Напаѓачот Ромелу Лукаку даде опширно интервју за „DAZN“ во кое зборува за неговата тешка сезона во Челси и неговото враќање во Интер.

„Сезоната во Челси ми даде дополнителна мотивација да бидам уште подобар од порано. Мислам дека за една година сите заборавија на работите кои сум способен да ги направам на теренот. Тоа е еден вид на гнев што го имам во себе. Тимот исто така е максимално мотивиран, откако не успеа да ја освои титулата минатата сезона. Сите заедно се надеваме дека ќе бидеме многу подобри и дека ќе освоиме трофеи во новата сезона“, изјави Лукаку.

Интер во првото коло од новата сезона во Серија А му гостува на Лече.

Носителот на трофејот во Лигата на шампионите, Реал Мадрид, вечерва (21 часот) ќе се соочи со победникот во Лигата на Европа, Ајнтрахт Франкфурт, на Олимпискиот стадион во Хелсинки, во пресметката за Суперкупот на УЕФА. „Кралевите“ го совладаа Ливерпул на „Стад де Франс“ и по 14. пат се искачија на кровот на Европа, додека „орлите“ го победија Глазгов Ренџерс на пенали и го освоија вториот европски трофеј во клупската историја.

Реал и Ајнтрахт ќе се сретнат само вторпат. Првата и единствена досегашна пресметка меѓу двата тима беше во финалето на КЕШ во 1960 година, кога „кралевите“ победија со 7:3.

За Реал Мадрид ова ќе биде осми настап во меч за Суперкупот на УЕФА. Досега има четири победи и три порази на овие натпревари. Само Милан и Барселона имаат освоено повеќе вакви трофеи – по пет.

Ајнтрахт ќе дебитира во Суперкупот.

Реал Мадрид одигра само три пријателски натпревари, а тимот на Карло Анчелоти се уште се подготвува за новата сезона. Во првиот дуел „белите“ загубија со 0:1 од големиот ривал Барселона во Лас Вегас. Реал потоа ремизираше 2:2 со Клуб Америка, а на самиот крај на јули Карим Бензема и друштвото го победија Јувентус со 2:0.

Ајнтрахт Франкфурт веќе ја започна новата сезона во Бундеслигата, но првиот меч беше катастрофален – пораз од шампионот Баерн Минхен со 1:6 на домашен терен. Сепак, германскиот тим верува дека може да покаже поинакво лице против Реал Мадрид на вечерашниот супер-дуел во Хелсинки.

Италијанскиот калчолигаш Рома ја одби понудата на Тотенхем за офанзивниот играч за врска, Николо Заниоло. Лондончани упатија понуда да го земат играчот на позајмица со задолжителна откупна клаузула за 20 милиони фунти.

Раководството на Рома смета дека тоа е потценувачка понуда, бидејќи очекуваат најмалку 50 милиони евра за 23-годишниот италијански репрезентативец.

Разговорите меѓу двата клуба продолжуваат, а Антонио Конте би сакал да го има Заниоло во тимот на Тотенхем оваа сезона.