Барселона го победи Виљареал со 3.1, во последниот натпревар од саботната програма во Ла Лига. Звучи неверојатно, но ова е прва гостинска победа сезонава, во шестиот меч, за Барселона во домашниот шампионат. Со овој триумф „Блауграна“ се доближи на само еден бод од шестопласираниот Бетис.

Херојот на Барселона е Мемфис Депај, кој во 88.минута ја искористи лошата реакција на Еступињан, го мина голманот Рули и низ нозете на левиот бек на Виљареал ја погоди мрежата.

Исклучително интересно беше првото полувреме, двата тима промашија неколку добри шанси и на одмор замина со 0:0.

На стартот од вториот дел, во 48.минута Де Јонг погоди за предност на Барселона. Израмни Чукуезе во 76.минута. По израмнувачкиот гол Виљареал тргнаа во офанзива, но не успеаја да направат пресврт.

Депај ги згасна нивните надежи, а конечниот резултат го постави Кутињо од пенал во 94.минута.



Интер, во последниот натпревар од саботната програма во Серија А, победи во Венеција 2:0. Со оваа победа Интер, со натпревар повеќе им се доближи на само еден бод, на лидерите Наполи и Милан.

Човекот на одлука беше Хакан Чалханоглу. Турскиот репрезентативец постигна убав гол во 34.минута.

Конечниот резултат го постави Лаутаро Мартинез од пенал во 96.минута.



Австриецот Матијас Мајер победи на спуст трката која се одржа во Лејк Луис, Канада. Победата во Канада е 11 во кариерата на Мајер. Двократниот олимписки шампион победи со време 1:46.74 минути.

Мајер за 23 стотинки беше побрз од сонародникот Винсент Крихмајер. Актуелниот победник во оваа дисциплина, Швајцарецот Беат Фојз го освои третото место.

Утре во Лејк Луис ќе се вози трката во Супер-Џи.