Спорт
Компани: Проблемот со расизмот е во институциите, требаат строги казни

Белгискиот фудалер, Венсан Компани одлучи да застане во одбрана на својот соиграч од репрезентацијата на Белгија, Ромелу Лукаку, кој изминатите денови беше жртва на расистички испади од навивачите на Калјари.
Група навивачи на Интер, клубот на Лукаку, вчера издадоа соопштение во врска со случајот, а во одбрана на „колегите“ од Калјари. Во соопштението се наведува дека тоа што од трибините се слушале звуци кои потсетуваат на мајмунски, нема врска со расизмот, туку дека во Италија така се збунуваат противничките играчи.
Компани смета дека токму соопштението е критично затоа што во него се гледа дека луѓето не ја разбираат суштината на расизмот, како ни тоа како се чувствувал Лукаку додека ги слушал извиците од трибините.
„Прочитав што напишаа навивачите и дури сега сфатив дека проблемот е уште поголем од што мислев. Најголем проблем се институциите, кои не санкционираат како што треба. Да се казнуваа клубовите, репрезентациите и поединци пред 5 години кога се појавија првите проблеми, денес немаше да биде до овде. ФИФА и УЕФА, фудбалските сојузи на државите, како и лигите мораат да воведат строги казни за да ги доведат работите во нормала. Вака имате еден куп луѓе кои го навредуваат играчот на терен и уште сметаат дека тоа не е навредување. Никој на тоа не реагира, а никој не ни знае како се чувствува Лукаку кога ќе ги чуе извиците, за кои велат дека не се расистички“ – изјави Компани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Панчев: Хуманитарен меч Вардар-Црвена звезда на 16. април

Легендата на македонскиот, југословенскиот фудбал и Црвена звезда, Дарко Панчев е скршен од тага по трагедијата во Кочани, во која во пожар во дискотеката „Пулс“ загинаа 59 лица, а преку 150 се повредени.
Европски и светски шампион со Црвена звезда, Панчев во разговор за „Спортклуб“, откри дека разговарал со генералниот директор на најтрофејниот српски клуб, Звездан Терзиќ, црвено-белите да му гостуваат на Вардар во Скопје. Идеката на Панчев е да се одигра хуманитарен натпревар.
„Останува само да се одреди датум, Црвена звезда за се ќе се договори со Вардар, директорот Терзиќ го спомна 16 април, благодарам, што друго да кажам. Во име на Кочани, Скопје и цела Македонија, Ви благодариме за грижата, за тоа што се прави за повредените, за нивниот транспорт и за лекувањето во Србија, благодареност до братскиот народ“, рече Панчев.
Спорт
Аргентина без Меси против Уругвај и Бразил

Капитенот на Аргентина, Лионел Меси нема да настапи на претстојните натпревари против Уругвај и Бразил.
Откако синоќа блескаше во победата над Атланта во МЛС лигата, Меси заработи повреда на мускулот, а по тестовите беше одлучено дека во овој прозорец нема да настапува за репрезентацијата.
Аргентина веќе обезбеди пласман на Мундијалот, прва е во јужноамериканскиот поредок со 25 бода, пет повеќе од Уругвај, па Лионел Скалони не сакаше ништо да ризикува.
Иако најави пензионирање, Меси сепак ужива во дресот на „гаучосите“, па останува да се види дали ќе игра и на СП 2026 година, кое сега не е така далеку, за нешто повеќе од една година.
Спорт
Стефан Ристовски ќе го напушти Динамо Загреб

Поранешниот капитен на фудбалската репрезентација на Македонија, Стефан Ристовски, веројатно ќе го напушти Динамо Загреб по завршувањето на сезоната. Ристовски, еден од капитените на најтрофејниот хрватски клуб со доаѓањето на тренерот Фабио Канаваро остана без местото во стартната посатав.
Договорот на Ристовски истекува на 30 јуни 2025 година, а потоа ќе стане слободен играч доколку, се разбира, во меѓувреме не потпише нов договор со актуелниот хрватски шампион. Платата на Ристовски според сегашниот договор е околу 700.000 евра годишно.
„Индекс“ пишува дека на подготовките му бил понуден нов договор, но со значително намалување. Новиот договор би бил за најмалку една третина помал од стариот, што значи дека Ристовски би можел да заработува околу 450 илјади евра годишно.
Во овој момент одлуката на Ристовски не е потврдена, но тој најверојатно нема да потпише нов договор. Проблемот не е во парите, туку во тоа што не е задоволен од статусот што би можел да го има следната сезона на „Максимир“.
Тој има 33 години и се уште може да најде сериозна минутажа во европскиот фудбал, а источните лиги и земјите кои нудат профитабилни договори се секогаш опција за играчите кои се пред крајот на кариерата.
Ристовски одигра 177 натпревари за Динамо и одигра важна улога во освојувањето на многу трофеи, но се чини дека и клубот и тој се повеќе се свесни дека влегуваат во нова ера.