Ник Кирјос во пет сета го победи Карен Хачанов во третото коло на Австралија опен. Австралиецот успеа да победи по четири часа и 26 минути игра што е негов најдолг меч во кариерата.

Кирјос славеше над Хачанов со 6/2, 7/6, 67, 6/7, 7/6 (10:8). Рускиот тенисер спаси меч топка пред да го освои четвртиот сет, а во супер тај-брејкот во петтиот сет имаше водство од 8:7.

На крајот Кирјос имаше 97 винери и 52 неизнудени грешки, додека тој однос кај Хачанов беше 75/44. Австралиецот беше поуспешен и на сервисот, забележа 32 ас-сервиси имаше и четири дупли грешки, додека Хачанов на сервис имаше 21/5.

Кирјос во наредната рунда ќе се сретне со првиот носител на турнирот Рафаел Надал.

Италијанката Елена Кутрони победи на спуст трката која се возеше во Банско, Бугарија. За Кутрони ова е прва победа во кариерата, во Светскиот куп.

28 годишната Кутрони во кариерата три пати била на подиумот, последен пат во Кран монтана во 2017 година. До првата победа таа стигна со време 1:29.31 минута. На второто место со само една стоинка послабо време се пласира нејзината сонародничка Марта Басино.

Совршениот ден на Италијанските во спуст трката го надополни Федерика Брињоне која со 14 стотинки задоцнување го освои третото место.

Зад Италијанките на четвртото место трката ја заврши победничката од вчерашниот спуст Американката Михаела Шифрин.

Утре во Банско на програмата е трката во супер-велеслалом.

Четвртиот и седмиот носител на првиот гренд-слем во сезоната Австралија опен, Данил Медведев и Александар Зверев се пласираа во осмина-финалето.

Медведев со максимален резултат (6/4, 6/3, 6/2) го надигра Австралиецот Алексеј Попирин. Русинот направи пет брејка во целиот меч, а ниту еднаш не го загуби својот сервис.

Медведев во наредната рунда ќе игра против Стен Вавринка, на кого Џон Изнер му го предаде мечот.

Пласман во осмина-финалето во три сета избори и Зверев. Германецот го победи Фернандо Вердаско од Шпанија (6/2, 6/2, 6/4). Зверев во првите три меча не загуби ниту еден сет што е негов најдобар резултат на турнирите од гренд-слем серијата.

Во осмина-финалето Зверев ќе игра против Андреј Рубљов.