Килијан Мбапе продолжува да го пишува своето име во историјата на фудбалот. Францускиот ас блеска и оваа сезона во дресот на Реал Мадрид, а за време на репрезентативната пауза постигна гол во победата на Франција над Азербејџан со 3-0.

Со овој погодок, Мбапе стигна до бројката од 53 гола за репрезентацијата, и сега му недостигаат само пет за да го престигне Оливие Жиру (57) и да стане најдобар стрелец во историјата на Франција.

Но тоа не е единствениот рекорд што го брка. Капитенот на „триколорите“ има 12 гола на Светските првенства и е на чекор од историја – само пет му недостигаат за да го престигне Германецот Мирослав Клосе, кој со 16 погодоци е најдобриот стрелец во историјата на Мундијалите.

Од активните фудбалери пред него е само Лионел Меси со 13 гола, но останува неизвесно дали Аргентинецот ќе игра на СП 2026.

Ако Мбапе го задржи сегашниот ритам, Мундијалот во САД, Канада и Мексико може да биде местото каде што ќе испише нова страница во фудбалската историја.

Фудбалската репрезентација на Македонија го остави зад себе ремито со Белгија и веќе е насочена кон новиот предизвик. Утревечер на Националната арена „Тодор Проески“ во Скопје гостува селекцијата на Казахстан, а целта е јасна – победа и нови три бода во квалификациите.

Селекторот Благоја Милевски зрачи со оптимизам и верува дека неговите избраници се подготвени за уште една силна пресметка.

„Ќе биде многу тешко. Казахстан на првиот меч во Астана покажа дека има квалитет. Сега има и нов селектор и нова филозофија, но ние сме подготвени“, изјави Милевски.

И покрај исцрпувачкиот дуел во Гент, стратегот на македонскиот национален тим уверува дека физичката подготвеност не е проблем.

„Имавме тежок натпревар против Белгија, но сите играчи се подготвени да го дадат максимумот“, додаде селекторот.

Херојот од ремито со Белгија, голманот Столе Димитриевски, очекува голема поддршка од трибините и верува дека токму навивачите ќе бидат дополнителна сила на патот кон нова победа.

„Нашата цел е јасна – да излеземе и да победиме. Очекувам голема поддршка од публиката, се надевам дека ќе биде во голем број на стадионот за да ни даде дополнителна енергија. Секако дека постои разлика меѓу Белгија и Казахстан, но тоа не значи дека ќе биде лесно. Со помош на навивачите верувам дека ќе стигнеме до поволен резултат, а тоа, секако, е победа за нас“, истакна Димитриевски.

Македонија утревечер ќе има можност да го потврди добриот ритам и да ја продолжи борбата за висок пласман на табелата, а поддршката од трибините повторно ќе биде клучен фактор.

Еден од најголемите ММА борци на сите времиња, 39-годишниот Бразилец Хозе Алдо, го потврди своето пензионирање од спортот вторпат, и тоа го направи во исклучително емотивен момент пред својата домашна публика.

„Кралот на Рио“, како што беше официјално наречен, не можеше да избере подобро место за да се збогува со својата неверојатна кариера, и тоа го направи на настан на UFC во Рио де Жанеиро.

Во преполната Фармаси арена, поранешниот шампион доби шанса да се збогува на вистински начин, откако неговото последно враќање во кафезот не ги донесе посакуваните резултати.

The UFC just gave Jose Aldo one last walkout to lay down the gloves in Rio 🔥🥲pic.twitter.com/vCzVW7OhPU

— Happy Punch (@HappyPunch) October 11, 2025

Минатата година беше поразен од Марио Баутиста на УФЦ 307, а во мај оваа година, по проблемите со намалувањето на тежината за бантам категоријата, загуби од Ајеман Захаби на УФЦ 315.

Веднаш по почетокот на главниот дел од настанот на УФЦ Рио, Хозе Алдо, придружуван од неговото семејство, влезе во октагонот носејќи пар ракавици.

Борејќи се со солзите додека публиката гласно му аплаудираше на секој потег, тој симболично ги постави ракавиците на средина од кафезот, означувајќи го крајот на неговата славна кариера. Алдо го објави своето прво пензионирање од спортот уште во септември 2022 година, но тоа траеше малку помалку од една година.

Во својата кариера, тој имаше 42 борби, забележа 32 победи и 10 порази. Секако, најболната за него беше онаа од 2015 година, кога беше поразен од Конор Мекгрегор по само 13 секунди од борбата со класичен нокаут.