Спорт
Колку милиони луѓе ќе го гледаат финалето на Лигата на шампионите?

Европската фудбалска унија (УЕФА) процени дека, барем дел од финалето на Лигата на шампионите меѓу Манчестер сити и Интер ќе го гледаат околу 450 милиони гледачи ширум светот. Според проценките на УЕФА, околу 150 милиони луѓе треба да го гледаат целиот натпревар во Истанбул, додека останатите ќе гледаат дел од финалето.
Во евалуацијата се вклучени гледачите кои ќе го следат преносот дома, навивачите кои ќе го следат натпреварот преку стриминг платформите и оние кои ќе го следат натпреварот во барови, ресторани и други јавни места.
Бројката од 150 милиони е помала од рекордните 184 милиони кои го гледале финалето на Лигата на шампионите во 2014 година, кога Реал Мадрид го победи градскиот ривал Атлетико со 4:1 по продолженијата.
Најавениот понизок рејтинг оваа година го одразува менувањето на навиките за гледање и отсуството на Реал Мадрид, кој има голема база на навивачи ширум светот.
Минатогодишното финале помеѓу Реал и Ливерпул (1:0) во просек го гледале 166 милиони луѓе, а финалето меѓу двата исти тима во 2018 година го гледале пет милиони помалку.
Финалето помеѓу Ливерпул и Тотенхем во 2019 година во просек го гледале само 91 милион луѓе, додека најмала гледаност во последните 15 години е забележана во 2021 година, кога се сретнале два англиски клуба – Манчестер сити и Челзи (84 милиони).
Помалата гледаност е под влијание и на деловната политика на УЕФА, која дава сè помалку права за емитување на основните телевизиски канали.
Договорите за емитување со приватна телевизија ја доведоа УЕФА до приход оваа сезона од околу 3,6 милијарди евра за сите три натпреварувања (Лига на шампиони, Лига Европа, Лига на конференции).
Клубовите кои годинава играа во Лигата на шампионите (32) ќе добијат повеќе од две милијарди евра од УЕФА, а најголема сума ќе добие Манчестер сити (најмалку 120 милиони евра).
Вечерва од 21 часот се игра финалето помеѓу Манчестер сити и Интер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Реал Мадрид издвојува најмногу за плати од сите клубови во Европа

Реал Мадрид и во новата сезона 2025/2026 го потврдува статусот на клуб со највисоки плати во европскиот фудбал. Според податоците на специјализираните страници „Betideas“ и „Capology“, просечната годишна плата на играчите на „кралскиот клуб“ е 11,2 милиони евра.
Оваа бројка е дури за 60 проценти повисока од сумата што ја издвојуваат повеќето други европски гиганти. Интересно е што ова е сепак мало намалување во споредба со минатата сезона, кога просекот беше малку повеќе од 12 милиони евра.
Далеку зад Реал Мадрид е нивниот најголем ривал, Барселона, чии играчи заработуваат просечно 7,91 милиони евра годишно. Каталонците исто така забележаа пад, со оглед на тоа што минатата сезона просекот беше 8,5 милиони евра.
Третото место на рангирањето го зазема Манчестер сити со просечна плата од 7,43 милиони евра. Сепак, за разлика од шпанските гиганти, англискиот клуб ја зголеми својата сметка за плати за повеќе од еден милион евра во споредба со претходната сезона.
По водечкото трио следува Баерн Минхен со 7,38 милиони евра, потоа Пари Сен Жермен и Арсенал, кои издвојуваат околу 7 милиони евра за просечна плата.
Клубови со највисоки просечни бруто плати во светот
1. Реал Мадрид – 11,2 милиони евра
2. Барселона – 7,9 милиони евра
3. Манчестер Сити – 7,43 милиони евра
4. Баерн Минхен – 7,38 милиони евра
5. ПСЖ и Арсенал – 7 милиони евра
6. Ливерпул и Манчестер Јунајтед – 6 милиони евра
7. Челзи и Тотенхем – 4,5 милиони евра
Foto/ EPA/J.L. Cereijido
Спорт
Нико Ковач го продолжи договорот со Дортмунд

Тренерот на Борусија Дортмунд, Нико Ковач, го продолжи договорот со „милионерите“ до јуни 2027 година, објави германскиот клуб.
„Нико целосно се посвети на својата улога во Дортмунд. Тој многу добро го познава фудбалот, има јасни принципи, е искрен и директен во комуникацијата и наградува добра работа“, изјави Ларс Рикен, спортски директор на Дортмунд.
Ковач, кој претходно освои трофеи со Баерн Минхен и Ајнтрахт Франкфурт, го презеде тимот во февруари кога беа 11-ти на табелата во Бундеслигата, по лошиот почеток под водство на Нури Сахин.
Под негово водство, тимот стана многу постабилен и ја заврши сезоната на четвртото место, со што ја обезбеди Лигата на шампионите.
Медиумите известуваат дека клубот преговара со Челзи за потпишување на договорот со аргентинскиот стопер Арон Анселмино, со цел зајакнување на одбраната.
„Веруваме дека тука, заедно со клубот и навивачите, можеме да постигнеме нешто посебно. Нашите разговори во последните недели го зајакнаа моето верување дека можеме да изградиме долгорочен успех врз основа на досегашните резултати и да ја вратиме Борусија таму каде што припаѓа“, изјави 53-годишниот Ковач.
Спорт
Кадилак го потврди и Серхио Перез

Кадилак од наредната сезона ќе се натпреварува во шампионатот на Формула 1. Минатата недела тимот го потврди дека еден од возачите ќе биде Валтери Ботас, а денес потврда дојде и за Серхио Перез.
Мексиканецот и Финецот имаат многу искуство зад себе, бидејќи во својата богата кариера возеа и за Ред Бул и за Мерцедес во своите најдобри сезони. Ова ќе биде интересен тим, бидејќи за прв пат ќе имаат можност да се борат за статусот на прв возач, што не беше можно ниту за Перез поради Ферстапен, ниту за Ботас поради Хамилтон.
„Потпишувањето на овие двајца возачи е голем чекор за овој нов тим. Сите ги познаваат, додека тие знаат како да бележат одлични резултати во Формула 1“, соопштија од Кадилак.
Од следната сезона, Формула 1 ќе претрпи големи промени, буквално „најбрзиот циркус“ ќе влезе во нова ера, со нов тим во името на Кадилак, кој ќе настапува во докажан состав.
Серхио Перез не е во караванот на Формула 1 оваа сезона, додека Валтери Ботас е трет возач во тимот на Мерцедес.