Атлетико Мадрид доживотно суспендираше девет навивачи поради расизам и недолично однесување, објави клубот. Атлетико Мадрид ја заврши истрагата по инцидентите кои се случија на дербито против Реал Мадрид и на натпреварот од Лигата на шампионите против Бенфика.

За време на мадридското дерби беа фрлени голем број предмети и факели од долните трибини во јужниот дел на стадионот, додека во Лисабон дел од навивачите се однесуваа на расистички начин.

Процесот на идентификација на инволвираните траеше речиси еден месец, а клубот во соработка со полицијата го прегледа целиот аудиовизуелен материјал што беше на располагање.

Клубот успеа да идентификува девет лица на кои им беше доживотна забрана за присуство на натпреварите на Атлетико.

„Уште еднаш повторуваме дека силно го осудуваме секое изразување на насилство и нашата посветеност да се бориме против ваквите ставови на кои не им е место во фудбалот и кои го нарушуваат имиџот на Атлетико Мадрид“, соопштија од клубот.

Денвер Нагетс со ужасен финиш си дозволија пораз кај Минесота во реприза на минатогодишното нивно соочување во полуфиналето на плеј-офот. „Волците“ славеа со 119:116. Едвардс ги постигна решавачките поени, Гобер на 10 секунди до крајот реализираше две слободни фрлања, а потоа успеа доволно да му попречи на Јокиќ кој не успеа да избори продолженија.

Јокиќ го заврши натпреварот со 26 поени (8-16 од поле), 9 скока и 13 асистенции, Арон Гордон имаше 31 поен и 11 скока, Мајкл Портер Јуниор исто така постигна 31, а Џамал Мареј имаше 6 пред да ја напушти играта во третиот период по судирот со Рендл.

Јокиќ стана првиот играч во историјата кој забележал најмалку 150 поени и по 50 скока и асистенции во првите пет натпревари од сезоната.

„Мислам дека имавме осум поени предност во последните три-четири минути, но не ги реализиравме добро нападите, практично ги промашив сите мои шутеви во последните две-три минути. Дадоа лесни поени, стигнаа до отворени позиции. Овој пораз е моја одговорност, морам подобро да ги вклучам соиграчите. Лош финиш за мене“, изјави Јокиќ.

„Волците“ ги предводеше Едвардс со 29 поени (11-23 од поле), Џулиус Рендл додаде 23 поени, а Гобер 17 поени и 14 скока.

Резултати:

Шарлот – Бостон 109:124
Кливленд – Орландо 120:109
Детроит – Њујорк 98:128
Атланта – Сакраменто 115:123
Бруклин – Чикаго 120:112
Торонто – ЛА Лејкерс 125:131
Њу Орлеанс – Индијана 125:118
Портланд – Оклахома 114:137

Возачот на Мекларен, Оскар Пјастри, ја освои пол-позицијата за трката во спринт како дел од Големата награда на Бразил, во шампионатот на Формула 1.

Младиот Австралиец до пол-позицијата на „Интерлагос“ стигна со круг од 1:08,899 минути, 29 илјадитинки пред тимскиот колега Ландо Норис.

Третото место на стартот ќе го заземе возачот на Ферари, Шарл Леклер, кој заостана повеќе од две десетинки зад Норис.

Актуелниот шампион Макс Верстапен, кој моментално има 47 поени предност пред Норис во генералниот поредок, ја освои четвртата позиција, но поради казната бидејќи менуваше делови во моторот ќе стартува деветти.

Победникот на минатонеделната трка во Мексико Сити Карлос Саинц Јуниор во Ферари имаше петто време, пред возачот на Мерцедес Џорџ Расел и Пјер Гасли од Алпин. Топ десет го комплетираа возачот на РБ тимот Лиам Лосон, Алекс Албон во болидот на Вилијамс и дебитантот Оли Берман, кој го заменува болниот Кевин Магнусен во Хас, барем за спринтот.

Најголемите изненадувања во квалификациите за спринт во Сао Паоло беа забележани во вториот дел, кога беа елиминирани седумкратниот светски шампион Луис Хамилтон и вториот возач на Ред Бул, Серхио Перез. Британецот ќе стартува од 12.место, пред Нико Хилкенберг во болидот на Хас, Перез, возачот на Вилијамс Франко Колапинто и Валтери Ботас од Заубер.