Шкодран Мустафи очигледно смета дека Арсенал многу погрешиле со случајот со својот близок пријател Месут Озил, кој е пред потпис со Фенербахче откако го раскина договорот со „топчиите“ бидејќи беше „замрзнат“ од март од страна на менаџерот Микел Артета.

Навивачите на Арсенал се подолени околу однесувањето кон Озил, но Мустафи е верен на поранешниот соиграч од германската репрезентација со емотивна порака на социјалните мрежи.

„Брату, ти беше најнесебичниот играч на теренот и надвор од него, секогаш кога делев соблекувална со тебе. Ќе бидеш запаметен како крал на асистенциите, но, за жал, ние како тим не успеавме да ти асистираме кога ти требавме најмногу. Се најдобро“, напиша Мустафи.

Bro, you have been the most unselfish player on and off the pitch, I have ever shared the dressing room with. You will be always remembered as the #AssistKing. Unfortunately we as a team haven’t been able to assist you when you needed us the most. All the best ❤️ #SM20 pic.twitter.com/gEfl6AWzZj

— Shkodran Mustafi (@MustafiOfficial) January 18, 2021

Италијанскиот селектор, Роберто Манчини, застана во одбрана на тренерот на Јувентус, Андреа Пирло по вчерашниот 2:0 пораз од Интер во „Дерби д’Италија“, објаснувајќи дека е за очекување да биде тешко на почетокот. Интер имаат седум поени пред „старата дама“ (иако Јуве има натпревар помалку).

„Мечот беше добар, бев задоволен што го видов тој гол од Барела. Победата на Интер беше добра, за Јуве? Такви работи се случуваат. Дури и ‘бјанконерите’ можат да имаат лоша ноќ. Лесно е да се критикува Пирло, но на почетокот е очекувано да има тешкотии, дури и кога си бил врвен фудбалер. Да си тренер е сосема поинаква ситуација. Потоа, полека, ќе учиш и ќе станеш подобар“, вели Манчини.

Бројките не се на страна на Пирло – тој има освоено 9 поени помалку од Маурицио Сари по 17 натпревари и го израмни најлошиот старт на Макс Алегри како тренер во Торино. Последен пат кога Интер победил со 2:0 против Јувентус, „нераѕурите“ ја освоија тројната титула, а Јувентус заврши седми во лигата со 27 поени заостанување.

Пред една година, со Сари на чело, Јувентус беше израмнет со Интер на врвот на табелата со 42 поени по 17 меча, а Пирло има 9 поени помалку. Тој ја израмни и најлошата сезона на Алегри, кога Јуве освои 33 поени во 17 меча во 2015/16. Тогаш Интер на Манчини беа први во лигата, но со само три поени предност и на крајот завршија како четврти, а Алегри ја освои титулата со 9 поени предност пред Наполи.

Дидие Дешам уште еднаш потврди дека нема да го врати Карим Бензема во француската репрезентација и покрај тоа што Мишел Мулан, претседателскиот кандидат за Француската фудбалска федерација (ФФФ) изјави дека ќе му „нареди“ на Дешам да го направи тоа.

Бензема не е кај „триколорите“ од ноември 2015 по скандалот со Матју Валбуена, и неодамна Дешам изјави дека уште не му простил за тоа што го нарекол расист. За плановите на Мулан, во интервју за „Ле фигаро“, Дешам вели дека се смешни и дека ако сака да го крои тимот нека се кандидира за местото селектор.

„Да бидеме искрени, тоа не е сериозна работа. Тоа се луѓе кои сакаат да се зборува за нив. Ги прочитав неговите изјави и ќе одговорам, иако знам дека со тоа ќе ја хранам медиумската машина. Тој господин треба да се кандидира за позицијата селектор, а бидејќи ги има дипломите, има шанси да ме замени“, вели Дешам.

Тој додава дека репрезентацијата игра фантастично и без Бензема, бидејќи Франција е актуелен светски шампион.

„Секогаш ги носам одлуките со совест за доброто на француската репрезентација. Видете ги нашите напаѓачи, можеби никогаш не сме имале таква ефикасност како сега. Тоа се факти, иако малкумина ги споменуваат“, објаснува селекторот.

Ветување за враќање на Бензема во француската репрезентација