Мерсисајд дербито, вечерва, за последен пат ќе се одигра на Гудисон Парк во Ливерпул.

Пред последната пресметка на стадионот кој на крајот од сезоната ќе замине во историјата, големите градски ривали имаат изедначен учинок на Гудисон, по 41 победа.

Тоа ќе биде 120. Мерсисајд дерби на теренот на Евертон, вкупно 245 во историјата на „карамелите“ и „црвените“. Во натпреварите одиграни на стадионот на Евертон, двата тима имаат по 41 победа. Вкупно, Ливерпул има 99 победи, Евертон 68, а 77 натпреварите завршувале без победник.

Евертон сака победа, со која би ставил крај на една ера на овој стадион, на Ливерпул победата му е потребна за стекне предност од девет бода во однос на Арсенал.

Натпреварот првично беше закажан за 7. декември, но силната бура тој ден го одложи.

Споредено со тој момент, кога Ливерпул ќе беше апсолутен фаворит на теренот, работите на другата страна значително се променија на подобро по доаѓањето на Дејвид Мојс.

Откако Мојс пристигна на Гудисон пред еден месец, само Ливерпул има освоено повеќе бодови од Евертон во Премиер лигата.

Во последната пресметка на Гудисон, главен судија ќе биде Мајкл Оливер, а во ВАР собата ќе седи Крис Кавано.

Дуелот ќе започне во 20 часот и 30 минути.

Транспарентот на трибините на „Етихад“ пред почетокот на натпреварот Манчестер сити-Реал Мадрид прувлече големо внимание.

„Престани да плачеш (Stop crying your heart out) и слика на Родри со Златната топка, логично сите ги асоцираше на Винисиус Жуниор. Бразилецот, барем според медиумите и неговиот клуб беше главниот фаворит за Златната топка, на крајот таа заврши во рацете на фудбалерот на Манчестер сити, а Реал ја бојкотираше церемонијата на доделувањето.

„We are 1984“, навивачката група на Сити која го создаде транспарентот и го развиори на јужната трибина на „Етихад“, поттикнати од бројните толкувања дека пораката на транспарентот е наменета за Винисиус, се обрати до јавноста еден часот по полноќ.

„Никој во медиумите не сфати дека личноста на која и е упатена пораката на транспарентот воопшто не беше на теренот. Праката му беше наменета на Флорентоно Перез. Тој беше човекот кој ја започна кампањата за оцрнување на Родри и бојкот на Златната топка. Пораката треба да се испрати без оглед на резултатот од натпреварот”.

Инаку, „Stop crying your heart out“ е позната песна на култниот манчестерски бенд „Oasis“, чии водачи, браќата Ноел и Лиам Галагер, се големи фанови на Сити.

Текстописецот Ноел одамна објасни дека сакал да испрати порака, дека со животот треба да се продолжи дури и во тешки времиња и дека била упатена до пријател кој поминувал низ тешка ситуација со своите деца.

Европската фудбалска унија (УЕФА) соопшти дека започнала преговори за продажба на телевизиските права со американската агенција „Релевант спортс“ за периодот од 2027 до 2033 година.

УЕФА на тој начин планира да ја прекине соработката со швајцарската агенција „Тим Маркетинг“, која од 1992 година ги продава телевизиските права за Лигата на шампионите.

УЕФА додаде дека одлуката во корист на американската агенција била донесена по тендер, „во кој биле вклучени понуди од неколку светски и регионални агенции“.

„Нормално, ние сме разочарани, но остануваме неверојатно горди на работата што ја направивме заедно со УЕФА во последните 35 години. Заедно, изградивме глобално призната комерцијална програма која генерира над 50 милијарди евра приход за европскиот клубски фудбал“, соопштија од швајцарската агенција.

Договорот со американската агенција би можел да ги обнови шпекулациите дека финалето на Лигата на шампионите еден ден може да се игра во САД. Ова е редовна тема откако Словенецот Александар Чеферин беше избран на чело на УЕФА во 2016 година.

Американската агенција „Релевант спортс“ ја води Стивен Рос, сопственик на Мајами Долфинс, клуб кој се натпреварува во американскиот фудбал (НФЛ), а потпишувањето на договорот со УЕФА се очекува во следните неколку недели.

Првиот договор на „Релевант спортс“ со УЕФА беше постигнат во 2022 година и вклучува продажба на правата од Лигата на шампионите само за територијата на САД.

Според плановите, УЕФА треба да генерира бруто комерцијален приход од најмалку 4,4 милијарди евра до 2027 година, од продажбата на телевизиските права за Лигата на шампионите, Лига Европа, Конференциската лига и Суперкупот, сето тоа преку својот сегашен партнер од Швајцарија.

Оваа сезона 36-те екипи од Лигата на шампионите ќе поделат околу 2,5 милијарди евра од наградниот фонд на УЕФА.