Ал-Наср, клуб од Саудиска Арабија, му понудил тригодишен договор вреден 216 милиони евра на Кристијано Роналдо, тврди Си-би-ес спорт. Да потсетиме, Манчестер јунајтед го раскина договорот со Роналдо, што се очекуваше по долгиот спор меѓу славниот Португалец и англискиот премиерлигаш.

Си-би-ес наведува дека Ал-Наср долго време е заинтересиран за Роналдо и не е единствениот клуб од Блискиот Исток кој би сакал да го доведе. Интересот на клубот бил „посилен од кога било“ и поради тоа биле подготвени да му понудат околу 70 милиони евра годишно.

„Разговорите започнати во текот на летото напредуваа, но се чека одлуката на Роналдо. Доколку тој ја прифати понудата, договорот експресно ќе биде склучен“, објави Си-би-ес.

Роналдо во моментов го игра последното Светско првенство со Португалија.

Аргентина успеа да преживее, ги задржа шансите за пласман во осмина-финалето на Светското првенство. „Гаучосите“, во Ц-групата, славеа против Мексико 2:0.

Аргентина и Мексико одиграа тврд, на моменти грд натпревар, со неколку груби стартови. Аргентина во првиот дел не успеваше да го пробие двојниот блок пред голот на Очоа. „Гаучосите“ во овој период не упатија ниту еден удар кон голот на Мексико.

Во ток сегмент не се прославија ниту Мексиканците, чија главна определба беше да го одбранат својот гол и да освојат барем еден бод. Вега го упати единствениот удар кон голот во првиот дел.

Слична игра донесоа и првите 20 минути од второто полувреме. Тогаш на сцена стапи Лионел Меси, кој до 64.минута беше речиси невидлив на теренот.

Мексиканците заборавија на него, а тој прими топка на 18 метри од голот и го матираше Очоа.

По примениот гол Мексиканците се отворија, но не направија ништо конкретно пред голот на Аргентина.

На спротивната страна Аргентина постигна уште еден гол. Енцо Фернадез, во 87.минута, постигна спектакуларен гол.

На табелата во оваа група Полска води со четири бода, Саудиска Арабија и Аргентина имаат по три, а Мексико еден бод. Во пресрет на последното сите селекции имаат реални шанси да се најдат во осмина-финалето.

За четири дена ќе играат Аргентина-Полска и Мексико-Саудиска Арабија.

Легендарниот Марко ван Бастен, јавно го критикуваше капитенот на Холандија Вирџил ван Дајк, по ремито со Еквадор (1:1) на Мундијалот во Катар.

Ван Бастен смета дека капитенот не го слдел најдобро движењето на Енер Валенсија, кој на Јужноамериканците им донесе бод во пресметката со Холандија.

„Тој само застана и дозволи Валенсија да шутира. Што гледа и чека? Мора да биде до играчот и да не му дозволи да шутира на голот. Тој не е лидер, не му е гајле за ништо во тимот. Многу врева се крева околу него, но јас не гледам ништо конкретно“, изјави Ван Бастен.

Зборовите на славниот сонародник новинарите му ги пренесоа на Ван Дајк.

„И што да кажам сега? Лесно е да се зборува од студио. Тој никогаш не кажува ништо позитивно. Тој вели дека не сум вистински капитен? Не знам што да кажам. Го водам тимот најдобро што можам“, одговори Ван Дијк.

Холандија по две кола има четири бода, а во последното коло против Катар ќе треба да го потврди пласманот во осмина-финалето.