Спорт
Македонија Ѓорче Петров е освојувач на Купот на Македонија, Стевковски херој на „лавовите“

Македонија Ѓорче Петров по вторпат ја освои титулата од Купот на Македонија, откако во финалето по изведувањето на пенали беше поуспешен од Силекс со 4:3, откако мечот заврши без голови во регуларниот дел.
До вториот трофеј по тој во 2006 година, „лавовите“ стигнаа благодарение на голманот Христијан Стевковски, кој не само што во второто полувреме имаше неколку клучни одбрани за да го сопре Силекс, туку и во пенал-рулетот одбрани два удари.
Македонија имаше поофанзивен старт на мечот, но во второто полувреме, најдобри шанси имаше токму пред нивниот гол, по што во продолженијата немаше големи шанси на вете страни. Стевковски во првиот пенал го „прочита“ Бурхан Алији, за во третата серија да го одбрани и обидот на Благоја Спирковски. На другата страна Попзлатанов не успеа со „паненка“ да го измами Божиновски, за во Сефер Емини да го постигне победничкиот гол за 4:3.
Титулата за тимот на Муарем Бајрами значи и пласман во Европа, додека Силекс не успеа да стигне до својата четврта Куп-титула и ќе се задоволи со враќање во Првата лига следната сезона.
Фото: Игор Паневски/Топспорт.мк
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Надал „влета“ во четврт-финалето на Вимблдон

Рафаел Надал останува во „лов“ на својата 23. гренд слем титула, откако за нешто повеќе од два часа со 6:4/6:2/7:6(6) го „збриша“ светскиот број 25., Холанѓанецот Ботик ван де Цандшлуп за пласман во четврт-финалето на Вимблдон.
По титулите на Австралија опен и Ролан Гарос, малкумина очекуваа дека шпанскиот ветеран ќе биде во состојба за добар настап на Вимблдон, најмногу поради повредата на стапалото, но Надал уште еднаш покажа зошто е најуспешниот на сите времиња, со втора лесна победа во низа, за да обезбеди дуел со 11. носител, Американецот Тејлор Фриц, кој претходно во три сета го елиминираше Џејсон Кублер. Доколку го мине четврт-финалето, во полуфиналето може да има супер-интересен дуел со „лошото момче“ на австралискиот тенис, Ник Кирјос.
Еден брејк на крајот на првиот сет беше доволен да се направи предност, по што лесно го освои вториот сет, и беше на добар пат експресно да ја комплетира победата, кога сервираше за победа при 5:3 во последниот сет, пред Ван де Цандшлуп да направи брејк и да примора тај-брејк.
Спорт
Навивачите на Олимпија влетаа на презентацијата на новиот тренер Риера, го сакаат Просинечки

Бесните навивачи на Олимпија Љубљана не дозволија нивниот нов тренер, поранешниот шпански фудбалер Алберт Риера, да ја одржи првата прес-конференција лути на одлуката на клубот да го избрка Роберт Просинечки.
Популарните Greenn Dragons претходно присуствуваа на прес-конференцијата на поранешниот хрватски репрезентативец, кој ја обвини управата на клубот за скандалозно однесување.
„Можеа да кажат дека не знам да работам, но не и дека не сум чесен. Со поголеми лажговци и преваранти никогаш не сум работел, а сум работел со многумина. Апсурден е начинот на кој се води клубот, тоа не би го режирал ниту Алфред Хичкок“, изјави Просинечки по добирањето отказ по само три месеци, а од клубот објавија дека речиси секој ден останувал до 4 часот наутро пиејќи алкохол и играјќи карти.
? ¡¡¡LAMENTABLE!!!
? Los ultras del Olimpija Ljubiljana expulsan a Albert Riera en su presentación como nuevo entrenador del club
? #PartidazoCOPE pic.twitter.com/hbpNG2cO5Q
— El Partidazo de COPE (@partidazocope) July 4, 2022
Спорт
Русија го прати хокеарот што избегнуваше војска на Арктикот, Федерацијата бара објаснување

Руската хокеарска федерација официјално побара објаснување од властите во врска со ситуацијата во која се најде голманот Иван Федотов, кој беше приведен во петокот во Санкт Петербург со обвинение дека се обидува да избегне воена служба по објавувањето на руските медиуми дека тој е пратен на Арктикот.
„Руската хокеарска федерација ја следи ситуацијата со голманот на руската репрезентација Иван Федотов и неговиот воен рок. Федерацијата побара од владините служби да ги разјаснат околностите поврзани со случајот“, вели претседателот на Федерацијата, поранешниот трикратен олимписки шампион Владислав Третјак.
Според новинската агенција ТАСС, хокеарот се наоѓа во Северморск, во областа Мурманск, во арктичкиот регион, и дека може да биде пратен уште на север, на островот Нова Земја. Другите руски медиуми тврдат дека тој ќе остане во пристаништето Северморск до септември по што ќе биде одлучено каде ќе биде пратен.
Ситуацијата може да го чини Федотов НХЛ-кариера откако во мај тој потпиша договор со Филаделфија флаерс по крајот на договорот со ЦСКА Москва, со која ја освои титулата од Гагарин-купот во КХЛ-лигата и беше прогласен за најдобар голман. Федотов беше на голот на руската репрезентација, која освои сребро на Олимпијадата во Пекинг во февруари. Други руски медиуми шпекулираат дека проблемот е направен поради неговиот конфликт со ЦСКА Москва, спортскиот клуб што традиционално е поврзан со руската војска.
Во Русија воената служба е задолжителна за сите од 18 до 27 години.