Спорт
Мијатовиќ е новиот селектор на хрватските кошаркари

На предлог на спортскиот директор на Хрватскиот кошаркарски сојуз, Крунослав Симон (ХКС), Управниот одбор на ХКС денес го назначи Томислав Мијатовиќ за селектор на машката сениорска кошаркарска репрезентација на Хрватска.
Мијатовиќ е искусен кошаркарски експерт со долгогодишно меѓународно искуство, како на клупско, така и на репрезентативно ниво.
Тој ја започна својата тренерска кариера во 2001 година во КК Цибона како помошник тренер, а во 2010 година се пресели во турскиот клуб Анадолу Ефес, каде што ја презеде истата улога.
Во текот на повеќе од една деценија во клубот, тој беше клучен дел од тренерскиот персонал во периодот кога Анадолу Ефес освои две титули во Евролигата во 2021 и 2022 година, три титули во турското првенство и три турски купови.
Паралелно со својата клупска кариера, Мијатовиќ беше вклучен во работата на тренерскиот штаб на хрватската машка сениорска репрезентација долги години како тренер, со што стекна вредно искуство и длабоко разбирање на репрезентативниот систем.
Хрватска ја очекуваат претквалификации за Светското првенство во август. Хрватска е сместена во групата Д со Данска и Норвешка, а секоја екипа ќе одигра четири натпревари, односно по два дома и два на гости против секој противник од групата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Манчестер јунајтед постигна договор со голманот на Антверпен

Манчестер јунајтед, до крајот на преодниот рок ќе го реализира трансферот на белгискиот голман Сене Ламенс од Ројал Антверпен. За услугите на 23-годишниот голман клубот од „Олд Трафорд“ ќе плати 20 милиони евра. Ламенс, досега има повеќе од 50 настапи за Антверпен откако се приклучи од Клуб Бриж пред две сезони.
Неговата вредност значително порасна во последните месеци благодарение на неговата форма и неговиот статус како член на белгиската репрезентација до 21 година, а многу аналитичари го нарекуваат еден од најперспективните голмани во Бенелукс.
Планот на Манчестер јунајтед е со доаѓањето на Леменс да ја зголеми конкуренцијата на голманската позиција, а не да биде непосредна замена за првиот голман Андре Онана.
Тренерот Рубен Аморим јавно го изрази своето задоволство од сегашниот голмански кадар, но раководството на клубот е свесно за можното заминување на Онана на Африканскиот куп на нации на почетокот на 2026 година и бара долгорочна сигурност.
Спорт
Рома и Ливерпул во преговори за Цимикас

Рома започна преговори со Ливерпул за траснферот на Костантинос Цимикас. Рома сака да издејствува позајмица со задолжителен откуп на договорот наредното лето.
Грчкиот лев бек нема многу шанси да добие поголема шанса во редовите на шампионите на Англија оваа сезона, особено по доаѓањето на Милош Керкез, а тука е и Енди Робертсон, кој претходно имаше предност пред него.
Затоа, трансфер во Рома изгледа како идеално решение за овој играч. Засега не се споменуваат бројки, но се нагласува дека „волчицата“ е решена да го реализира трансферот.
Новиот тренер на Рома, Џанпјеро Гасперини, инсистира на дополнително засилување на тимот до крајот на преодниот рок, тоа го истакна по синоќешната победа над Болоња со 1:0 во првото коло од Серија А.
Против Болоња, Гасперини играше во формација со тројца во одбраната, а Анхелињо, со кого Цимикас веројатно ќе се бори за место во тимот, дејствуваше како винг бек по левата страна.
Цимикас има 29 години и игра за Ливерпул од 2020 година.
Спорт
Борусија се договори за трансфер на тандемот од Челзи

Борусија Дортмунд договори соработка со двајца фудбалери на Челзи, Арон Анселмињо и Карни Чуквемека.
Исклучително добрата соработка што ја имаат Челзи и Борусија Дортмунд продолжува и ова лето.
Во овој преоден рок, „сините“ го купија Џејми Гитенс од Дортмунд за 56 милиони евра, а сега се подготвени да испратат двајца играчи во спротивна насока.
Арон Анселмињо ќе дојде на позајмица, додека Борусија ќе го купи Карни Чуквемека за 25 милиони евра.
Двајцата играчи треба да бидат официјализирани во понеделник, кога се закажани медицински прегледи.
Чуквемека играше за Борусија минатата сезона и постигна еден гол во 10 натпревари од Бундеслигата. Анселмињо, кој е дефанзивец, ја помина минатата сезона на позајмица во Бока Јуниорс.