Челзи, изминатиот викенд загуби од Манчестер јунајтед (2:1), во дербито на колото. „Сините“ од петата минута играа со фудбалер помалку и неможеа да го избегнат поразот. Менаџерот на Челзи, Енцо Мареска, знае кој е првиот фаворит за освојување на титулата.

Мареска зборуваше за Ливерпул и нивниот одличен почеток на сезоната пред натпреварот од Лига купот против Линколн. Тој истакна дека ќе биде многу тешко за другите тимови да се натпреваруваат со нив:

„Ако продолжат да играат вака, мислам дека е невозможно да ги стигнеме. Не само ние, туку и сите други клубови“, рече Мареска.

Тој се осврна и на преодниот рок на „Црвените“:

„Завршија фантастична работа од минатата година. А играчите што одлучија да ги доведат ја покажуваат намерата на клубот повторно да се бори за трофеи во Премиер лигата и Лигата на шампионите, тоа е сосема јасно.“

Челзи има кадровски проблеми. Кол Палмер е надвор од терените поради повреда и сè уште не е познато колку долго ќе биде надвор од теренот:

„Медицинскиот тим не ми спомна ништо за операција. Но, не знам дали ќе се врати во наредните денови или во наредните недели. Искрено, не знам. Но, мора да го заштитиме Кол 100отсто. Поради Светското клупско првенство, тој не застана оваа година. Мора да го спасиме“, вели Мареска и продолжува:

„Мора да одлучиме кое е најдоброто решение. Не е наивна повреда. Има денови кога се чувствува подобро, кога болката исчезнува. Но, потоа се влошува и мора да се справува со тоа секојдневно.“

Претставниците на Реал Мадрид и менаџерите на Винисиус Жуниор ги продолжиле преговорите околу новиот договор, објавија шпанските медиуми.

„АС“, објави дека разликата меѓу двете страни во однос на парите е 15 проценти, и се чини дека Реал не е подготвен за компромис, иако сите сакаат Винисиус да остане во клубот.

Вчера, пред претпладневниот тренинг, Винисиус во тренинг центарот на клубот се појавил во друштво на менаџерите, Тата Соарес и Франциско Пења поминале два часа во канцеларијата на челниците на Реал, објави „Ел Чирингито“.

„Марка“, тврди дека биле на состанок со генералниот менаџер на Реал, Хозе Анхел Санчез, вообичаениот преговарач. Весникот објави дека понудата на Реал не е променета и сè уште е актуелна.

Винисиус не е задоволен од почетокот на соработката со тренерот Чаби Алонсо, бидејќи започна три натпревари на клупата, но е свесен дека мора да ги подобри своите перформанси.

Неговиот договор истекува во 2027 година, па клубот сака што поскоро да ги заврши преговорите.

Шпанските медиуми. претходно тврдеа дека двете страни се договориле на почетокот на пролетта, откако клубови од Саудиска Арабија изразија интерес за бразилскиот фудбалер.

Сепак, во јуни, медиумите објавија дека фудбалерот бара поголема плата, што би го изедначило со Килијан Мбапе како најплатен играч во клубот. Потоа беше објавено дека преговорите се одложени до крајот на оваа сезона, кога на Винисиус ќе му остане уште една година од договорот.

Фото/ Принтскрин

Познатиот тенисер и тренер Никола Пилиќ почина на 87-годишна возраст во Риека, објавува ХРТ.

Никола Пилиќ го промени светскиот тенис, ги постави темелите на АТП – Светската тениска организација. Тој ги иницираше промените што доведоа до професионализација на овој спорт.

Како тренер, Пилиќ менаџираше бројни врвни тенисери, а беше и еден од клучните луѓе на почетокот на големата кариера на Новак Ѓоковиќ.

Никола Пилиќ е роден на 27 август 1939 година во Сплит и припаѓа на генерацијата што ги означи почетоците на професионалниот тенис на просторите на поранешна Југославија. Ја изгради својата кариера во период кога тенисот не беше толку популарен како што е денес, но успеа да остави длабока трага и како играч и како тренер.

Пилиќ ја започна својата тениска приказна во сплитскиот тениски клуб, а својот прв сериозен пробив на меѓународната сцена го направи во 1960-тите. Тој беше меѓу најпознатите југословенски тенисери од тоа време и пионер во претставувањето на земјата на светско ниво.

Неговиот најголем успех во поединечна конкуренција дојде во 1973 година, кога стигна до финалето на Ролан Гарос. Во Париз беше запрен од Илие Настасе, еден од најдобрите играчи од тој период.

Во својата кариера освои пет титули во поединечна конкуренција и 11 во двојки. Во играта во двојки имаше неколку извонредни резултати, а негови најпознати партнери беа Настасе и Стен Смит. Пилиќ беше и првиот хрватски играч кој стигна до финалето на Гренд слем во сингл, со што го отвори патот за идните генерации.

Неговата кариера беше обележана и со контроверзии. Во 1973 година, тој беше суспендиран затоа што одби да игра за југословенската репрезентација на Дејвис купот, а тој случај имаше огромни последици бидејќи во тоа време дури 81 играч го бојкотираа Вимблдон во знак на поддршка.

Тоа беше еден од најголемите спортски протести во историјата на тенисот, а името на Пилиќ влезе во аналите на светскиот спорт.

Откако ја заврши кариерата, тој стана успешен тренер. Неговата работа во Дејвис купот е особено запаметена – со германската репрезентација го освои трофејот во 1988, 1989 и 1993 година, подоцна со Хрватска во 2005 и со Србија оствари историски успеси во Дејвис купот.

Бројни врвни играчи тренираа во неговата академија, вклучувајќи го и Новак Ѓоковиќ, кој често го издвојуваше Пилиќ како еден од клучните луѓе во неговиот развој.

Никола Пилиќ беше запаметен како тенисер кој ги проби границите на југословенскиот тенис, но и како тренер и ментор чие влијание е видливо и денес. Неговата улога во историјата на овој спорт се мери не само според резултатите, туку и според пионерските потези што го обликуваа модерниот тенис.

Фото/ Принтскрин