Стефан Петерхансел е поим за Дакар релито, откако францускиот возач ја обезбеди својата 14-та титула од славното рели на изддржливост во Саудиска Арабија, победувајќи ги старите ривали Насер Ал-Атијах и Карлос Саинс за титулата.

Иако оствари само една етапна победа, искуството на 55-годишниот Петерхансел беше клучно, откако тој беше во водство од втората етапа до крајот, за на крај да победи со 14:51 пред Ал-Атијах во Тојота. Само еднаш тој не беше во топ 3 и во ниту една минута не загуби повеќе од 5 минути пред конкуренцијата.

Овој триумф доаѓа неверојатни 30 години по првиот успех на Французинот на Дакар, каде што победи со Јамаха, во класата на мотоцикли. Петерхансел дебитираше на Дакар во 1988 година, и ги освои титулите за мотоцикли во 1991, 1992, 1993, 1995, 1997 и 1998, пред во 1999 година да се пресели на автомобили. Со Мицубиши победи во 2004, 2005 и 2007, со Мини во 2013, за во 2014 во последната етапа да му биде наредено да го пушти Нани Рома да го претекне во последната етапа. Затоа, тој во 2015 замина во Пежо, кои се вратија на Дакар првпат од 1990, за со нив да ги обезбеди 12. и 13. титула во 2016 и 2017.

Кај мотоциклистите првата титула во кариерата ја освои Аргентинецот Кевин Бенавидес, изддржувајќи го притисокот на Сем Сандерленд. 32-годишниот Бенавидес е првиот Аргентинец со титула кај мотоциклистите.

Во изјава за „Sky Sports“ францускиот репрезентативец во редовите на Манчестер Јунајтед, Пол Погба вели дека Јунајтед во моментов не е на нивото на Ливерпул, но може да ја освои шампионската титула во Премиерлигата уште во оваа сезона.

По 17 одиграни кола, „ѓаволите“ се на врвот на табелата со 3 бода повеќе од „црвените“ пред неделното дерби на „Енфилд“ од 17.30 часот.

„Многу напредувавме и се уште напредуваме, но и понатаму сме млада екипа. Очигледно не може да кажеме дека сме на нивото на Ливерпул затоа што тие ја освоија Премиерлигата и продолжуваат со победите, но кога ние ќе го освоиме првенството, ќе може да кажеме дека сме на исто ниво. Ако сакаш да си најдобар, тогаш мора да ги победуваш најдобрите. Сакаме да ги победиме освојувачите на ПЛ“ рече Погба.

Французинот немаше сјајна мината сезона, па полека се врати во препознатливата форма.

„Мразам да бидам на клупа, тоа не значи дека другите не заслужуваат да играат. Јас сум победник и сакам да играм, сакам да им помогнам на соиграчите. Минатата сезона беше тешка за мене, имав повреда, секогаш е чудно кога се враќаш. Играчите кои се со мене во средниот ред (Фред, Немања Матиќ, Скот Мектоминај) прават одлична работа“ – рече Погба.

Македонската ракометна репрезентација синоќа со пораз од фаворитот Шведска (30-22) го започна своето седмо учество на Светските ракометни првенства. Токму на вчерашниот меч во Каиро капитенот на репрезентацијата, Кире Лазаров влезе во историјата.

Тој стана првиот играч кој постигнал гол на Светско првенство во четири различни декади.

Првиот негов погодок на Мундијалите беше во истата сала во која настапи и синоќа, во Каиро, во далечната 1999 година, како 19-годишник во последните секунди на мечот што Македонија го доби против Саудиска Арабија.

Против Швеѓаните вчера со полни 40 години гаѓаше со 50-процентна успешност, 5 гола од 10 обиди.