офсајдот, со менување на играта, со брзината на играта и со воведување на ВАР, јасно е кога е офсајд или не. Без ВАР, судиите сами го одлучуваа тоа. Со новото правило би виделе малку повеќе напаѓачки фудбал. Со предлогот на Венгер, напаѓачите ќе имаат повеќе простор и ќе се фаворизира напаѓачки фудбал. Прво мора да се тестира и да се види влијанието на играта. Ако е позитивно, тогаш зошто да не?“, вели Инфантино.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Ленгле како слободен играч потпиша со Атлетико

Францускиот фудбалер Клеман Ленгле потпиша договор со Атлетико Мадрид до јуни 2028 година.
Ленгле беше член на Барселона, а минатата сезона ја помина на позајмица во Атлетико.
Францускиот фудбалер го раскина договорот со Барселона порано денес, а потоа потпиша тригодишен договор со Атлетико Мадрид како слободен агент. Минатата сезона, Ленгл одигра 34 натпревари за мадридскиот клуб и постигна три гола.
Покрај Барселона и Атлетико, дефанзивецот играше и за Астон Вила, Тотенхем, Севиља и Нанси.
Спорт
Киву го презеде Интер

Романскиот фудбалски стручњак Кристијан Киву (44) е назначен за нов тренер на Интер од Милано.
Киву потпиша договор со тимот од „Џузепе Меаца“ до 30 јуни 2027 година.
Тој го наследи Симоне Инзаги на клупата на вицешампионите на Европа и Италија. Инзаги минатата недела поднесе оставка и замина во Ал Хилал.
Киву поднесе оставка од тренерската позиција на Парма пред да биде назначен во Милано.
Романецот беше тренер на младинските категории на Интер од 2018 до 2024 година, а како играч беше член на клубот од Милано од 2007 до 2014 година.
Спорт
Започна чистката на „Олд Трафорд“, први на удар ветераните

Данскиот фудбалер Кристијан Ериксен (33), шведскиот дефанзивец Виктор Линделоф (30) и поранешниот репрезентативец на Северна Ирска Џони Еванс (37) ќе го напуштат Манчестер Јунајтед на 30 јуни, објави англискиот клуб.
Во соопштението се наведува дека договорите на тројцата фудбалери со Манчестер Јунајтед истекуваат на 30 јуни и дека англискиот тим не смета на нив следната сезона, бидејќи клубот од „Олд Трафорд“ одлучил да не ја продолжи соработката со Ериксен, Еванс и Линделоф.
Еванс беше член на Манчестер Јунајтед од 2006 до 2015 година, а се врати во клубот од „Олд Трафорд“ во 2023 година. Ирецот и претходно објави дека ќе се пензионира.
Ериксен пристигна во Манчестер Јунајтед во 2022 година, додека Линделоф е член на „Црвените ѓаволи“ од 2017 година.