Спорт
КОНМЕБОЛ жестоко ги казни Индепендиенте и Унивесидад де Чиле

Аргентинскиот клуб Индепендиенте е дисквалификуван од Купот Судамерикана, по насилните инциденѕи меѓу навивачите за време на натпреварот против Универсидад де Чиле пред две недели во близина на Буенос Аирес, објави во четврток Јужноамериканската фудбалска конфедерација (КОНМЕБОЛ).
19 лица беа повредени во тепчките меѓу навивачите на Индепендиенте и Универсидад де Чиле, во кои беа употребени палки и пиротехника.
Аргентинскиот клуб, исто така, ќе мора да ги игра следните 14 натпревари на турнирите на КОНМЕБОЛ без свои навивачи и да плати казна од 250.000 долари, одлучи Јужноамериканската фудбалска конфедерација.
Управното тело, исто така, му изрече казна на чилеанскиот клуб, кој мора да плати 270.000 долари, а двата тима ќе играат седум домашни натпревари пред празни трибини и седум гостувања без свои навивачи.
Универсидад де Чиле се пласира во четвртфиналето, каде што ќе се соочи со Алијанц Лима од Перу.
Одлуката дојде откако официјалните лица го прекинаа натпреварот на 20 август на „Естадио Либертадорес де Америка“ во Буенос Аирес поради недостаток на обезбедување по инцидентите што резултираа со сериозни повреди и повеќекратни апсења.
За време на натпреварот, чилеанските навивачи фрлаа предмети кон локалните навивачи, кои одговорија со влегување во гостинскиот сектор за да ги претепаат.
Во моментот на паузата, тимовите беа изедначени 1:1, што му одеше во корист на чилеанскиот тим, кој го доби првиот натпревар со 1:0.
Фото/ Принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Вареловски: Со победа денеска нештата да тргнат на подобро за Тиквеш

Тиквеш се соочува со проблеми уште од почетокот на сезоната, но се чини дека полека работите доаѓаат на своето место и се верува дека токму по денешниот натпревар следуваат подобри резултати во Првата фудбалска лига.
Кавадарчани во моментов се на десеттото место на табелата со пет освоени бода и со евентуален триумф денеска на свој терен од 15:00 часот против Македонија ЃП, нештата може само да се подобрат што е и примарна цел за сите во клубот.
„Мора да се признае дека ова е турбулентен период за Тиквеш. Доколку победиме денеска ќе се вратиме во нормален тек. На гостувањето против Шкендија одигравме добро и штета што не успеавме да освоиме бод. Очекувам дека во иднина ќе постигнуваме подобри резултати. Ако ја погледнете табелата самите ќе се уверите дека екипите се израмнети. Ние имавме лош старт на сезоната, но конкуренцијата е израмнета и поради тоа ние немаме поголемо заостанување зад останатите екипи. Играме добро, создаваме шанси, но за жал постигнавме само три гола што значи дека мораме да ја подобриме реализацијата. Се надевам дека бргу ќе излеземе од кризата “, изјави искусниот Александар Вареловски.
Спорт
ФИФА суспендираше седум репрезентативци на Малезија поради фалсификување на документи

Дисциплинскиот комитет на ФИФА донесе строги мерки против Фудбалската асоцијација на Малезија (ФАМ) и седум интернационални фудбалери – Габриел Палмеро, Факундо Гарсес, Родриго Холгадо, Иманол Мачука, Жоао Фигеиредо, Џон Иразабал и Хектор Хевел – поради злоупотреба на документи и прекршување на Дисциплинскиот кодекс. Играчите имаат аргентинско, шпанско, бразилско и холандско потекло, а Гарсес настапува за шпанскиот тим Алавес од Ла Лига.
Според објавеното, ФАМ поднела лажни документи до ФИФА за овие играчи да можат да играат за Малезија против Виетнам во третото квалификациско коло за Азискиот куп на 10 јуни.
Како резултат на тоа, Малезија ќе треба да плати казна од 350.000 швајцарски франци, додека секој од фудбалерите ќе мора да уплати по 2.000 франци.
Покрај финансиската санкција, сите седум играчи се суспендирани од фудбалски активности на период од 12 месеци од денот на објавувањето на одлуката. Оваа одлука може да се обжали пред Апелацискиот комитет на ФИФА.
Спорт
ПСЖ остана без Маркињос во наредните неколку седмици

Бразилскиот фудбалер и капитен на Пари Сен Жермен, Маркињос, го повреди левиот бутен мускул и нема да игра во наредните неколку недели, соопшти клубот од Париз.
ПСЖ не прецизираше кога Бразилецот ја добил повредата, иако тој одигра цел натпревар против Марсеј (1-0) во понеделникот, како и натпреварот од Лигата на шампионите минатата недела против Аталанта (4-0).
Маркињос така ѝ се приклучи на листата на повредени во која веќе се наоѓаат Осман Дембеле, Дезире Дуе и Жоао Невеш, кои се во процес на рехабилитација, се наведува во лекарското соопштение на клубот.
На утринскиот тренинг во петокот тие отсуствуваа, додека играчот од средниот ред Фабијан Руиз работеше одвоено од екипата. Бредли Баркола, кој имаше проблеми со бутниот мускул и поради тоа го пропушти дуелот со Марсеј, се врати во тренажен процес.
ПСЖ во среда ќе ја пречека Барселона во Лигата на шампионите, а веќе на 5 октомври ќе игра против Лил во Лига 1.