Јаја Туре, иако има статус на легенда на Манчестер сити, останува во „незгодни“ односи со англискиот клуб, иако самиот вели дека се обидува да ги поправи односите, почнувајќи со писмо со извинување до Пеп Гвардиола, кого претходно го обвини дека не ги сака африканските фудбалери.

Туре има освоено три титули од Премиер лигата со Манчестер сити, а сега на 37 години, признава дека големиот дел од вината е кај него. Тој вели дека не бил во посета на Сити по повлекувањето во 2018 година и покрај тоа што има доживотен билет и еден терен за тренинг кој го носи неговото име.

Но, во Сити не го заборавиле бурното интервју за „Франс фудбал“ еден месец по неговото заминување. Туре открива дека минатата година пратил писмо до клубот, нудејќи целосно извинување за неговото однесување. Засега, тој не добил одговор и не знае дали тоа стигнало до Гвардиола.

„Тоа интервју беше мојата голема, огромна грешка. Кога ќе му дадеш доверба на некој друг, тогаш таа може да се претвори во нешто што не си посакувал. Знам дека луѓето не беа среќни. Пратив писмо до некои важни луѓе во кои признавам дека бев нечесен кон клубот, но не добив одговор. Сакам мир, не караници. За фановите, за клубот, понекогаш работите мора да се средат“, вели Туре.

Туре, кој сега работи како тренер во Украина со тимот на Олимпик Доњецк, признава дека односите на неговиот агент Дмитриј Селук со Сити не биле најдобри и дека требал да се дистанцира навреме.

„Беше тешко – изгледам како лоша личност поради негативните работи околу мене. Не е во ред да се каже дека сум лоша личност. Не сакав да одговарам, бидејќи фудбалот беше најважен за мене. Но, морав да се справам со работите на поинаков начин. Многу работи можеа да бидат подобри“, додава Туре.

Новиот претседател на Барселона, Жоан Лапорта вели дека е сигурен дека Лионел Меси ќе потпише продолжување на договорот и дека преговорите се движат одлично и според планот.

Договорот на Меси со клубот каде што ја помина целата професионална кариера завршува за нешто повеќе од два месеци, откако минатото лето тој ги шокираше сите со барањето за трансфер по лошата сезона и катастрофалниот пораз од 8:2 од Баерн Минхен во Лигата на шампионите. Пари Сен-Жермен и Манчестер сити, според шпекулациите уште се заинтересирани за неговиот потпис, но Лапорта верува дека тој ќе ја продолжи 17-годишната кариера на „Ноу Камп“.

„Работите се движат според планот. Јас ќе направам се што е можно според капацитетот на клубот да го убедам да остане. Тоа го правиме цело време. Меси е мотивиран, а исто така е и неверојатна личност која сака да продолжи со Барселона“, изјави Лапорта за „Депортес Куатро“.

Хрватскиот ветеран Марио Манџукиќ направи чин што малкумина професионални фудбалери се подготвени да го направат – се откажал од платата за месец март бидејќи во тој период бил повреден и не можел да му помогне на Милан. Наместо тоа, претседателот на клубот, Паоло Скарони ги донирал парите во добротворни цели.

Според новинската агенција „АНСА“, Манџукиќ бил разочаран што не успеал да помогне минатиот месец во борбата за скудетото и за место кое води во Лигата на шампионите.

„Исклучителен гест. Тоа само ја покажува етиката и професионализмот на човек како Марио Манџукиќ и неговата почит кон Милан. Клубот ја искористи ситуацијата за да помогне на фондацијата на Милан за помош на млади луѓе во економски проблеми, каде што со спортот може да се помогне“, изјави Скарони.