Спорт
Колина е за подолги судиски продолженија: Никој не сака мечеви од 43 минути!

Пјерлуиџи Колина, славниот поранешен италијански судија, а сега шеф на судиската организација кај ФИФА е сигурен дека планот на светската федерација за големување на ефективното време на игра ќе биде успешно, посочувајќи дека никој не сака да гледа мечеви кои траат ефективно само 43 минути.
На Светското првенство во Катар, ФИФА ги изненади сите откако мечевите имаа по 10-тина минути продолжение во групната фаза, и Колина верува дека фудбалерите добиле лекција дека не треба да „трошат“ време. На состанокот на ИФАБ, телото кое ги утврдува фудбалските правила беше потврдено дека тој приод на долги судиски продолженија треба да се воведе глобално.
Според Колина, не се работи за додавање на дополнително време туку за компензирање на времето одзмено од повреди, замени, пенали, црвени картони, ВАР-проверки и прослави на голови. Според него, на СП во Катар имало просечна ефективна игра од 59 минути и 47 секунди по меч, во споредба со 55 минути и 41 секунди пред четири години во Русија. Во споредба во Премиерлигата просекот е 54 минути и 19 секунди.
„Мислам дека направивме нешто корисно на Мундијалот. Според бројките, тоа не се гледа. Минатиот викенд во Премиерлигата во 10 меча четири од нив имаа 10 минути, две 12 минути, а еден 14 минути судиско продолжение. Тоа значи дека веќе има мечеви од над 100 минути. Тоа не е ништо ново, но важно е да има постојаност. Критериумите се јасни и кога има постојаност секоја одлука подобро се прифаќа. Не се работи за дополнителна игра, туку за компензација на времето во кое не се игра. Не сакаме да дојдеме до 70 или 75 минути ефективна игра, но сакаме да избегнеме мечеви од 43 минути. Астон вила и Брентфорд оваа сезона играа 43 минути, и не верувам дека некој сака да гледа таков меч“, вели Колина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Драма во Шпанија: Тренерот на Жирона итно префрлен во болница

Фудбалскиот тренер на Жирона, Мичел Санчез, напиша на социјалната мрежа X дека е хоспитализиран, но не ги наведе причините поради кои е примен во болница.
„Морав да бидам хоспитализиран и ќе бидам под лекарски надзор неколку дена“, напиша Санчез, додавајќи дека се чувствува добро и со нетрпение очекува да се врати на клупата.
Поради здравствената состојба, Санчез нема да го предводи тимот на натпреварот против Виљареал во сабота. Жирона моментално е на 15-то место на табелата, шест бода над зоната за испаѓање, а до крајот на првенството остануваат уште четири кола.
Ниту клубот, ниту тренерот не објавија повеќе детали за неговата здравствена состојба.
„Се чувствувам добро, под надзор сум на лекар и ги бројам деновите до враќањето на работа за да можеме да ја продолжиме борбата до крајот на сезоната. Ќе бидам отсутен од теренот, но во постојан контакт со стручниот штаб“, рече Санчес.
Минатата сезона, Санчез го предводеше каталонскиот клуб до историско трето место во шпанското првенство. Сепак, тимот се соочи со проблеми оваа сезона откако клучни играчи го напуштија клубот за време на летниот преоден рок, па Жирона е само 15-та на табелата со 38 бода, и сè уште не ја надминала борбата за опстанок.
Спорт
Средба која се чека со години: Ана Ивановиќ и Ѓоковиќ повторно заедно?

Ана Ивановиќ и Новак Ѓоковиќ би можеле повторно да се сретнат за прв пат по долго време.
На турнирот во Женева, најдобриот тенисер на сите времиња, Новак Ѓоковиќ, ќе ги направи последните подготовки за Ролан Гарос, а се очекува да пристигне и некогашната српска тенисерка Ана Ивановиќ во својство на почесна гостинка и поранешна шампионка, пренесуваат српските медиуми.
Нивната средба би можела да се случи во многу деликатен момент за двајцата.
Имено, се повеќе се шпекулира дека Ана поминува низ брачна криза со Бастијан Швајнштајгер и дека развод е на повидок.
Од друга страна, Новак поминува низ чуден период. Од почетокот на годината, тој е далеку од препознатливо ниво, се откажа од мастерсот во Рим без конкретна причина, а се повеќе се шпекулира за крајот на неговата кариера.
Турнирот во Женева е закажан од 17 до 24 мај.
Спорт
Алонсо се збогуваше со Леверкузен: „Разговарав со играчите“
Веќе нема никаква дилема, Чаби Алонсо јавно потврди дека ја напушта клупата на Баер Леверкузен и дека ќе стане нов тренер на Реал Мадрид.
Официјална потврда дојде и од главниот актер.
На прес-конференцијата пред натпреварот од Бундеслигата против Борусија Дортмунд, Алонсо откри пред јавноста дека веќе разговарал со играчите и дека ќе се збогува со клубот во преостанатите два натпревари од сезоната.
„Оваа недела, клубот и јас се согласивме дека ова ќе бидат моите последни два натпревари во Леверкузен. Ова е вистинско време да го објавам тоа бидејќи секогаш имавме добра комуникација. Мораме да уживаме во овој момент со измешани емоции. Разговарав со играчите и персоналот, не беше лесно. Имавме одличен однос и тоа беше клучот. Тие веруваа во мене и ме следеа. Сакам да се збогувам на вистински начин овој викенд“, рече Алонсо.
Алонсо, поранешен шпански репрезентативец, играше за Реал Мадрид од 2009 до 2014 година за време на својата играчка кариера и освои бројни трофеи со Реал, вклучувајќи ја и Лигата на шампионите во 2014 година.