Волфзбург преку Борусија Дортмунд избори место меѓу 16. најдобри екипи во Купот на Германија. Натпреварот на „Фолксваген арена“ го реши Јонас Винд во 117.минута, кога го постигна единствениот гол.

Германската јавност се прашува дали челниците на Борусија, во јули донесоа добра одлука кога се разделија со Един Терзиќ и за тренер го назначија неговиот помошник Нури Шахин.

Шахин треба да биде загрижен за својот статус и иднината на клупата. Во Бундеслигата загуби два од последните три натпревари и зад водечкиот тандем (Баерн и Лајпциг) заостанува седум бода; во Лигата на шампионите успеа да прокоцка 2:0 и да доживее тежок пораз од Реал Мадрид.

Неговиот севкупен учинок откако ја презеде Борусија е повеќе од скромен, во 13 натпревари тој забележа седум победи и дури пет порази, од кои два беа катастрофални, споменатиот во Мадрид од Реал (5:2) и од Штутгарт во Бундес лигата (5:1).

Резултатите се лоши, а тимот е посилен од тимот што го имаше Терзиќ минатата сезона. Борусија во летниот преоден рок потроши 80.000.000 евра, во клубот дојдоа Серу Гираси, Валдемар Антон, Јан Куто, Паскал Грос и Макс Баер.

Атлетико Минеиро е првиот финалист на овогодинешниот Копа Либертадорес, најсилното клупско натпреварување во Јужна Америка.

Бразилскиот тим се одбрани од Ривер Плата во реваншот на преполниот „Монументал“ во Буенос Аирес. Натпреварот заврши 0:0. Минеиро го доби првиот меч со 3:0 и стигна до мечот за титулата.

Аргентинскиот тим тргна на се или ништо на овој дуел. Напаѓаа уште од самиот почеток, но мрежата на гостите беше маѓепсана за нив.

Ривер упати дури 35 удари кон противничкиот гол, наспроти само шест на Атлетико, но ниту еден не ја погоди целта.

Атлетико предводен од поранешниот бразилски репрезентативец Хулк ќе има можност по втор пат во историјата да го освои престижниот пехар. Тие го направија тоа за прв пат во 2013 година.

Речиси сигурно е дека ривал во финалето ќе им биде Ботафого, кој го доби првиот меч против Пењарол од Монтевидео со 5:0.

Никола Јокиќ, во ноќта зад нас уште еднаш покажа зошто е МВП во најсилната лига на светот, НБА. Српскиот центар најпрвин избори продолженија кај Бруклин (125:125), а потоа го однесе својот тим до победата. 144:139. Јокиќ, во четвртиот меч сезонава го забележа вториот трипл-дабл (29 поени, 18 скока, 16 асистенции).

Денвер ја забележа втората победа, но тимот и понатаму не изгледа добро на теренот. Првите четири натпревар во сезоната покажаа дека тимот е лошо селектиран и дека без Јокиќ е само просечна екипа.

Бројките зад неговото име покажуваат дека тој против Бруклин доминираше во сите сегменти на играта.

Јокиќ го следеа Гордон и Мареј со 24 поени, Вестбрук постигна 22, додека Портер Џуниор 16.

Во поразениот тим се истакнаа Денис Шрудер со 28 поени и Кам Томас со 26 поени.

Далас Маверикс во репризата на финалето во Западната конференција од минатата сезона ја победија Минесота со 120:114.

Натпреварот одигран во „Таргет центарот“ во Минеаполис шутерски не беше добар за Лука Дончиќ, кој на 10/27 од поле имаше 24 поени или само 1/8 за тројки.

Одличен беше Кајри Ирвинг кој беше херојот на Далас, мечот го заврши со 35 поени, 4 скока и 5 асистенции. Вашингтон постигна 17 поени, а Гафорд 14.

Во редовите на Минесота уште еднаш најистакнат поединец беше Ентони Едвардс. Популарниот Ент „спакува“ 37 поени, 6 скока и 3 асистенции, а Џулиус Рендл забележа 20 со 7 скока и асистенции.