Јувентус, Наполи и Милан ќе бидат вклучени во супер-интересна битка за две места во Лигата на шампионите во последното коло од Серија А, откако „росонерите“ не успеаја да ја завршат работата против Каљари и одиграа 0:0.

Ремито значи дека „росонерите“ сега ќе мора да победат во последниот натпревар од сезоната на гости кај опасната Аталанта, ако сакаат да осигураат пласман без разлика на резултатите на противниците.

Милан се на 76 поени израмнети со Наполи и еден поен пред Јувентус. Наполи игра со Верона во недела дома, додека Јувентус гостува на „Ренато Дал’Ара“ кај Болоња  – и на двата клуба не им се потребни поени за опстанок. Јувентус, исто така во среда ги чека финале на Копа Италија против Аталанта.

Јувентус математички е во најнезавидна позиција – мораат да победат и да очекуваат еден од двата ривали да не го направи истото.

Ако Наполи и Милан загубат, а Јувентус одигра нерешено, трите клуба ќе завршат на 76 поени, по што ќе се формира „мини-лига“ во која ќе се гледаат нивните меѓусебни резултати. Во овој случај, Милан ќе биде сигурен бидејќи има подобар скор во дуелите со Јувентус и Наполи, додека тимот со подобра гол-разлика ќе го преземе последното место.

Роберто Манчини официјално потпиша нов договор со кој ќе остане селектор на Италија до 2026 година откако го предводеше „препородот“ на „аѕурите“ по срамниот неуспех за квалификување на Светското првенство во 2018 година.

Претседателот на Италијанската фудбалска федерација (ФИГЦ), Габриеле Гравина, потврди дека Манчини ќе ги предводи „аѕурите“ на следните две светски првенства и две европски првенства.

„Најважно беше да се постави континуитет на работата во репрезентацијата. Победите секогаш се важни, но проектот е најважен. Манчини заврши одлична работа последните две години, што беше цел за почитување на нашите навивачи“, вели Гравина.

Фриц Келер се повлече од позицијата претседател на Германската фудбалска федерација (ДФБ) по контроверзните нацистички коментари.

64-годишниот Келер беше избран за претседател на ДФБ во септември 2019 кога немаше противкандидат, но беше под притисок на јавноста по навредливите коментари за потпретседателот на Федерацијата, Рајнер Кох, во април.

Келер го спореди Кох со славниот нацистички судија Роланд Фрajзлер, креаторот на нацистичките народни судови на состанок на бордот на Федерацијата, по што му беше изгласана недоверба.

„Како што најавив, ја оставам мојата позиција на претседател достапна за потребен нов почеток во Германската фудбалска федерација. Ја преземам одговорноста за коментарите на состанокот на 23 април, кои се случија во срамни околности за ДФБ, но мојата оставка нема да ги реши проблемите во германскиот фудбал“, објави Келер.

Кох и вториот потпретседател Петер Петерс ќе бидат преодни претседатели до 2022 кога ќе има избори за позицијата.