Спорт
Катарскиот шеик понудил 6,5 милијарди фунти за Манчестер Јунајтед и три суперѕвезди, Мбапе, Коман и Камавинга
Катарскиот шеик Јасим бин Хамад Ал-Тани му понуди на американското семејство Глејзер пет милијарди фунти за стопроцентна сопственост на Манчестер Јунајтед. Доколку понудата биде прифатена и тој стане нов сопственик на клубот, се обврза веднаш да инвестира дополнителни 800 милиони фунти за подобрување на клупската инфраструктура, поточно тренинг кампот Керингтон и стадионот „Олд Трафорд“. Тоа е инвестиција од вкупно 6,5 милијарди евра.
Семејството Глејзер го продава Манчестер Јунајтед по 18 години, но сѐ уште не одлучило дали тоа да го направи целосно или делумно. Главни конкуренти за купување на клубот, кој и покрај тоа што десет години нема освоено англиска титула и 15 години европска титула, сепак е многу атрактивен, се катарските шеици, како и Џим Ретклиф, кој важи за најбогат Британец.
За разлика од Ал-Тани, кој сака да биде единствен сопственик на клубот, Ретклиф сака да купи контролен пакет од 50 проценти и да стане претседател. Аврам и Џоел Глејзер би задржале 20 отсто од акциите, додека останатите 30 отсто би ги држеле различни групи. Вака Ретклиф сака да ги поттикне Глејзерови да ја изберат неговата понуда бидејќи тоа би им овозможило да останат во клубот и да заработуваат од него.
Но, шеикот Јасим бин Хамад Ал-Тани нуди сосема поинаков модел на откуп, што го бараат навивачите на Јунајтед. Тие инсистираат на еден шеф, а бидејќи Хамад Ал-Тани знае дека фановите се многу поблиску до неговиот модел, за да ги привлече уште повеќе и да изврши дополнителен притисок врз семејството Глејзер, вети три суперѕвезди доколку му дозволат да го купи клубот. Тоа се Килијан Мбапе, Кингсли Коман и Едуардо Камавинга.
Семејството Глејзер ја отпочна стратегијата за излез од клубот пред пет и пол месеци. Конкурентите за преземање досега доставија по три понуди, но американските сопственици на англискиот гигант сѐ уште не одлучиле кому и за колку ќе го продадат клубот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Роналдо го најави крајот на кариерата
Кристијано Роналдо (40) планира наскоро да ја заврши кариерата и призна дека веројатно ќе плаче кога тоа ќе се случи. Фудбалерот на саудискиот Ал Наср постигна 952 гола во кариерата, а неговата цел е да постигне 1000 пред да се пензионира.
„Ќе биде тешко, веројатно ќе плачам затоа што сум емотивна личност. Ја подготвувам мојата иднина уште од моите 25, 26, 27 години и мислам дека ќе можам да го издржам тој притисок“, рече Роналдо во емисијата на Пирс Морган.
Роналдо се осврна на Манчестер Јунајтед, оцени дека тренерот на тимот Рубен Аморим не може да прави чуда на „Олд Трафорд“ и рече дека чувствува тага за својот поранешен клуб.
„Тој дава сѐ од себе. Што да направи? Чуда? Чудата се невозможни. Ние во Португалија велиме дека чудата се само во Фатима. Манчестер Јунајтед има добри играчи, но некои од нив во главите не им е Манчестер Јунајтед“, рече 40-годишниот португалски фудбалер.
Роналдо разговараше со Морган три години по шокантното интервју, по кое го заврши својот втор престој во Манчестер Јунајтед. Во 2022 година, тој го критикуваше раководството на клубот, тогашниот тренер Ерик Тен Хаг и клупските службеници, што доведе до неговото заминување во Саудиска Арабија.
Роналдо рече дека сè уште го сака Јунајтед, за кого одигра 346 натпревари и постигна 145 гола, но посочи дека клубот треба да најде функционална структура.
„Тажен сум затоа што е еден од најважните клубови во светот и клуб кој сè уште е во моето срце. Мора да ги следите паметните луѓе за да создадете основа за иднината на Јунајтед. Пред многу години, Ники Бат, Гари Невил, Рој Кин, Дејвид Бекам станаа одлични играчи, но беа млади.
Манчестер Јунајтед во моментов нема структура. Се надевам дека тоа ќе се промени затоа што потенцијалот на клубот е неверојатен. Тоа е еден од најважните клубови на векот“, додаде Роналдо.
Спорт
(Видео) Елмас немаше поддршка, Наполи не успеа против Ајнтрахт – Лесна победа на Арсенал во Прага
Натпреварите Наполи-Ајнтрахт и Славија Прага-Арсенал, го отворија четвртото коло во Лигата на шампионите. Наполитанците одиграа без голови со гостите од Франкфурт, додека Арсенал лесно победи во Прага со 3:0 и го задржа максималниот ефект.
Елиф Елмас повторно беше стартер во тимот на Наполи и го одигра најдобриот меч во сезоната. Македонскиот репрезентативец беше најголема закана по голот на Ајнтрахт, на крајот доби највисока оценка oд сите фудбалери на Наполи. Имаше брилинантна соло акција во првиот дел, но Цетер го одбрани неговиот удар.
Во Прага, Арсенал се мачеше на почетокот. Лидерот во Премиер лигата беше изненаден од пресингот на Славија.
Домашниот тим се закани во неколку наврати, но гостите го искористија подарокот што го добија во средината на првото полувреме.
Провод играше со рака во шеснаесетникот и беше досуден пенал за тимот од Лондон. Сака ја презеде одоговорноста и го доведе Арсенал во водство.
„Топџиите“, успеаја да го решат натпреварот во раната фаза од вториот дел. Одбраната на Славија беше лошо позиционирана, Тросар нафрли, а осамениот Мерино, кој играше како напаѓач, рутински ја погоди мрежата.
Шпанецот стави точка на триумфот во 68-та минута. Голманот Марковиќ направи катастрофална проценка по центаршутот на Рајс, а Мерино инстинктивно реагираше и го постигна вториот гол. Резултатот не се промени до крајот на натпреварот.
Треба да се напомене дека Арсенал испиша историја, бидејќи Артета го воведе 15-годишниот Макс Дауман, кој стана најмладиот играч во историјата на Лигата на шампионите.
Foto/ EPA
Спорт
Ѓоковиќ прв пат во кариерата го победи Табило
Новак Ѓоковиќ, петтиот тенисер на АТП листата, се врати на терените по Мастерсот во Шангај, поточно на турнирот од серијата АТП 250 во Атина. Ѓоковиќ во неговиот прв меч во грчката престолнина го победи Чилеанецот Алехандро Табило (89-ти на АТП листата) со 7:6 (3), 6:1.
Ѓоковиќ прв пат во кариерата го победи Табило, откако претходно без да освои сет, загуби од 28-годишниот Чилеанец во Рим во мај минатата година, а една година подоцна во Монте Карло.
Овој податок се почувствува во првиот сет, кога Ѓоковиќ се мачеше со Табило. Новак мораше да го реши во тај-брејк, а 38-годишниот Србин започна со 3:0, а потоа уште еден мини брејк му беше доволен да го освои сетот.
Вториот сет беше еднонасочна улица, откако Ѓоковиќ во првиот гем спаси брејк топка. Српскиот тенисер експресно направи два брејка и лесно го затвори сетото со 6:1.
Ѓоковиќ ќе има ден за одмор, а во следното коло ќе се соочи со подобриот од дуелот меѓу Елиот Спичири (САД, АТП 96) и Нуно Борхес (Португалија, АТП 47).
Foto/ EPA

