Со убедливи победи на дебитантите Дубаи и Хапоел започна новата сезона во Евролигата. Дубаи го победи Партизан со 89:76, а Хапоел славеше во дуелот со Барселона 103:87.

Поранешниот кошаркар на Партизан, Дејвис Бертанс, го предводеше Дубаи до историската прва победа во Евролигата. Летонецот го заврши натпреварот со 20 поени (11 во првата четвртина) , 3 скока и 4 асистенции.

Џанан Муса заврши со 19 поени, 4 скока и 5 асистенции, Мфионду Кабенгеле имаше 15 поени и 5 скока, Филип Петрушев имаше 14 поени и 8 скока.

Во тимот на Партизан, Тајрик Џонс беше најистакнат стрелец со 13 поени и 6 скока, а имаше и по 2 асистенции, блокади и украдени топки, како и 3 изгубени топки и 4 лични грешки.

Друштво му правеше Дилан Осетковски со 12 поени и 2 скока (имаше 10 на полувреме), додека Џабари Паркер постигна 11 поени со 4 скока и 2 асистенции, а Шејк Милтон исто така постигна двоцифрен број поени со 10 поени, 3 скока и 2 асистенции.

Во второто коло Партизан ќе го пречека Милано, а Дубаи ќе гостува кај Монако.

Хапоел домашните натпревари ги игра во Софија. Актуелниот шампион во Еврокупот ја победи Барселона со 16 поени разлика.

Василије Мициќ постигна 18 поени со три скока и две асистенции во својот прв натпревар во Евролигата во дресот на Хапоел.

Антонио Блекни беше најефикасниот играч за победничкиот тим со 20 поени, додека Ден Отуру и Василије Мициќ постигнаа по 18 поени.

Кај Барселона, Вил Клајбурн забележа 23 поени и седум скока, додека Кевин Пантер додаде 13 поени, ист број како и Јан Весели.

Во нареднотоколо Хапоел ќе гостува кај Ефес, додека Барселона ќе гостува кај Панатинаикос.

Рускиот хокеар, Кирил Капризов (28) потпиша нов осумгодишен договор со Минесота Вајлд вреден 136 милиони долари, што е најголемиот договор во историјата на НХЛ. Договорот важи од сезоната 2026/27 и трае до сезоната 2033/34.

Капризов со потписот на договорот сруши два рекорда. Стана играч што го потпишал најголемиот договор, надминувајќи ги 124 милиони долари на Овечкин во текот на 13 години, а со 17 милиони долари по сезона го сруши рекордот на Леон Драјсаитл од 14 милиони долари по сезона (112 милиони долари во текот на осум сезони).

Рускиот напаѓач има уште една сезона од петгодишниот договор вреден 45 милиони долари што го потпиша во 2021 година.

Капризов, добитник на трофејот Калдер за најдобар дебитант во НХЛ во сезоната 2020/21, вкупно собра 386 поени (185 гола, 201 асистенција) во 319 натпревари во кариерата за Минесота Вајлд.

Тој учинок од 1,21 поен по натпревар и 0,58 гола по натпревар го прави најдобар во историјата на франшизата, а тој го држи и клупскиот рекорд со 10 гола во продолженијата.

Во плејофот, тој додаде 21 поен во 25 настапи, а минатата сезона, иако ограничен од повреди, постигна 25 гола и 31 асистенција во 41 натпревар, демонстрирајќи елитна ефикасност дури.

Foto/ EPA

Српскиот тренер Душан Алимпијевиќ е новиот селектор на Србија, потврди Кошаркарскиот сојуз на Србија (КСС).

Алимпијевиќ се договори со КСС за тригодишна соработка и ќе го замени Светислав Пешиќ на функцијата.

„Во тој период, Алимпијевиќ ќе ги преземе сите одговорности поврзани со подготовките на националниот тим за претстојните квалификациски натпревари за Светското првенство („прозорци“ на ФИБА), како и меѓународните натпреварувања.

Алимпијевиќ е признат како личност која поседува експертиза, авторитет и посветеност потребни за водење на националниот тим на највисоко ниво, а воедно внесува и нова енергија потребна за постигнување резултати, кои секогаш се очекуваат од сениорската репрезентација на Србија.

КСС навремено ќе ја информира јавноста за сите понатамошни чекори поврзани со формирањето на стручниот штаб и планот за подготовка“, се вели во соопштението.

Алимпијевиќ е предводник на новата генерација млади српски тренери, кои веќе постигнаа одлични резултати и го потврдија својот квалитет на европската сцена.

И покрај фактот дека е многу млад тренер, Алимпијевиќ веќе има завидно искуство во натпреварувања како што се Еврокупот и Евролигата, вклучувајќи ја и наградата за тренер на годината во Еврокупот 2022.

Тој моментално е тренер на Бешикташ, тим кој се натпреварува во Еврокупот, па претстојните „прозорци“ во квалификациите за Мундобаскетот нема да бидат проблем за него, бидејќи тогаш нема да има натпревари во второто најсилно натпреварување во клупската кошарка.

Во својата тренерска кариера работеше во ФМП, Црвена звезда, потоа постигна одлични резултати во тимот на Бурса, кои го препорача во Бешикташ, каде се уште работи.

Фото/ Принтскрин