Спорт
Лацио го прегази СПАЛ за да го помине Интер, само „нула“ за Милан против Верона (видео)

Лацио, барем привремено, се искачи на второто место во италијанската Серија А, откако стигна до доминантна 5:1 победа над СПАЛ, Милан не успеа да ја победи Верона и покрај тоа што гостите играа со 10 играчи последните 20 минути, додека Џенова на Горан Пандев стигна до храбро 2:2 реми кај силната Аталанта.
Чиро Имобиле даде два гола, а Лацио дури четири во првите 38 минути игра на „Олимпико“, за на крајот да се стигне до 5:1 победа, со која се на второто место на табелата со 49 поени, еден повеќе од Интер, кој вечер игра со Удинезе. Јувентус се први со 54 поени.
Милан пак, прими гол уште во 13-тата минута преку Фараони за шок на „Сан Сиро“, но Хакан Чалханоглу повторно ги спасуваше „росонерите“ во 39. минута од мечот. Софјан Армабат во 68. минута доби црвен картон, но „росонерите“ не успеаја да го скршат отпорот.
Џенова втор натпревар едноподруго освојува поен по низата од три порази, откако на гостувањето кај Бергамо одигра 2:2 со Аталанта. Четирите гола паднаа во првото полувреме, додека Горан Пандев не доби шанса да заигра.
СЕРИЈА А, 22.КОЛО
Милан – Верона 1:1
Аталанта – Џенова 2:2
Лацио – СПАЛ 5:1
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
(Видео) Црна Гора испадна од ЕП, Вучевиќ во солзи се збогува со репрезентацијата

Кошаркарската репрезентација на Црна Гора доеживеа елиминација од Евробаскетот. Во последниот натпревар во Б групата, Црна Гора загуби од Велика Британија 89:83. Пред дуелот меѓу Шведска и Литванија, три селекции имаат по една победа, во тој круг најдобра е Шведска која од четвртото место ќе оди во осминафиналето.
Натпреварот во Тампере беше последен во дресот на националниот тим за Никола Вучевиќ. Центарот на Чикаго Булс единствен беше на потребното ниво против Велика Британија со 31 поени, 11 скока и седум асистенции.
Солзите на Никола Вучевиќ во микс зоната на „Нокиа Арена“ во Тампере ќе останат единствената слика што ќе се памети од петтиот настап на Црна Гора на Евробаскетот.
„Имаше некои ситуации, но не е вина на судиите, туку наша вина. Многу грешки за натпревар од вакво ниво. Им дозволивме повеќе отколку што тие самите можеа. Немавме фокус, енергија и желба за игра… Не знам… Едноставно не игравме на нивото, не ја оправдавме улогата на фаворити, не бевме на потребното ниво. Наша вина е“, рече Вучевиќ.
Вучевиќ потврди дека денешниот дуел беше негово збогување со репрезентацијата.
„Имаше добри и лоши моменти, што е дел од кариерата. Би сакал да им се заблагодарам на сите, почнав како кадет, би сакал да им се заблагодарам на сите мои соиграчи со кои поминав низ многу работи и ќе ги паметам тоа – тие пријателства. Што се однесува до самата кошарка, тоа Светско првенство останува како добар спомен, денес жалам што не успеавме, ова ќе беше голем успех. Благодарност до навивачите кои секогаш нè следеа“.
Foto/ EPA
Спорт
Димоски го потпиша договор со ТСЦ

Фудбалскиот клуб ТСЦ го официјализира трансферот на репрезентативецот на Македонија, Бојан Димоски, објави клубот од Бачка Топола.
Димоски (23) пристигна во ТСЦ од Акрон од Тољати. Вториот дел од минатата сезона го помина како позајмен во Партизан, а за „црно-белите“ одигра само четири натпревари.
Кариерата ја започна во младинските категории на Тетекс, а потоа играше за Вардар, за кој дебитираше како 17-годишник во февруари 2019 година, и за Академија Пандев, каде што стана стандарден член, а подоцна и капитен на тимот.
Потоа Димоски потпиша договор со рускиот клуб Акрон Тољати, а во февруари 2025 година се приклучи на Партизан како позајмен играч. Црно-белите не ја активираа опцијата за откуп.
Димоски ги помина сите македонски младински селекции, а дебитираше и за сениорската репрезентација на Македонија во јуни 2022 година против Гибралтар во Лигата на нации на УЕФА.
Фото/ Принтскрин
Спорт
Министрите за спорт од Србија и од Црна Гора дел од Првиот регионален спортски самит во Скопје

Под покровителство на Министерството за спорт и министерот Борко Ристовски, а во организација на Why Not Group, на 10 септември 2025 година, во DoubleTree by Hilton Skopje, ќе се одржи Првиот Регионален Спортски Самит – Скопје 2025.
Овој исклучително важен настан ќе ги обедини највисоките носители на спортските политики од регионот, вклучувајќи ги и министрите за спорт од Република Србија и Црна Гора. Своето присуство официјално го потврдија Министерот за спорт на Република Србија, Зоран Гајич, како и Министерот за спорт и млади на Црна Гора, Драгослав Шчекич, кои заедно со Министерот за спорт на Република Северна Македонија ќе бидат дел од клучните дискусии за иднината на спортот во регионот.
Овој значаен собир, прв од ваков вид во нашата земја, претставува чекор напред во градењето на силни регионални врски меѓу институциите, федерациите, спортските организации и бизнис-секторот. Самитот ќе овозможи без преседан дијалог и соработка за унапредување на спортската инфраструктура, поддршка на младите таленти, и позиционирање на спортот како стратегиска алатка за општествен развој.
Настанот ќе се одвива под мотото „Спортот како национален идентитет и визија за иднината“, нудејќи уникатна можност за размена на идеи, инспирација и градење на долгорочни стратегии за спортскиот развој на национално и регионално ниво.
Преку панел-дискусии, работилници и сесии за вмрежување, учесниците – меѓу кои министри, спортски федерации, претставници на спортски клубови, бизнис лидери, академии, медиуми и визионери – ќе имаат можност да иницираат конкретни проекти и партнерства насочени кон унапредување на спортот, промоција на здравиот начин на живот и зголемување на улогата на спортот во креирањето одржливи општества.
Првиот Регионален Спортски Самит – Скопје 2025 претставува стратешки значаен настан што ќе го постави Скопје на мапата на главните регионални центри за спортски дијалог, соработка и развој. Очекуваното присуство на бројни делегации и високи гости ја потврдува важноста на иницијативата и отвора нови перспективи за регионална синергија во областа на спортот.