Лидс јунајтед попладнево ќе гостуваат кај Челси, на „Стенфорд Бриџ“. Македонскиот репрезентативец, Езгијан Алиоски, за британските медиуми изјавил дека Лидс во Лондон ќе се надигрува со Челси.

„Челси е силен тим, ги гледавме во Лигата на шампионите. Не се плашиме од нив, веруваме во нашите квалитети, одиме во Лондон да се надигруваме со нив. Ние сме среќни што можеме да играме против најсилните екипи во Англија. Против Ливерпул и Манчестер сити, а сега потоа и против Арсенал и Евертон покажавме дека можеме да играме против најсилните екипи.

Натпреварот на 2Стенфорд Бриџ“ ќе започне во 21 часот.

Тотенхем од лидерската позиција на табелата ќе влезе во дербито на северен Лондон, против Арсенал. Во пресрет на дербито (недела, 17.30 часот), менаџерот на Тотенхем, Жозе Мурињо, им испрати порака на големите ривали Јирген Клоп и Пеп Гвардиола.

Менаџерите на Ливерпул и Манчестер сити постојано се незадоволни од густиот распоред и одбивањето на премиер лигата да го врати правилото за пет измени.

Врвните англиски тимови, од почетокот на сезоната, играат на секои три или четири дена. Клоп за густиот распоред ги обвини носителите на телевизиските права. Незадоволството на Клоп го дели и неговиот колега Гвардиола.

Мурињо, од друга страна, истакнал дека Клоп и Гвардиола не биле толку гласни кога неговиот тим, на почетокот од сезоната, во 18 дена одиграл осум натпревари.

„Во еден момент одигравме четири натпревари во една недела, тогаш не слушнав дека некој плаче, ниту пак дека некој ни даде поддршка. Сега моите колеги се многу гласни кога станува збор за овој проблем“, рекол Мурињо.

Реал Мадрид, попладнево, во дербиот на колото во Ла Лига, гостува во Севилја. Шпекулациите велат, дека ова е еден од натпреварите, кој ќе ја одреди судбината на Зинедин Зидан на клупата на „кралскиот клуб“.

Реал не игра добро од почетокот на сезоната, а во дуелот со Севилја ќе влезат по серијата од два порази. Зидан е свесен дека неговиот тим нема право на кикс.

„Кога не победуваш, нормално е да добиваш критики. Тоа сепак нема да го смени мојот начин на размислување, за играчите и за мојата работа. Очигледно е дека имаме проблеми, но ќе продолжиме да работиме“, рекол Зидан и дополнил.

„И во минатото сме имале тешки моменти. Можеби овој пат е потешко. Против Севилја имаме шанса да покажеме дека сме добри. Овие играчи знаеле да се извлечат од вакви ситуации. Никогаш не сум чувствувал дека сум недопирлив во Реал, ни кога бев играч, а ни сега кога сум тренер“.

Натпреварот на „Рамон Санчез Писхуан“, Севилја-Реал Мадрид ќе започне во 16.15 часот.