Фудбалерите на АП Брера забележаа две победи на последните три натпревари и забележаа скок на табелата, но сега сакаат да продолжат во ист стил и на гостувањето во Скопје, на дуелот со Работнички. Се чини дека гостувањата засега се „слабата точка“ на струмичани и сакаат тоа да се подобри уште на овој меч со „романтичарите“.

Младиот стратег Мартин Алаѓозовски вели дека тимот е подготвен за надигрување.

„Го респектираме Работнички, мислам дека имаат многу квалитетен состав. Но, и ние сме мотивирани да одиграме добро на Арената во Скопје и да освоиме бодови. Доаѓаме да се надигруваме, имаме тим кој има што да каже на секој натпревар во елитата. Ќе сториме сѐ да освоиме бодови и да продолжиме со позитивен тренд во шампионатот“, вели шефот на стручниот штаб на АП Брера.

Натпреварот меѓу Работнички и АП Брера се игра од 15:00 часот на Националната Арена „Тодор Проески“ во Скопје.

По секој пораз на Манчестер Јунајтед, веднаш се отвора темата за можна смена на менаџерот Рубен Аморим. Веќе се пишуваше за причините за потенцијалниот отказ на Португалецот, а англиските медиуми објавија и листа на можни наследници.

Според информациите, во игра се тројца менаџери, Андони Ираола, Оливер Гласнер и Герет Саутгејт.

Англиските извори велат дека Џим Ретклиф во последните денови бил во директен контакт со Саутгејт, кој е единствениот од листата што во моментов не е ангажиран.

Саутгејт веќе неколку пати беше поврзуван со клупата на Манчестер Јунајтед, дури и кога заминуваше Ерик тен Хаг, но тогаш Аморим беше прва опција. Сега изгледа дека португалскиот стратег нема лесно да го задржи местото, а потребно е ново решение.

Ираола и Гласнер моментално се во силни позиции во своите клубови, нема причина да заминат, ниту пак Борнмут и Кристал Палас ќе ги пуштат по одличниот старт на сезоната.

Тимот на Оливер Гласнер е единствен непоразен од почетокот на новата сезона, а ако се земат предвид и резултатите од минатата сезона, Кристал Палас има серија од дури 18 натпревари без пораз. На сето тоа треба да се додаде и фактот дека Гласнер успеа да ја одржи формата и по заминувањето на неговите две најголеми ѕвезди, Мајкл Олисе во Баерн Минхен минатото лето и Еберечи Езе во Арсенал ова лето.

Ираола исто така постигнува импресивни резултати во Борнмут, иако ова лето го загуби целиот одбранбен ред, Дин Хаусен, Илија Забарњи и Милош Керкез заминаа во Реал Мадрид, ПСЖ и Ливерпул.

Борнмут заработи 200.000.000 евра, но доведе квалитетни замени и продолжи таму каде што застана минатата сезона.

Саутгејт, пак, е познат по работата како селектор, стигна до две финалиња на Европското првенство, но ги загуби и двете. Откако ја напушти репрезентацијата, чека вистинска понуда за да се врати на клупско ниво.

Ден по поразот од Атлетико, Реал Мадрид се соочува со нов проблем. Капитенот Дани Карвахал е повреден и ќе мора да паузира околу еден месец.

Карвахал ја заработи повредата токму на дуелот против Атлетико, а Реал денес објави дека ќе мора да направи сериозна пауза.

Според проценките, периодот на опоравување ќе трае околу четири недели, што значи дека Чаби Алонсо ќе биде без десен бек во текот на целиот октомври. Од порано се знае дека Трент Александер-Арнолд ќе биде надвор до втората половина на ноември, па десната страна повторно ќе мора да ја покрие Федерико Валверде.

Уругваецот речиси сигурно ќе биде прв избор на десната страна во мечевите против Каират и Вилјареал пред репрезентативната пауза, а потоа и против Хетафе, Јувентус и Барселона во втората половина на октомври.