Шпанската јавност денес се занимава со натпреварот помеѓу Атлетик Билбао и Реал Мадрид, односно со пеналот што го доби „кралскиот клуб“ и пеналот што не беше суден за Атлетик. Дополнителна прашина ќе крене изјавата на првиот човек на Ла Лига, Хавиер Тебас, кој рекол дека судењето се сменило по разговорот на претседателот на Реал, Флорентино Перез, со првиот човек на Фудбалскиот сојуз на Шпанија, Луис Рубијалес.

Тебас тврди дека на почетокот на година Перез во телефонски разговор со Рубијалес се жалел на судењето.

„Постојано повторувам дека сѐ што има врска со ВАР во Шпанија се смени откако Флорентино Перез во јануари лично му се јави на Луис Рубијалес за да му се жали на судењето. Тој тоа го направи 20 минути по еден натпревар на Реал. Според мене, тоа е скандалозно и непримерно однесување. Се врши директен притисок врз судиите. По тој повик, сѐ се смени, се створи непотребен притисок и несогласување помеѓу судиите во ВАР-собата и судијата на теренот“, рекол Тебас и дополнил:

„Ние сакаме борбата во Ла Лига да биде отворена, да нема доминација на една екипа, која во сезоната ќе освои 90 бода. Сакаме сите да победуваат, да губат, да играат нерешено. Токму тоа се случува оваа сезона“.

Првиот човек на Барселона Џозеп Марија Бартомеу верува дека Лионел Меси кариерата ќе ја заврши на „Ноу Камп“. Пред неколку дена радиото „Каде сер“ објави дека Аргентинецот г прекинал преговорите околу новиот договор бидејќи имал намера наредното лето да ја напушти Барселона.

„Нема да објаснувам детали од она што се случува секоја недела. Постојат преговори со бројни играчи, а Меси секогаш говорел дека сака кариерата да ја заврши во Барселона“, рекол Бартомеу.

Барселона синоќа го победи Вилјареал со 4:1. Меси не постигна гол меѓутоа ја забележа 19 асистенција во сезоната. Барса има четири бода помалку од лидерот Реал поради што многумина сметаат дека тренерот Кике Сетиен ќе добие отказ.

„Знаме дека постојат гласини, но тие се лажни. Сетиен ја има довербата на управата и играчите, одлично работи. До крајот има уште четири кола, а потоа не ека Лигата на шампионите. Имаме уште многу важни натпревари“.

Барселона наредниот натпревар ќе го одигра во среда против градскиот ривал Еспањол. Дуелот на „Ноу камп“ ќе започне во 22 часот.

Спортскиот директор на Интер Бепе Марота, по вчерашниот шокантен пораз на од Болоња на „Џузепе Меаца“ (1:2), ја скроил трансфер-листата. Десет фудбалери ќе го напуштат Интер во летниот преоден рок.

Од одбраната нови клубови ќе мора да бараат Диего Годин, иако има цврст договор, Андреа Ранокија и Квадво Асамоа. Годин не успеа да ги повтори партиите од Атлетико, не се снаоѓа во формацијата 3-5-2, Асамоа по повредата не успева да се врати во форма, а на неговото место веќе е ангажиран Ашраф Хакими, додека Ранокија ретко добива шанса од тренерот Антонио Конте.

На листата се и играчите од редот за врска ветеранот Борха Валеро, Матијас Весино и Роберто Гаљардини. Исто така клубот нема да ги откупи договорите на Виктор Мосес од Челси, односно Кристијан Бираги од Фиорентина. Во Манчестер Јунајтед ќе се врати Алексис Санчез.

Марота се надева дека Локомотив Москва ќе го задржат Жоао Марио, а Њукасл Валентино Лазаро. Нов клуб ќе мора да бараат Раџа Наинголан кој игра како позајмен играч во Калјари и Иван Перишиќ чии договор нема да го откупи Баерн Минхен.