Спорт
Луд камбек на Мареј од два сета негатива!
Поранешниот светски рекет број 1, Шкотланѓанецот Енди Мареј го мина првото коло на САД опен, откако во неверојатен меч во Њујорк, се врати од два сета негатива за 4:6/4:6/7:6(5)/7:5(4)/6:4 победа над Јапонецот Јошито Нишиока.
Шампионот од 2012 година, кој последните две години се мачи со повредите на колкот (за кој беше на операција), имаше ужасен старт и експресно ги загуби првите два сета, пред да покаже дека не ја загубил борбеноста со два сета кои беа решени во тај-брејк.
Во второто коло е и вториот носител, Австриецот Доминик Тим откако неговиот противник, Шпанецот Хауме Мунар се повлече откако ги загуби првите два сета. Тим, кој стигна до своето трето гренд слем финале во кариерата во Австралија во јануари (каде што загуби од Новак Ѓоковиќ), водеше со 7:6(6)/6:3, кога Мунар се повлече поради повреда. Следен за Австриецот е Индиецот Сумит Нагал, кој со 6:1/6:3/3:6/6:1 го победи Бредли Клен.
Во второто коло се и руските фаворити Андреј Рубљев и Карен Хачанов. Рубљев со 6:4/6:4/6:3 лесно го мина Французинот Жереми Шарди, додека Хачанов се врати од два сета негатива за 3:6/6:7(7)/6:2/6:0/7:6(4) го победи Италијанецот Јаник Синер.
Кај дамите, Гарбиње Мугуруза се врати на тенисот во својот прв меч од февруари со 6:4/6:4 победа над Јапонката Нао Хибино. Следна за поранешната гренд слем шампионка е Бугарката Цветана Пиронкова, која со 6:2/6:3 беше подобра од Људмила Самсонова.
Во британската пресметка, Џоана Конта со 7:6(7)/6:1 ја совлада Хедер Вотсон за пласман во второто коло. 29-годишната Конта, која во 2019 стигна до четврт-финалето, се намачи во првиот сет, спасувајќи шест сет топки, пред во вториот доминантно да ја совлада сонародничката. Следна за неа е Романката Сорана Кирстеа, која со 6:4/7:5 ја победи Американката Кристина Мекхејл.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Тонали сега е на удар и на Англичаните поради обложувањето
Играчот од средниот ред на Њукасл, Сандро Тонали е под истрага од Фудбалската асоцијација (ФА) поради прекршување на правилата против обложување.
Италијанецот веќе отслужува 10-месечна суспензија од Италијанскиот фудбалски сојуз поради обложување за време на неговото играње за Милан.
Новите докази покажуваат дека Тонали се обложувал и кога дошол во Њукасл. Младиот 23-годишен играч го прекршил правилото дури 50 пати од 12 август до 12 октомври 2023 година.
На Тонали му е даден рок до 5 април да одговори на обвиненијата.
„Добивме потврда дека е покрената истрага. Клубот и Тонали целосно ќе соработуваат. Тоа е се што можеме да кажеме во моментов“, се вели во соопштението за медиумите на клубот.
Тонали пристигна во Њукасл минатиот јули во трансфер вреден 60 милиони фунти од Милан.
Спорт
Најдобриот судија во БиХ поради закани одби да им суди на Железничар и Сараево
Шампионатот на Босна и Херцеговина влегува во завршна фаза, а локалниот портал „Спортспорт“, пишува дека најдобриот судија, Ирфан Пељто одбил да им суди на клубовите кои доаѓаат од главниот град Железничар и Сараево) до крајот на сезоната.
Пељто тоа го направил поради наводните закани што ги добивал тој и неговото потесно семејство, кои ги пријавил во полиција. Најдобриот судија од БиХ за својата одлука го известил Судискиот комитет на Фудбалскиот сојуз на Босна и Херцеговина, кој ја прифатил неговата одлука.
Железничар и Сараево ќе одиграат неколку дерби натпревари до крајот на сезоната, но Пељто нема да суди на ниту еден од нив.
Тој требаше да биде главен судија викендов на дербито меѓу Железничар и Вележ, но главен судија на „Грбавица“ ќе биде Елведин Топузовиќ. .
Пељто гради завидна кариера на меѓународен план и често суди натпревари во Лигата на шампионите. Неодамна судеше на пријателскиот натпревар меѓу Словенија и Португалија, а претходно го судеше и натпреварот Лајпциг- Реал Мадрид.
Речиси е сигурно дека ќе суди на ЕП.
Спорт
Интер подготвува нов договор за Инзаги
Интер е апсолутен лидер во Серија А, прашање е само кога и математички ќе ја обезбеди шампионската титула, која ќе биде прва во кариерта на Симоне Инзаги. 47-годишниот тренер досега има освојувано трофеи само во Купот и Суперкупот на Италија.
Она што Инзаги го направи оваа сезона во Серија А, ги натера клупските челници да ја сменат својата стратегија и да му понудат нов договор на тренерот.
Инзаги досега двапати го продолжуваше договорот со Интер, во 2022 и 2023 година, двата пати клубот му понуди едногодишен договор. Овој пат на 47-годишниот тренер ќе му биде понуден двегодишен договор.
Во однос на претходните години, разликата е што на Инзаги ќе му биде понуден нов договор пред да заврши сезоната, а не откако таа ќе заврши.
Интер е на чекор до освојување на шампионската титула во Серија А, откако по 29 кола е прв на табелата со 76 бодови, 14 повеќе од второпласираниот градски ривал Милан.