Новозеландскиот триатлонец Хајден Вајлд вчера освои олимписка бронза, што беше доволно неговата поранешна девојка да сфати што пропушта и јавно да признае дека жали што му раскинала.

Откако 23-годишниот Вајлд го освои медалот, локалната ТВ станица имаше интервју со неговото семејство и пријатели во Ватакејн, кога жената го имаше необичното признание.

„Жалам што раскинав со тебе. Горда сум на Хајден, на работата која ја заврши и за успехот кој го направи. Одевме во основно училиште заедно и навистина сум горда на неговиот успех“, изјави девојката.

Вајлд, пак, не ја прифати „стапицата“, изјавувајќи дека прво планира да се јави на својата сегашна девојка.

„Мислам дека прво ќе се јавам на девојката, која во моментов е во Шпанија. Таа стана рано наутро да ја гледа трката“, изјави триатлонецот.

Борусија Дортмунд го потврди трансферот на младиот холандски репрезетативец Донјел Мален од ПСВ Ајндховен верувајќи дека нивната скаут-служба повторно завршила добра работа и дека имаат фудбалер кој подоцна ќе може да го продадат за далеку повисока сума.

20-годишниот Мален потпиша договор со Борусија до 2026 година откако лани за ПСВ постигна 27 гола и имаше 10 асистенции во 45 меча, а двапати беше стрелец и за „оранје“.

„Борусија Дортмунд е врвен европски клуб, кој секогаш е на врвот на Бундеслигата и секогаш игра во Лигата на шампионите. Едвај чекам да се натпреварувам со најдобрите“, изјави Мален.

Мален треба да го заземе местото на Џејдон Санчо, кој замина во Манчестер јунајтед, а интересно, исто како на неговиот нов соиграч Ерлинг Халанд, агент му е славниот Мино Рајола. Германските медиуми тврдат дека Борусија платила 30 милиони евра, од кои дури 9 ги заработил Рајола.

Vorfreude auf Borussia!
Vorfreude auf Euch! pic.twitter.com/yJltjPW6hy

— Borussia Dortmund (@BVB) July 27, 2021

Хидилин Дијаз ќе биде запишана во историјата на Филипините откако го донесе првото олимписко злато во историјата на нацијата со над 100 милиони жители и за тоа ќе биде добро наградена од својата земја.

Дијаз, која служи во Воздухоплоството на Филипините и живее во Малезија поради пандемијата на Ковид-19, освои злато во кревање товар во категоријата до 55 килограми со последното кревање победувајќи ја светската рекордерка, Кинеската Лијао Киујун.

Дијаз освои сребро во Рио во категоријата до 53 килограми за да го освои првиот олимписки медал за Филипините по пауза од 20 години, но во Токио влезе во историјата. Таа ќе добие 33 милиони филипински пезоси за победата (над 500.000 евра), како и куќа. Нејзиното злато беше само 11. медал во историјата на Филипините, кои настапуваат на Олимпијадите од 1924 година.

„Сакам да ѝ порачам на младата генерација на Филипините: ‘И вие може да сонувате за овој златен сон’. Така и јас почнав“, изјави Дијаз.