Фудбалерот на Евертон, Ришарлисон, се согласи да се пресели во Тотенхем, тврдат медиумите на Островот. Се очекува тој летово да го напушти тимот од „Гудисон Парк“, откако Евертон е принуден да продаде една од своите ѕвезди за да ја подобри финансиската состојба.

Бразилецот наводно ги договорил сите услови со тимот од Лондон, имал разговор и со менаџерот Антонио Конте, а клубовите треба брзо да ги договорат и последните детали.

Минатата сезона бразилскиот фудбалер беше единствената светла точка на „карамелите“ во борбата за опстанок. И покрај тоа што Евертон ја заврши сезоната на 16. позиција во Премиер – лигата, Ришарлисон постигна 11 гола на 33 натпревари и додаде уште пет асистенции.

Македонскиот репрезентативец Елиф Елмас бара гаранции дека следната сезона ќе биде стандарен првотимец на Наполи. Во спротивно, би можел и да прифати една од понудите за трансфер, откриваат медиумите во Италија.

Во последниот период, Фиорентина и Валенсија се клубовите кои најмногу се интересираат за неговите услуги.

Минатата сезона Елмас одигра голем број натпревари, но многу често стартуваше од клупата за резерви. Тој смета дека во претстојната сезона треба да се изгради како стандарден првотимец на Наполи.

Елмас побарал од тренерот Лучијано Спалети и раководството на Наполи одредени гаранции дека неговата кариера ќе се развива во посакувана насока на стадионот „Диего Армандо Марадона“.

Барселона на стартот на следната седмица ќе ги започне подготовките за новата сезона, а голема бура на „Камп Ноу“ предизвика информацијата дека тренерот Чави Хернандез на четворица фудбалери им порачал да си најдат други клубови. Како што открива „Мундо Депортиво“, станува збор за Оскар Мингеза, Самуел Умтити, Рики Пуиг и за Мартин Брајтвајт.

Тренерот Чави Ернандез им испратил порака дека нема да смета на нив во претстојната сезона и тие се слободни да си побараат нова средина.

Барселона се надева дека во следните две седмици ќе го продаде и Френки де Јонг кој треба да замине во Манчестер Јунајтед. Сепак, фудбалерот многу се колеба дали треба да ја продолжи кариерата на „Олд Трафорд“.