Аталанта потврди дека го ангажирала 49-годишниот хрватски тренер Иван Јуриќ. Хрватскиот стручњак потпиша двегодишен договор со „Ла Деа“, до 30 јуни 2027 година.

Искусниот 49-годишен тренер од Сплит во текот на целата своја кариера тренираше италијански клубови (Монтова, Кротоне, Џенова, Верона, Торино и Рома), сè додека не го презеде Саутемптон минатата сезона.

Сепак, тој не успеа да го задржи овој клуб во Премиер лигата. Тој беше отпуштен по 13 порази во 16 натпревари. Оваа сезона, Аталанта го заврши италијанското првенство на третото место зад Наполи и Интер.

На 1 јуни, клубот од Бергамо го потврди заминувањето на долгогодишниот тренер Џан Пјеро Гасперини, кој ја предводеше Аталанта од 2016 година. Гасперини ќе ја предводи Рома во новата сезона.

Ла Лига продолжува да ги наградува Каталонците. На ред, сосема заслужено дојде Бразилецот Рафиња.

Еден ден откако Ханси Флик беше прогласен за најдобар тренер на годината, а Ламин Јамал за најдобар играч под 23 години, Рафиња ја доби титулата најдобар играч во Ла Лига за сезоната 2024/25.

28-годишното лево крило победи во голема битка против девет други кандидати. Меѓу нив беа и тројца негови соиграчи: Ламин Јамал, Роберт Левандовски и Педри Гонзалез.

Меѓу кандидатите беа и тројца фудбалери од Реал Мадрид, Килијан Мбапе, Винисиус Жуниор и Џуд Белингам. Исто така и Иско (Бетис) и Оихан Сансет (Атлетико Билбао).

Рафиња беше награден по незаборавната сезона со Барса во Ла Лига, во која постигна 18 гола и додаде 11 асистенции.

Шпанската Национална комисија за пазари и конкуренција (CNMC) соопшти дека отворила истрага против УЕФА поради сомневања дека се обидела да ја ограничи конкуренцијата во европските фудбалски натпреварувања со спротивставување на проектот Суперлига.

„CNMC ја истражува УЕФА во врска со можното нарушување на конкуренцијата во организацијата на европските фудбалски натпреварувања“, се вели во соопштението на државниот орган.

Постапката е покрената по жалба од компанијата „A22 Sports Management“, главен промотор на проектот Европска суперлига. Во центарот на вниманието, меѓу другото, е договорот што УЕФА наводно го склучила со девет европски клубови со цел да ги спречи да организираат или учествуваат во алтернативни натпреварувања.

CNMC додаде дека истрагата вклучувала и „низа мерки“ што УЕФА наводно ги вовела за да ги принуди клубовите да се придржуваат до забраната, вклучително и закани за исклучување од нејзините официјални натпреварувања.

По прелиминарна анализа на достапните информации, CNMC наведува дека постојат „индикации за можни прекршувања на законот за конкуренција“, но нагласува дека отворањето на постапката „не го нарушува исходот од истрагата“.

Проектот Суперлига, кој првично беше поддржан од 12 клуба, вклучувајќи ги Реал Мадрид и Барселона, беше претставен во 2021 година како алтернатива на Лигата на шампионите, но предизвика голем отпор од фудбалската јавност и меѓу навивачите.

Шест англиски клубови набрзо се повлекоа под притисок од домашните и европските институции, а потоа следеа и други.

Во мај 2024 година, шпанскиот суд пресуди дека ФИФА и УЕФА „злоупотребиле доминантна позиција“, потпирајќи се на претходна пресуда на Судот на правдата на Европската унија, кој утврди дека забраната за Суперлига е спротивно на европското право.

И покрај претходните неуспеси, идејата за алтернативно натпреварување беше оживеана кон крајот на 2023 година, кога „A22 Sports Management“, објави нов проект наречен “Unify League”, кој ќе вклучува 64 клуба распоредени во три лиги.