Кошаркарот на Монако, Мајк Џејмс е најдобар играч на Евролигата за сезоната 2023/24.

Како и за сите други награди во Евролигата, за наградата МВП на сезоната одлучуваат гласовите на навивачите, новинарите, капитените и тренерите на клубовите од Евролигата.

Монако трета година по ред стигна до плеј-офот, но оваа сезона во четвртфиналето загуби со 3-2 од Фенербахче и не успеа да се пласира на завршниот турнир.

Мајк Џејмс сезонава одигра 39 натпревари во Евролигата и само во еден немаше двоцифрен број на поени. Имаше просек од 17,9 поени, 5,1 асистенции, 4,1 скока, 1,2 украдени топки и просечен индекс на корисност од 19,4.по натпревар.

Патем стана и најдобар стрелец во историјата на Евролигата, во дуелот на Монако со Црвена звезда го престигна Василис Спанулис.

Списокот на играчи кои ја добија наградата за МВП на сезоната започнува со Тони Паркер (2005 и 2006 година) и продолжува со Тео Папалукас, Рамунас Шишкаускас, Хуан Карлос Наваро, Милош Теодосиќ, Димитрис Дијамантидис, Андреј Кирилемко, Василис Спанулис, Серхио Родригез, Немања Бјелица, Нандо де Коло, Серхио Љуљ, Лука Дончиќ, Јан Весели, Василије Мициќ, Никола Миротиќ и Саша Везенков, кој беше МВП минатата сезона.

Килијан Мбапе е прогласен за најдобар фудбалер на француската Лига 1.

Напаѓачот на Пари Сен Жермен ја доби престижната награда петти пат по ред. Одлуката ја донесоа членовите на Здружението на француски фудбалери.

Во текот на сезоната, Мбапе постигна 44 гола во сите натпреварувања.

Лига 1 е единствената лига во која сум играл досега во кариерата и зазема многу важно место во мојот живот. Сигурно ќе ми недостига, но време е за ново поглавје во мојот живот“, изјави Мбапе на церемонијата на доделувањето на наградата што му ја врачи Мари-Жозе Пере, поранешна олимписка шампионка во атлетика.

Брилијантниот напаѓач неодамна го одигра последниот натпревар за Пари Сен Жермен против Тулуз, а следната сезона треба да игра за Реал Мадрид, иако тоа никаде официјално го нема потврдено.

Италијанскиот тенисер Јаник Синер веројатно нема да учествува на Ролан Гарос, објави „Газета дело Спорт“. Синер поради повреда не учествува на Мастерсот во Рим, а прашање е дали ќе игра на Ролан Гарос.

Одлуката треба да биде позната оваа недела.

Синер се наоѓа во Торино во клиниката што ја користи Јувентус и според првите информации играњето на Ролан Гарос може да му создаде долгорочен проблем на младиот Италијанец.

Според италијанските медиуми, се очекува тој да биде на теренот во среда кога ќе биде донесена одлуката дали ќе настапи на вториот грен слем во сезоната.

Италијанецот веќе изјави дека нема да ја загрози кариерата поради еден турнир и дека се чини дека повредата на колкот може да биде посериозна.

Според „Газета дело Спортt“, лекарите се многу блиску до одлуката да му забранат учество бидејќи тоа долгорочно би го загрозило неговото здравје.