Спорт
Марк Маркез апсолутен владетел на Арагон

Возачот на Дукати, Марк Маркез, триумфираше на Големата награда на Арагон, осмата трка од годинашниот шампионат во Мото ГП.
Осумкратниот светски шампион, на патеката „Моторленд“, ја постигна својата четврта победа оваа сезона, а го повтори и успехот од пред 10 години кога ги заврши сите тренинзи, квалификации и трката на првото место.
Најблиску до Марк беше неговиот помлад брат Алекс, кој заостануваше над две секунди, додека на третото скалило на подиумот беше Франческо Бањаја на вториот фабрички Дукати.
Бањаја заостануваше помалку од една секунда зад возачот на Гресини, а во Арагон се врати на подиумот за прв пат по Херез, на крајот на април.
Најдобар меѓу останатите беше Педро Акоста, кој ја помина целта пет и пол секунди зад Бањаја. Најголемата битка се водеше во борбата за петтото место, во која Франко Морбидели од тимот БР46 го победи вториот возач на Гресини, Фермин Алдегер, по што следеше Жоан Мир на Хонда.
Првите десет ги комплетираа возачот на Априлија, Марко Бецеки, Фабио ди Џанантонио од тимот БР46 и Раул Фернандес, кој ги брани боите на Трекхаус.
Постариот Маркез сега е на чело на генералниот пласман со 233 бода, 32 повеќе од неговиот помлад брат, додека Бањаја трет со 140.
Следната трка од шампионатот Мото ГП е за Големата награда на Италија во Муџело од 20 до 22 јуни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Ленгле како слободен играч потпиша со Атлетико

Францускиот фудбалер Клеман Ленгле потпиша договор со Атлетико Мадрид до јуни 2028 година.
Ленгле беше член на Барселона, а минатата сезона ја помина на позајмица во Атлетико.
Францускиот фудбалер го раскина договорот со Барселона порано денес, а потоа потпиша тригодишен договор со Атлетико Мадрид како слободен агент. Минатата сезона, Ленгл одигра 34 натпревари за мадридскиот клуб и постигна три гола.
Покрај Барселона и Атлетико, дефанзивецот играше и за Астон Вила, Тотенхем, Севиља и Нанси.
Спорт
Киву го презеде Интер

Романскиот фудбалски стручњак Кристијан Киву (44) е назначен за нов тренер на Интер од Милано.
Киву потпиша договор со тимот од „Џузепе Меаца“ до 30 јуни 2027 година.
Тој го наследи Симоне Инзаги на клупата на вицешампионите на Европа и Италија. Инзаги минатата недела поднесе оставка и замина во Ал Хилал.
Киву поднесе оставка од тренерската позиција на Парма пред да биде назначен во Милано.
Романецот беше тренер на младинските категории на Интер од 2018 до 2024 година, а како играч беше член на клубот од Милано од 2007 до 2014 година.
Спорт
Започна чистката на „Олд Трафорд“, први на удар ветераните

Данскиот фудбалер Кристијан Ериксен (33), шведскиот дефанзивец Виктор Линделоф (30) и поранешниот репрезентативец на Северна Ирска Џони Еванс (37) ќе го напуштат Манчестер Јунајтед на 30 јуни, објави англискиот клуб.
Во соопштението се наведува дека договорите на тројцата фудбалери со Манчестер Јунајтед истекуваат на 30 јуни и дека англискиот тим не смета на нив следната сезона, бидејќи клубот од „Олд Трафорд“ одлучил да не ја продолжи соработката со Ериксен, Еванс и Линделоф.
Еванс беше член на Манчестер Јунајтед од 2006 до 2015 година, а се врати во клубот од „Олд Трафорд“ во 2023 година. Ирецот и претходно објави дека ќе се пензионира.
Ериксен пристигна во Манчестер Јунајтед во 2022 година, додека Линделоф е член на „Црвените ѓаволи“ од 2017 година.